Genesis 40

Mga Dagammo Ta Mga Priso

1-2 Naan ta paprisuan ki Jose may darwa na priso na dati mga upisyalis Paraon na ari ta Egipto. Isya an na upisyal manugdumala ta mga manugtagay ta inemen ta ari daw isya an a na upisyal manugdumala ta mga manugluto ta tinapay ta ari. Darwa an na upisyalis Paraon papriso tak gabuat ta sala kuntra ki kanen. Gilek gid kanen an ki danen 3 daw papriso din danen an naan ta balay ta kapitan ta mga gwardya na naan man dya Jose ya napriso. 4 Jose an pasaligan ta kapitan na magsirbi ta darwa na upisyalis. Lugay danen naan ta prisuan.

5 Isya na kilem naan ta prisuan, darwa an na upisyalis Paraon gadagammo. Piro, ula gaparyo iran na dagammo daw ula man gaparyo beet ambalen ta iran na dagammo. 6 Sunod na adlaw, Jose i giling ki danen daw nakita din na danen an gapalibeg. 7 Painsaan din mga upisyalis an, “Man-o tak gangasebe kaw gid anduni?”

8 Sabat danen, “Gadagammo kay, piro ula ittaw unti naan ta prisuan i na malam magsaysay daw ino beet ambalen ta mga dagammo nay.”

Ambal Jose, “Dyos nang gaatag ta abilidad naan ta mga ittaw na magsaysay daw ino beet ambalen ta mga dagammo. Daw pwidi nang, isugid nyo ki yaken daw ino dagammo nyo.”

9 Pagtapos ta ambal Jose, una na gasugid parti ta dagammo din manugdumala ta mga manugtagay ta inemen. Ambal din, “Naan ta dagammo ko nakita ko blagen ta ubas naan ta tubangan ko. 10 Naan ta puon din may tallo na sanga. Na gasalingsing mga sanga, gamulak dayon daw gapungpong ta bunga daw gainog. 11 Gaibit a ta tasa ta ari daw gaipo a ta ubas. Papega ko ubas na pasalod ko naan ta tasa din daw paatag ko ki kanen.”

12 Pagsugid din ta iya na dagammo, ambal Jose ki kanen, “Yi beet ambalen ta imo na dagammo: Tallo na sanga beet ambalen tallo na adlaw. 13 Seled ta tallo na adlaw, pagwaen ka ta ari naan ta prisuan daw patawaren ka din. Pabaliken ka din man ta imo na ubra. Kaon isab magtagay ta inemen ki kanen paryas ta dati no na ubra. 14 Piro, daw naan ka en ta miad na kaimtangan, dili a no gid lipatan daw tabangan a no man. Daw pwidi nang, sugiran no ari an parti ki yaken aged pagwaen a din ta prisuan i. 15 Ta kamatuuran padala a di ta Egipto i alin ta lugar ta mga Hebreo paagi ta pwirsa. Dili a dapat prisuon tak ula a gabuat ta malain.”

16 Na namatian ta manugdumala ta mga manugluto ta tinapay na dayad beet ambalen ta dagammo ta manugdumala ta mga manugtagay ta inemen, pasugid din man ki Jose iya an na dagammo. Ambal din, “May dagammo a man. Padurong ko na sampaw-sampaw tallo na baskit na ugsakan ta tinapay. 17 Ugsak ta baskit na naan ta apaw klasi-klasi na pagkaan na para ta ari. Piro, pakaan ta mga yupan mga pagkaan na naan ta apaw na baskit na padurong ko.”

18 Ambal Jose, “Yi beet ambalen ta imo na dagammo. Tallo na baskit beet ambalen tallo na adlaw. 19 Seled ta tallo na adlaw, pagwaen ka ta ari naan ta prisuan i daw uturan ka din ta lieg. Bitayen din lawa no naan ta kaoy daw kan-enen man ta mga yupan.”

20 Pangallo na adlaw alin ta pagsugid ta darwa na upisyalis ta iran na dagammo kaadlawan ta ari daw gakumbira kanen an para ta tanan din na mga upisyalis. Papagwa din alin ta prisuan manugdumala ta mga manugtagay ta inemen daw manugdumala ta mga manugluto ta tinapay daw patubang din naan ta duma din na mga upisyalis. 21 Pabalik ta ari manugdumala an ta mga manugtagay ta inemen naan ta dati din na ubra daw kanen an gaatag isab ta inemen naan ta ari. 22 Piro, manugdumala ta mga manugluto ta tinapay papatay ta ari na pabitay naan ta kaoy paryo ta ambal ya Jose parti daw ino beet ambalen ta iran na dagammo.

23 Manugdumala an ta mga manugtagay ta inemen, ula kademdem ki Jose daw ula din man pasugid naan ta ari parti ki Jose.