3 Ambal Juda ki kanen, “Paandaman kay kan-o ta manugdumala ta Egipto na daw malik kay naan ta Egipto, kinanglan na pakuyugon nay ame na kamangnguran aged pwidi kay magtubang isab ki kanen. 4 Daw tugutan no na muyog ki kami ame an na kamangnguran, malik kay dya anduni na malit ta pagkaan. 5 Piro, daw dili no tugutan na muyog kanen an ki kami, dili kay malik dya tak ambal ta manugdumala ya na kinanglan na pakuyugon nay ame na kamangnguran aged pwidi kay magtubang isab ki kanen.”

6 Ambal Israel, “Man-o tak paatagan a nyo ta prublima? Inta kan-o ula kaw gasugid ta mama ya na may utod kaw pa na nabilin unti!”

7 Sabat danen, “Gausisa mama ya ki kami parti ta ame na kaugalingen daw pamilya. Gainsa kanen daw bui pa ame na amay daw may utod kay pa. Pasabat nay nang iya na insa. Ula ta isip nay na mambal kanen ya na kinanglan na dleen nay dya ame na kamangnguran.”

8 Ambal Juda ki Israel na amay din, “Pakuyugon no nang en ki yaken ame na kamangnguran aged mabui ki daw ula bisan isya ki kiten na mapatay ta letem asta ate na mga bata. 9 Daw may malain na matabo ki kanen, iatag ko ake na kabui para ki kanen. Gapangako a ki kaon na ambligan ko kanen an. Daw dili ko kanen an madala balik ki kaon, yaken magbaton ta tanan na pagbasol no asta ta ula katapusan. 10 Daw patugutan kay no kan-o, darwa kay en inta bisis gabalik dya.”

11 Ambal Israel naan ta iya na mga bata, “Daw nyan gid dapat na buaten ta, manaw kaw daw magdala ta mga rigalo para ta mama ya na gadumala. Magdala kaw man ta pamanyos, deges ta putyukan, panaket, paammot na mira, liso ta pistasyo daw liso ta almendra. 12 Magdala kaw man ta kwarta na dubli pa ta kwarta na padala nyo kan-o para pangpalit ta pagkaan daw para man ibalik nyo kwarta na pabetang danen kan-o naan ta baba ta inyo na mga sako. Basi daw kasala nang danen ya. 13 Dleen nyo kamangnguran nyo an daw miling kaw dya ta manugdumala ya. 14 Kabay pa na Dyos Na Makagagaem magpalemmek ta nakem ta mama ya na maluoy kanen ki kyo aged ibalik din inyo na utod na Simeon daw Benjamin ki yaken. Daw marwad mga bata ko, ula a may maimo. Mangalised a nang gid en.”

15 Pagtapos ta ambal Jacob, gapriparar mga bata din an ta mga rigalo na dleen danen daw padubli danen iran na kwarta. Pakuyog danen Benjamin an daw giling danen naan ta Egipto. Pag-abot danen ta Egipto, gatubang danen an ki Jose.

16 Na nakita Jose iya an na utod na Benjamin na pakuyog ta iya na mga utod, pasugo din suguon na gadumala ta iya na balay, “Dleen no mga ittaw na i naan ta ate na balay daw mag-iyaw ka ta ayep daw mag-imes ta igma aged naan danen dya maan duma ki yaken.” 17 Pag-ambal Jose, gatuman suguon din an daw padala ta suguon mga mag-utod an naan ta balay din.

18 Nadlek mag-utod an tak padala danen an naan ta balay Jose. Gaisturyaay danen an, “Padala ki unti tak kiten pabangdanan ta kwarta ya na pabalik danen kan-o naan ta baba ta ate na sako. Basi dakepen ki danen daw buaten na mga ulipen daw kamangen danen ate ya na mga asno.” 19 Pag-abot danen naan ta gangaan ta balay, gaprani danen an naan ta suguon daw gambal, 20 “Sir, ta primiro, giling kay di aged malit ta pagkaan. 21 Ta ame na pag-uli, kalambot kay ta ame ya na puayan daw pabukasan nay ame na mga sako. Naan ta baba ta mga sako nakita nay ame na kwarta na ula buin. Anduni, balik nay ki kyo kwarta na i. 22 Gadala kay anduni ta dugang na kwarta para pangpalit ta ame na pagkaan. Ula kay nalam daw kino gabetang ta kwarta naan ta ame na sako.”

23 Ambal ta suguon, “Dili kaw magpalibeg. Dili kaw madlek tak inyo na Dyos na pasirbian man ta inyo na amay, kanen gaatag ta manggad ki kyo naan ta inyo na sako. Yaken kan-o gabaton ta inyo na bayad.” Pag-ambal ta suguon, pagwa din Simeon alin ta prisuan daw padala ki danen. 24 Paselled danen an ta suguon naan ta balay daw paatagan ta waig daw gaugas danen an ta iran na mga batiis. Papakaan man ta suguon mga asno an danen. 25 Gapriparar danen an ta iran na mga rigalo na iatag ki Jose. Plano danen na daw muli Jose ugto-adlaw, iatag danen ki kanen tak namatian danen na naan dya danen migma.

26 Bag-o pa guli Jose an, nabetang en danen iran ya na mga rigalo naan ta selled ta balay. Pag-uli din, paatag danen iran na rigalo ki kanen daw galuod danen na gademel naan ta basak na magtaod. 27 Jose an gainsa ki danen, “Kamusta kaw en? Ino, bui pa inyo na amay na manakem ya na pasambit nyo kan-o ki yaken? Miad man lawa din ya?” 28 Sabat danen, “Ame ya na amay na imo na suguon, biskeg pa man kanen an daw miad man iya na lawa.” Pag-ambal danen, gademel danen naan ta tubangan Jose na magtaod. 29 Patan-aw Jose danen an daw nakita din Benjamin na utod din ta amay daw inay. Gainsa Jose ki danen, “Ino, nyan en kamangnguran nyo na utod na pasambit nyo ki yaken kan-o?” Gambal Jose ki Benjamin, “Tong, kabay pa na Dyos an mag-ubay gid ki kaon.”

30 Pag-ambal Jose, gadali kanen na gapamadyo ta mga utod din tak kagalen gid en kanen an. Gangita kanen daw indi pwidi magal tak nidlaw gid en kanen ta iya na mangngod. Gaselled kanen ta kwarto daw naan dya gagal. 31 Na dayad en iya na pamatyag, galam-os kanen daw gagwa na gabalik ta iya na mga utod tak napegengan din en iya na kaugalingen na dili magal. Paggwa din, gasugo kanen an ta mga sinakepan din na ipatad en mga pagkaan an. 32 Pagkaan an Jose papatad naan ta isya na lamisa daw iya ta mga utod din naan ta isya pa na lamisa. Pagkaan ya a ta mga Egiptuanen na duma Jose naan ta isya pa man na lamisa. Iling tan pagpatad ta pagkaan ta mga utod Jose daw mga Egiptuanen tak kuntra ta pagpati ta mga Egiptuanen na magkaan tingeb ta mga Hebreo. 33 Lamisa ta mga utod din naan ta tubangan din daw papapungko din danen an na gasudsunuray umpisa ta panganay asta ta kamangnguran. Namasmasan ta mga utod din na gasudsunuray danen an. Gatan-away danen an daw gatingala. 34 Mga pagkaan na papatad naan ta lamisaan ta mga utod din naan alin ta lamisa Jose. Piro, mga pagkaan na paatag ki Benjamin limma gid isleb kaysa ta pagkaan ta duma din na mga utod. Gainem danen daw gangalipay duma ki Jose.