2 Na naan Jose ta balay ta Egiptuanen na amo din, paubayan kanen ta GINUO daw patabangan ta tanan din na mga pabuat. 3 Nakita ta amo din na dayad tanan na mga pabuat din tenged paubayan kanen ta GINUO. 4 Miad nakem ta amo din ki kanen daw pabuat kanen an na manugsirbi na pasaligan ta tanan na mga sinakepan daw pagkabetang ta iya na amo.

5 Umpisa na pasalig ta Egiptuanen na amo Jose tanan din na mga sinakepan daw pagkabetang naan ki Jose, pauswag ta GINUO iya na panimalay daw mga uma tenged ki Jose. 6 Tenged pasalig din ki Jose tanan din na mga pagkabetang, ula en kanen an gaintindi ta bisan ino. Paintindi din nang iya na kan-enen.

Dayad panglawaen Jose daw gwapo. 7 Ta kalugayen, naliagan kanen an ta sawa ta amo din daw gambal bai an, “Magdulog ka ki yaken.”

8 Piro, dili gid miag Jose an ta gusto ya ta bai daw ambal din, “Tanan na mga pagkabetang ta amo ko pasalig din ki yaken daw ula kanen en may paintindi pa tak anen a di. 9 Darwa kay amo ko na gadumala naan ta yi na balay. Pwidi a magbuat ta bisan ino na gusto ko, piro dili a magtandeg ki kaon tak sawa ka din. Dili a magbuat ta malain daw sala kuntra ta Dyos.”

10 Adlaw-adlaw sigi pilit ki Jose sawa an ta amo din, piro gapabengngel nang kanen an daw ula kanen gadulog ta sawa ta amo din.

11 Isya na adlaw, gaselled Jose i naan ta balay aged mubra, piro ula dya duma ya na mga suguon. 12 Bayo din an paawiran ta sawa ta amo din daw gambal bai an, “Magdulog ka ki yaken.” Piro, palubbas Jose bayo din an para kapallos kanen an. Gadlagan kanen na mwa ta balay na bayo din an nabilin naan ta lima ta sawa ta amo din.

13 Sawa an ta amo Jose, na nakita din na gadlagan Jose na nabilin bayo Jose naan ki kanen, 14 paumaw din tanan din na mga suguon daw ambal din, “Pakamang ta sawa ko isya na Hebreo na magduma ki kiten, piro pagayyaan a din. Yo na Hebreo gaselled ta kwarto ko aged legesen a, piro gasinggit a ta tudo. 15 Na namatian din na gasinggit a, gadlagan kanen an na mwa naan ta balay na nabilin din iya na bayo naan ki yaken.”

16 Pagtapos ta ambal ta sawa ta amo Jose, patago din bayo an Jose asta na guli sawa din ya. 17 Pag-uli ta sawa din, pasugiran din dayon, “Hebreo na ulipen na pakamang no gaselled naan ta ake na kwarto daw pagayyaan a din. 18 Piro, gasinggit a ta tudo daw gadlagan kanen dayon na mwa ta balay na nabilin iya na bayo naan ki yaken.”

19 Pagmati ta amo Jose ta sugid sawa din, sikad gid iya na gilek. 20 Pasugo din na dakepen Jose i daw prisuon. Jose i papriso naan ta prisuan na naan dya mga ittaw na papriso ta ari.

Lugay Jose i naan ta prisuan. 21 Piro, GINUO an gaubay daw naluoy ki kanen. Yon tenaan na manugdumala an ta prisuan nadayaran ki kanen. 22 Patugyan ta manugdumala ta prisuan naan ki Jose tanan na mga priso daw tanan na mga ubraen naan ta prisuan. 23 Ula en gaintindi manugdumala an ta mga patugyan din ki Jose tak GINUO gaubay daw gatabang ki Jose ta tanan din na mga buat.