5 Gatunuga isab kanen an daw gadagammo eman. Naan ta dagammo din may pitto na uway ta trigo naan ta isya na puon. Iran na passi tinggas daw darko. 6 Sunod ta una ya na mga uway ta trigo, may gatubo man na pitto na uway ta trigo na ula mga ugsak daw nakeseg ta angin na timog na sikad paso. 7 Pitto ya na uway ta trigo na darko daw tinggas pakaan ta pitto an na uway ta trigo na ula mga ugsak. Pagbugtaw Paraon, nlaman din na gadagammo nang kanen an.

8 Na sellem en, galibeg gid ulo Paraon. Papaumaw din mga gapanguna ta riliyon ta mga Egiptuanen na malam magsaysay daw ino beet ambalen ta mga dagammo daw tanan na mga may kanlaman naan ta Egipto daw pasugiran din danen an ta iya na mga dagammo. Piro, ula bisan isya ki danen na sarang magsaysay daw ino beet ambalen ta iya na mga dagammo.

9 Na nlaman ta manugdumala ta mga manugtagay ta inemen na ula may sarang magsaysay, gambal kanen an ki Paraon, “Anduni kademdem a na may sala a pla. 10 Maal na Paraon, na gagilek ka ki yaken kan-o daw ta manugdumala ta mga manugluto ta tinapay, papriso kay no naan ta balay ta kapitan ta mga gwardya. 11 Ta isya na kilem, darwa kay gadagammo, piro ula gaparyo beet ambalen ta ame na mga dagammo. 12 Naan ta prisuan may duma kay na isya na Hebreo na bata pa. Kanen ulipen ta kapitan ta mga gwardya. Pasugid nay ki kanen ame na mga dagammo daw pasaysay din ki kami beet ambalen ta mga dagammo nay. 13 Mga ambal din ki kami parti ta beet ambalen ta ame na mga dagammo gamatuod gid. Pabalik a no naan ta ake i na ubra daw pabitay no manugdumala ya ta mga manugluto ta tinapay paryo ta ambal din ki kami.”

14 Pagmati Paraon ta ambal ta manugdumala ta mga manugtagay ta inemen parti ki Jose, papaumaw din Jose an. Mga pasugo din an giling dayon naan ta prisuan daw papagwa danen Jose an. Gamarbas Jose an daw gasili ta bayo din. Giling kanen an daw gatubang ki Paraon. 15 Ambal Paraon ki kanen, “Gadagammo a, piro ula bisan kino na sarang magsaysay daw ino beet ambalen ta mga dagammo ko. May gasugid ki yaken na kaon yan sarang magsaysay daw ino beet ambalen ta mga dagammo.”

16 Sabat Jose ki Paraon, “Maal na Paraon, ula a sarang na magsaysay ta mga dagammo. Piro, Dyos an kanen nang may sarang na magsaysay ki kaon ta beet ambalen ta imo na dagammo para magtawway imo na isip.”

17 Pag-ambal Jose, pasugid ta ari iya an na mga dagammo naan ki Jose. Ambal din, “Gatindeg a naan ta kilid ta Suba Nilo. 18 May gatakas na pitto na baka alin ta kilid ta suba daw gaalab ta mga lamunon. Dayad lagen mga baka an daw tambek man. 19 Pitto man na baka na lain daw sikad niwang gatakas alin ta suba daw gasunod ta mga tambek na mga baka. Ula a may nakita na iling tan na kalain lagen na mga baka naan ta bilog na Egipto. 20 Mga baka na tambek pakaan ta mga niwang na baka. 21 Piro, bisan pakaan danen pitto na baka na tambek, niwang pa man gyapon danen an. Pagtapos ta dagammo ko, kabugtaw a. 22 Na gatunuga a isab, gadagammo a eman daw nakita ko na may pitto na uway ta trigo naan ta isya nang na puon. Iran na mga passi tinggas daw darko. 23 Sunod ta una na mga uway ta trigo, may gatubo man na pitto na uway ta trigo na ula mga ugsak daw layeng na nakeseg ta angin na timog na sikad paso. 24 Pitto ya na uway ta trigo na darko daw tinggas pakaan ta pitto ya na uway ta trigo na ula mga ugsak. Pagbugtaw ko, pasugid ko naan ta mga gapanguna ta ame na riliyon. Piro, ula bisan isya ki danen na sarang magsaysay daw ino beet ambalen ta ake na mga dagammo.”

25 Pagsugid ta ari ta iya na mga dagammo, ambal Jose ki kanen, “Maal na Paraon, mga dagammo no an isya nang beet ambalen. Papakita en ta Dyos ki kaon paagi ta dagammo daw ino en na buaten din. 26 Pitto na baka na dayad daw pitto na uway ta trigo na tinggas paryo nang beet ambalen na pitto taon. 27 Pitto na baka na niwang daw pitto man na uway ta trigo na ula ugsak beet ambalen pitto na taon na letem.”

28 Ambal pa Jose, “Maal na Paraon, paryas ta ambal ko gina, papakita ta Dyos ki kaon daw ino en na buaten din. 29 Umpisa anduni asta pitto taon dayad ani ta mga ittaw naan ta bilog na Egipto. 30 Piro, paglambay ta mga taon an na dayad ani, mabot man pitto taon na letem. Dili en mademdeman ta mga ittaw dayad ya na ani tenged ta segeng na letem na maageman ta mga ittaw naan ta bilog na Egipto. 31 Mga tubbas ya alin ta dayad na ani maubos tenged ta segeng na letem. 32 Maal na Paraon, gadagammo ka ta darwa bisis tak papakita ta Dyos ki kaon na ula nang en lugay tumanen din en iya an na plano. 33 Gani, Maal na Paraon, dayad gid daw magpili ka ta mama na maalam daw may pag-intindi aged kanen magdumala ta Egipto. 34 Magpili ka man ta mga upisyalis ta tanan na mga lugar na naan ta bilog na Egipto. Ta pitto na taon na dayad ani, danen magkamang ta isya na parti ta limma na parti ta paani ta mga ittaw naan ta Egipto. 35 Ipatipon ki danen tanan na mga isya na parti ta limma na parti ta mga naani. Tagan no danen ta uturidad na danen magtago ta mga naani naan ta mga budiga ta mga banwa daw pabantayan dya ta mga gwardya. 36 Mga patipon an na naan ta mga budiga itagana para pagkaan ta mga ittaw aged ta pag-abot ta pitto na taon na letem naan ta Egipto, dili danen maleteman.”

37 Paraon an daw mga upisyalis din nadayaran ta plano Jose. 38 Gambal kanen an naan ta mga upisyalis din, “Dili ki makakita ta ittaw na paryo ki Jose na paubayan ta Dyos.”

39 Gambal Paraon ki Jose, “Papakita ta Dyos ki kaon tanan na mga plano din. Ula duma na ittaw na paryo ki kaon tenged kaon yan maalam gid daw may pag-intindi. 40 Kaon yan buaten ko na manugdumala ta ake na mga panimalay. Tanan na mga ittaw naan ta mga lugar na sakep ta ake na pagdumala magtuman ta imo na mga sugo. Yaken nang may katengdanan na mas datas ta imo na katengdanan tak yaken ari.”

41 Ambal pa Paraon, “Kaon buaten ko anduni na manugdumala ta bilog na Egipto.” 42 Pag-ambal Paraon, pakamang din naan ta iya na tudlo singsing din an na may pangmarka daw pasuksok din naan ta tudlo Jose. Papabayuan din man Jose i ta maalen na bayo na lino^a daw pakulintasan din man ta blawan. 43 Paintriga din ki Jose pangarwa din an na sakayan na anggid ta kalisa na yon man sakayan na para ta ittaw na iya na katengdanan sunod ta iya ta ari. Gasakay Jose an daw gauna mga gwardya ki kanen na gasinggit, “Magluod kaw.” Iling tan na Jose an pabuat Paraon na kanen an manugdumala ta Egipto.

44 Gambal pa Paraon ki Jose, “Yaken Paraon ta Egipto. Tenged ta uturidad na paatag ko ki kaon, bisan ino na gusto buaten ta mga ittaw, kinanglan na maglisinsya anay danen an ki kaon.”

45 Jose an paatagan Paraon ta ngaran na Zafenat Panea daw pasawa man ki kanen Asenat na bata Potifera na pari naan ta banwa na On.

Pag-atag ki Jose ta datas na katengdanan, gaumpisa kanen an ta iya na pagdumala naan ta bilog na Egipto.

46 Na gaumpisa Jose an ta iya na pagsirbi ki Paraon na ari ta Egipto, idad din trinta na taon. Galin kanen naan ta tubangan ta ari daw galibot kanen an naan ta bilog na Egipto. 47 Seled ta pitto na taon na dayad ani, sikad tama tubbas an. 48 Seled ta pitto ya na taon papatipon Jose parti an ta mga naani para ta patagana na pagkaan. Naan ta kada banwa, mga parti an ta mga naani na alin ta mga uma na naan ta palibot ta banwa patago ta mga ittaw naan ta budiga ta iran na banwa. 49 Sikad tama na pagkaan na natipon din paryas katama ta pantad na naan ta baybay. Gauntat kanen ta pagsekeb tak dili en masakat ta pagsekeb tenged sikad tama.

50 Bag-o gabot letem an, Jose may darwa na bata na mama ki Asenat na bata Potifera na pari naan ta banwa na On. 51 Bata din na panganay pangaranan din na Manases^b tak ambal din, “Papalipat ta Dyos ki yaken mga kabellay na naagian ko daw pamilya ta amay ko.” 52 Bata din na pangarwa pangaranan din na Efraim^c tak ambal din, “Paatagan a ta Dyos ta mga bata naan ta yi na lugar na tama kabellay na naagian ko.”

53 Na natapos en pitto na taon na dayad ani naan ta bilog na Egipto, 54 gaumpisa man en pitto na taon na letem paryo ta paambal ya Jose. Dili nang naan ta Egipto may letem. Tanan na mga lugar may letem man. Piro, bilog na Egipto may pagkaan na patago naan ta iran na mga budiga. 55 Na naubusan ta pagkaan mga ittaw ta Egipto, giling danen naan ki Paraon daw mangayo ta pagkaan. Ambal Paraon ki danen, “Miling kaw ki Jose. Daw ino ambal din, sunuron nyo.”

56 Na galekkep en letem an naan ta bilog na Egipto, pabukasan Jose tanan na mga budiga na patipunan din ta mga pagkaan daw pabligya din naan ta mga Egiptuanen tak segeng gid en na letem. 57 Sikad tama na mga ittaw naan ta duma na mga lugar giling man naan ta Egipto aged malit ta pagkaan naan ki Jose tak segeng gid na letem naan ta bilog na kalibutan.