3 Sunod na adlaw, sellem pa, patugutan Jose na manaw mga utod din an daw iran na mga ayep na asno. 4 Na dili pa danen madyo ta banwa, pasugo Jose suguon din, “Lutuson no mga mama ya. Daw malambot no danen, ambalen no danen na ate an na pagtratar ki danen miad. Man-o tak pabalesan a danen ta malain na patakaw danen ake na tasa? 5 Yon na tasa sikad impurtanti ki yaken tak pagamit ko ta pag-inem daw pagamit ko man para mlaman ko daw ino mga matabo. Malain pabuat an danen ki yaken.”

6 Pagtapos ta ambal Jose, gapanaw suguon din. Na nalambot ta suguon mga utod ya Jose, pambal din ki danen mga ambal Jose.

7 Ambal ta mag-utod naan ta suguon, “Sir, man-o tak pabangdanan kay no na iling tan? Ula kay gaisip na takawen nay tasa ya ta imo na amo. 8 Nlaman nyo man na kan-o na gabalik kay alin ta Canaan, pabalik nay ki kyo kwarta ya na nakita nay naan ta baba ta ame na mga sako. Ula kay ganakaw ta blawan daw pilak naan ta balay ta imo na amo. 9 Sir, daw makita no tasa ya naan ta isya ki kami na mga suguon nyo, patayen no kanen an daw duma an ki kami imuon na inyo na mga ulipen.”

10 Ambal ta suguon, “Sigi. Miad pa daw iling ti buaten ta. Daw makita ko tasa ya naan ta isya ki kyo, imuon ko kanen an na ulipen. Piro, duma an palibrien ko.”

11 Pagtapos ta ambal ta suguon, kada isya ki danen gadali-dali na papanaog iran na sako daw pabukasan. 12 Gumpisa suguon ta ngita alin ta panganay asta ta kamangnguran. Tasa an nakita din naan ta sako Benjamin. 13 Pagisi ta mag-utod iran na mga bayo ta kalised daw pakarga danen iran na mga dala naan ta mga asno daw gapanaw danen isab malik naan ta banwa na paistaran Jose.

14 Pag-abot Juda daw iya na mga utod naan ta balay Jose, anen dya Jose an. Danen an galuod daw gademel naan ta basak naan ta tubangan din. 15 Ambal Jose naan ta mga utod din, “Man-o tak gabuat kaw ki yaken ta malain? Ula nyo nlami na may sarang a na mlaman daw ino malain na plano ta mga ittaw ki yaken.”

16 Ambal Juda ki kanen, “Ula kay may maambal ki kaon na amo nay. Ino masabat nay ki kaon? Ula kay paagi na mapamatuuran na ula kay ganakaw. Kami na mga suguon no pasilutan ta Dyos tenged ta malain na buat nay kan-o. Tanan kay imuon no na imo na ulipen asta Benjamin tak nakita no tasa ya naan ki kanen.”

17 Piro, ambal Jose, “Dili ko kyo yan silutan tanan! Daw kino nang na naan ki kanen nakita ta suguon ko ake na tasa, kanen nang buaten ko na ake na ulipen. Duma ki kyo malik ta inyo na amay. Kabay pa na dayad inyo na pagpanaw.”

18 Juda an gaprani ki Jose daw gambal, “Sir, daw pwidi, tugutan a no na mag-ambal ki kaon. Daw pwidi, matian a no. Dili ka nang magilek ki yaken na suguon no. Nlaman ko na may uturidad ka na paryo iya Paraon. 19 Sir, gainsa ka kan-o ki kami na mga suguon no daw may amay kay pa daw may duma kay pa na utod. 20 Sabat nay ta imo na insa na may amay kay pa, piro kanen an manakem en daw may isya kay pa na mangngod na mama. Natao kanen na manakem en ame na amay. Iya na utod ta inay patay en. Kanen nang en nabilin. Gani, palangga gid kanen an ta ame na amay. 21 Sir, ambal no ki kami na dleen nay di ki kaon kamangnguran nay aged makita no kanen an. 22 Ambal nay kan-o ki kaon na ame na kamangnguran dili makapamadyo naan ta ame na amay. Daw malin kanen an naan ta ame na amay, basi mapatay ame na amay. 23 Ambal no man ki kami na imo na mga suguon na kinanglan na madala nay ame na kamangnguran ki kaon aged pwidi kay magtubang ki kaon isab. 24 Sir, gabalik kay ta ame na amay na imo man na suguon, naan ta Canaan daw pasugiran nay ta imo ya na mga ambal.

25 “Na pasugo kay ta amay nay na malik kay di ta Egipto i daw malit isab ta bisan tise nang na pagkaan, 26 sabat nay na dili kay pwidi miling di. Kinanglan gid na pakuyugon nay ame na kamangnguran na miling ki kaon aged pwidi kay magtubang ki kaon. Daw madala nay ame na kamangnguran, pwidi kay miling di. 27 Amay nay ya na suguon no man, gambal kanen ki kami na nlaman nay na sawa din gabata ta darwa na mama. 28 Isya ki danen narwad daw isip ta amay nay na kanen ya naguspat-guspat en ta mga ayep daw ula din en nakita asta anduni. 29 Manakem en ame na amay daw tama en uban iya na buok. Ambal din na daw kamangen nay ame na kamangnguran ki kanen daw may matabo na malain ta ame na pagpanaw, mangalised gid kanen an daw basi mapatay pa.

30 “Gani, Sir, dili a makabalik naan ta amay nay na imo na suguon na dili nay duma muli kamangnguran nay an tak danen an isya nang ta ginawa. 31 Daw malik kay na makita din na ula kakuyog ame na kamangnguran, mapatay kanen an. Daw iling tan matabo, kami i na mga suguon no tenaan na amay nay an na manakem pa man en mangalised ta tudo daw mapatay. 32 Yaken na suguon no gapangako ta ame na amay na daw may malain na matabo ta kamangnguran nay, atag ko ake na kabui para ki kanen. Daw dili ko kanen mabalik naan ta ame na amay, yaken magbaton ta tanan din na pagbasol ta bilog ko na kabui.

33 “Anduni, yaken na suguon no may pangabay ki kaon. Daw pwidi, yaken nang en mabilin di daw buaten no na imo na ulipen na sal-i ta kamangnguran nay. Daw maimo, pulien no kanen an duma ta ake na mga utod. 34 Daw dili ko madala na muli kamangnguran nay, dili a malik ta ame na amay tak dili a kagwanta na makita na kanen ya mangalised gid ta miad.”