3 Mga utod Jose na sampulo gapanaw munta naan ta Egipto aged malit ta pagkaan. 4 Piro, Benjamin na mangngod Jose ula pakuyuga Jacob tak nadlek kanen na basi may malain na matabo ki Benjamin. 5 Yon na giling mga bata Israel naan ta Egipto dengngan ta duma na mga ittaw na giling dya aged malit ta pagkaan tenged ta letem naan ta Canaan.

6 Naan ta Egipto, Jose isya na manugdumala ta bilog na Egipto. Padumalaan din pagbligya ta pagkaan naan ta tanan na mga ittaw na gapalit naan ta Egipto. Pag-abot ta mga utod din, gaprani danen ki kanen daw galuod daw gademel naan ta basak na magtaod. 7 Na nakita Jose mga utod din an, nakala din dayon, piro patratar din danen an paryo na dili din kala danen an. Painsaan din danen an ta lagmi na pag-ambal, “Taga-indi kaw?” Sabat danen, “Taga-Canaan kami i. Giling kay di aged malit ta pagkaan.”

8 Tenged iling tan pagtratar Jose ta mga utod din, ula danen nakala kanen an, piro kanen a, nakala din danen an. 9 Nademdeman Jose mga dagammo din parti ki danen^a daw gambal kanen an ki danen ta sakit na ambal, “Mga manugtiid kaw. Giling kaw di aged manilag ta ame i na lugar aged mlaman nyo daw ino paagi na mapirdi kay nyo.”

10 Sabat danen, “Dili, Sir. Giling kay di aged malit kay ta ame na pagkaan. Kami i mga suguon no nang. 11 Mag-utod kay. Isya kay nang ta amay. Dili kay bula na mga ittaw. Dili kay manugtiid.”

12 Sabat Jose ki danen, “Dili a mapati. Giling kaw gid di na manilag ta ame i na lugar aged mapirdi kay nyo.”

13 Ambal danen, “Kami i imo na mga suguon. Dusi kay na mag-utod. Isya kay nang ta amay daw kanen ya naan ta Canaan. Kamangnguran nay ya nabilin naan ta ame na amay daw isya ya ula en.”

14 Piro, ambal Jose ki danen, “Paryo ta nambal ko ya gina. Kyo yan mga manugtiid. 15 Tagan ta kyo ta pagtilaw aged mlaman ko daw matuod mga ambal nyo an. Gasumpa a ta ngaran Paraon na dili ko tugutan na malin kaw di asta miling di inyo na kamangnguran. 16 Isya ki kyo muli aged kamangen din inyo an na kamangnguran daw dleen di. Piro, duma an ki kyo mabilin naan ta prisuan aged mlaman ko daw matuod ambal nyo an parti ta kamangnguran nyo. Daw dili matuod, gasumpa a pa ta ngaran Paraon, sigurado a gid na mga manugtiid kaw.” 17 Pagtapos ta ambal Jose, papriso din ta tingeb iya an na mga utod keteb ta tallo na adlaw.

18 Naan ta pangallo na adlaw alin ta pagpriso Jose ta iya na mga utod, gambal kanen an ki danen, “Daw sunuron nyo ake i na ambal, dili ko kyo yan patayen tak may adlek a ta Dyos. 19 Daw dili kaw bula na mga ittaw, dapat may isya ki kyo magpabilin naan ta prisuan daw duma an ki kyo muli daw magdala ta pagkaan para ta inyo na mga pamilya na naleteman. 20 Dleen nyo dayon malik ki yaken inyo na kamangnguran aged mlaman ko na matuod inyo na ambal. Daw ula kaw gabula, dili ta kyo patayen.” Pagtapos ta ambal Jose, gapati man iya an na mga utod.

21 Gaisturyaay danen na gambal, “Anduni pasilutan ki ta Dyos tenged ta malain ta na buat kan-o naan ta ate ya na utod. Nakita ta na sikad gid iya na adlek na gapakiluoy kanen an ki kiten, piro gapabengngel ki nang. Yon tenaan na anduni kiten man en naan ta makaadlek na sitwasyon.”

22 Ruben an, ambal din naan ta iya na mga utod, “Gambal a pa gid ki kyo kan-o na dili nyo buatan ta malain bata ya. Piro, ula kaw gapati ki yaken. Anduni kiten i pasilutan tenged ta iya na kamatayen.”

23 Ula nalam mga utod an Jose na kaintindi kanen an ta iran na ambal naan ta linggwai na Hebreo tak ta iya na pag-isturya ki danen pagamit din linggwai na iya ta mga Egiptuanen daw may ittaw nang na gasalyo ta iya na mga ambal alin ta linggwai na Egiptuanen naan ta linggwai na Hebreo. 24 Gapamadyo kanen an naan ta iya na mga utod daw magal. Na dayad en pamatyag din, gabalik kanen an daw pasugo din mga sinakepan din na kamangen Simeon an na utod din daw gapuson naan ta tubangan danen.

25 Pasugo Jose iya an na mga sinakepan, “Pannuon nyo iran na sako ta pagkaan daw balik iran na kwarta naan ta iran na sako duma ta pagkaan. Tagan nyo man danen an ta balon para ta iran na pagpanaw.” Pag-ambal Jose, gatuman man dayon mga sinakepan din an. 26 Dayon pakarga ta mga utod Jose pagkaan naan ta iran na mga ayep na asno daw gapanaw.

27 Na kilem en, gapuay danen ta iran na pagpanaw daw isya ki danen gabukas ta iya na sako aged magpakaan ta asno. Pagbukas din ta sako, nakita din kwarta an naan ta baba ta sako. 28 Ambal din naan ta mga utod din, “Pabalik danen ake na kwarta naan ta sako ko!” Pag-ambal din, nakulbaan danen na gapangluya gid iran na lawa. Gakereg danen ta subla na adlek daw gainsaay, “Ino ni taan pabuat i ta Dyos ki kiten?”

29 Pag-abot danen naan ta Canaan, pasugid danen ki Jacob na amay danen parti ta tanan na mga natabo ki danen. Ambal danen, 30 “Manugdumala ya ta Egipto gambal ki kami na gagilek tak salig din daw kami i mga manugtiid na gapanilag naan ta iran na lugar. 31 Piro, ambal nay ki kanen na dili kay bula na mga ittaw. Dili kay mga manugtiid. 32 Ambal nay pa na dusi kay na mag-utod daw isya kay nang ta amay. Isya na utod nay ula en daw ame na kamangnguran nabilin naan Canaan na duma ta ame na amay. 33 Manugdumala ya ta Egipto gambal ki kami na tagan kay din ta pagtilaw aged mlaman din daw matuod sugid nay. Paambalan kay din na bilin isya nay an na utod naan ki kanen daw duma an ki kami manaw na muli aged magdala ta mga pagkaan para ta ame na mga pamilya na naleteman. 34 Paambalan kay din na dleen nay dya ame na kamangnguran aged mlaman din daw matuod ame na ambal na dili kay manugtiid. Balik din man ame an na utod daw pwidi ki dya magpalit daw magbligya.”

35 Pagtapos ta isturya danen naan ta iran na amay, pabubo danen iran na mga sako daw naan ta kada sako nakita danen iran na mga puyo na may kwarta na pangbayad ta pagkaan. Pagkita danen ta kwarta, nakulbaan danen asta iran na amay. 36 Gambal Jacob ki danen, “Tenged ki kyo, narwad darwa ko na bata. Jose ya daw Simeon ula en daw anduni, kamangen nyo pa Benjamin an ki yaken. Miad inyo tak ula kaw gangalised. Piro, yaken i a na amay nyo gangalised gid.”

37 Ambal Ruben naan ta amay danen, “Daw dili ko madala balik Benjamin an ki kaon, patayen no darwa ko an na bata. Itugyan no nang Benjamin ki yaken tak balik ko man kanen an ki kaon.”

38 Piro, ambal Jacob, “Ake an na bata dili ko pakuyugon ki kyo na miling dya tak napatay Jose ya na utod din ta inay daw kanen nang en nabilin. Manakem aren en daw tama en uban buok ko i. Daw may matabo ki kanen na malain ta inyo na pagpanaw, mangalised a gid ta tudo daw basi mapatay a pa.”