Juda Daw Tamar
38
Ta yon man na timpo na galalaw pa Jacob tenged ki Jose, Juda na utod Jose galin ta iran na balay daw munta ta lugar na madyo ta mga utod din. Naan kanen an gaistar dani ta istaran ta isya na mama na ngaran din Hira na taga-Adulam na banwa. 2 Naan dya nakita Juda isya na bai na bata Sua na taga-Canaan daw pasawa din. 3 Sawa din gabagnes daw gabata ta mama. Pangaranan Juda bata an na Er. 4 Gabagnes isab sawa din daw gabata ta mama. Pangaranan ta sawa din bata an na Onan. 5 Na naan danen ta lugar na Kizib, gabata isab sawa din ta mama. Pangaranan ta sawa din bata an na Sela.6 Paglambay ta pila na mga taon, Er na bata Juda na panganay papasawa Juda naan ta bai na ngaran din Tamar. 7 Er an na panganay Juda, ta pagtan-aw ta GINUO kanen an malain na ittaw. Yon na papatay kanen an ta GINUO.
8 Na napatay Er ya, Juda an gambal ki Onan, “Nlaman no na may katengdanan ka na sawaen no sawa ta utod no ya na napatay aged makabata para ki kanen. Dulugan no bayaw no na Tamar aged may bata utod no paagi ki kaon.” 9 Piro, nlaman Onan na daw magbata Tamar an, dili din makabig na iya na bata tak kinanglan gid na kabigen din na bata ta utod din na napatay. Na gadulog kanen ki Tamar, iya an na similya palawas din nang tak dili din gusto na tagan ta bata iya ya na utod. 10 Tenged pabuat an Onan malain ta pagtan-aw ta GINUO, papatay man kanen an ta GINUO.
11 Juda i gambal naan ta magad din na Tamar, “Malik ka naan ta balay amay no daw dili ka mangasawa asta magbakod bata ko na Sela.” Iling tan ambal Juda tak nadlek kanen na mapatay man Sela an paryo ta mga utod Sela. Tamar gabalik naan ta balay ta amay din daw naan dya en gaistar.
12 Paglambay ta pila na mga taon, napatay sawa ya Juda na bata Sua. Pagtapos ta paglalaw Juda, giling kanen an naan ta lugar na Timna aged dumalaan din iya na mga ittawan ta iran na paggunting ta belbel ta iya na mga karniro.a Duma din Hira na taga-Adulam.
13 May gasugid ki Tamar na miling ugwangan din naan ta Timna. Ambal ta gasugid ya, “Ugwangan no miling naan ta Timna tak iya na mga karniro guntingan ta belbel.” 14 Nlaman Tamar na Sela an bakod en, piro ula kanen papasawa Juda ki Sela. Pasilian din bayo din na pangbalo ta duma na bayo daw patageban din iya na waleng ta bilo aged dili kanen an makala. Gamungko kanen naan ta gangaan ta padir na galibot ta banwa na Enaim na isya man na agian na munta ta banwa na Timna.
15 Na Juda an gaagi dya, nakita din Tamar ya. Salig din na Tamar ya bai na gabligya ta iya na lawa tak may tageb iya na waleng. 16 Dayon gaprani Juda an ki Tamar naan ta kilid dalan daw paanggat din. Ambal din, “Daw pwidi, muyog ka ki yaken.” Ula din nlami na bai an na paanggat din iya na magad.
Gainsa Tamar, “Daw muyog a ki kaon, ino atag no ki yaken?”
17 Sabat Juda, “Padlaan ta kaw ta kanding ko na bata pa.”
Ambal man Tamar, “Sigi. Piro, tagan a no anay ta maski ino na betang na pamatuod na magtuman ka ta pangako no na padlaan a no ta kanding.”
18 Insa Juda, “Ino gusto no na iatag ko ki kaon para pamatuod na tumanen ko ake na pangako?”
Sabat Tamar, “Imo na kulintas na may pangmarka daw imo man na sungkod.” Pag-atag Juda ki Tamar, gadulog kanen ki Tamar. Yon tenaan na Tamar an gabagnes.
19 Gapanaw muli Tamar i daw pakamang din tageb ta waleng din daw pasuot isab bayo na pangbalo.
20 Pasugo Juda arey din na Hira na taga-Adulam na dul-ong kanding na bata pa naan ta bai ya aged mabawi Juda pangmarka din daw sungkod. Piro, ula nakita Hira bai ya. 21 Gainsa Hira ta mga mama naan dya daw indya bai ya na gabligya ta lawa din na naan ta kilid ta dalan na munta Enaim.
Sabat ta mga mama, “Ula bai di na gabligya ta lawa din.”
22 Pagmati Hira, gabalik kanen ki Juda daw pasugiran din na ula din nakita bai ya daw ambal ta mga mama na ula bai dya na gabligya ta lawa din.
23 Ambal Juda, “Bay-an no nang en. Dili ta nang en kamangen ki kanen pangmarka ko ya daw sungkod tak tatawaan ki nang ta mga ittaw. Ula ki mabuat en tak papadala ko en kanding na bata pa para atag ki kanen, piro ula no nakita kanen ya.”
24 Paglambay ta tallo na bulan, may gasugid ki Juda, “Mamati ka. Tamar na magad no gabligya ta lawa din. Dili nang nyan, gabagnes kanen tenged ta pagbligya din ta iya na lawa.”
Tenged ta pasugid ki Juda, ambal din, “Dleen nyo kanen an pagwa daw sunugon asta na mapatay.”
25 Na papagwa Tamar an, gatugon kanen an para ki Juda na ugwangan din, “Tag-iya ta yi na pangmarka daw sungkod, kanen kabagnes ki yaken. Daw pwidi, lagen no daw iya ti ni.”
26 Na nakita Juda pangmarka ya daw sungkod, nakala din na iya daw ambal din, “Tamar an ula sala, piro yaken nakasala tak ula ko papasawa ki kanen bata ko na Sela.” Ula en isab gadulog Juda ki Tamar.
27 Na uras en na magbata Tamar an, naan din dya nlaman na gabagnes kanen an ta kapid. 28 Na gapasakit en kanen an, gagwa isya an na lima ta isya na kapid daw paigutan ta nanligan ta ilo na minog aged tandaan daw kino panganay ta kapid ya. Piro, lima ya genlek. 29 Piro, isya ya a na kapid una na gagwa. Ambal ta nanligan, “Galeges ka gid imo na kaon muna gwa.” Yon na pangaranan bata an na Perez.b 30 Paggwa ta una na bata, gagwa man en iya na kapid na may igot na minog na ilo naan ta lima daw pangaranan danen na Zera.c