Na Jose na bata Jacob gaidad en ta disi-syiti na taon, kanen an gabantay ta mga karniro daw mga kanding duma ta mga utod din an na mga bata Bilha daw Zilpa na mga sawa ta amay din. Nakita Jose na iya na mga utod gabuat ta malain daw pasugid din ta iran na amay.

3 Israel an na paumaw man na Jacob na amay Jose, mas palangga din Jose an kaysa ta duma din na mga bata tak kanen an manakem en na Jose an natao. Pabuatan din Jose an ta dayad na bayo na tama kulor. 4 Jose an, na nakita ta mga utod din na kanen mas palangga ta iran na amay kaysa ki danen, pademetan danen kanen an daw pirmi pambalan ta mga sakit na ambal.

5 May adlaw na Jose i gadagammo daw pasugid din naan ta mga utod din. Tenged ta iya na pasugid, gadegdeg pa gid demet ta mga utod din. 6 Iling ti ambal Jose naan ta mga utod din, “Daw pwidi nang, mamati kaw ta isturya ko parti ta ake na dagammo. 7 Naan ki ta uma na gabegkes ki ta trigo. Ake na binegkesan gatindeg ta tadleng. Inyo ya na mga binegkesan galibot paryo ta mga ittaw na gademel aged magtaod ta ake na binegkesan.”

8 Ambal ta mga utod din, “Ino beet ambalen no? Gasalig ka gid na mabot adlaw na kaon yan ari na magdumala ki kami?” Yon tenaan na gadegdeg pa gid iran na demet ki kanen tenged ta iya na dagammo na pasugid din.

9 Gadagammo isab Jose daw pasugid din ta mga utod din. Ambal din, “Mamati kaw. Gadagammo a isab. Ta pangarwa ko na dagammo, adlaw an, bulan daw unsi na bituon gademel aged magtaod ki yaken.”

10 Pasugiran man Jose amay din an parti ta pangarwa din na dagammo daw pagilekan dayon kanen ta amay din, “Dili ka inta magsugid ki kami parti ta mga dagammo na iling tan. Ino beet no ambalen? Gasalig ka gid na kami inay no daw mga utod no magluod daw magdemel naan ta basak na magtaod ki kaon?”

11 Mga utod Jose nainggit ki kanen. Piro, amay Jose a, patanem din gid naan ta iya na isip parti ta dagammo ya Jose.

12 Mga utod Jose giling naan ta dani ta banwa na Siquem aged magbantay ta mga karniro daw mga kanding ta iran na amay. 13 Israel an gambal ki Jose, “Imo na mga utod gabantay ta mga karniro daw mga kanding naan dani ta Siquem. Magpriparar ka tak palutuson ta kaw dya ki danen.” Sabat Jose, “Sigi.” 14 Ambal pa ta iya na amay, “Manaw ka daw bistaan no daw miad kaimtangan ta mga utod no daw iran na mga ayep. Pagtapos, malik ka di dayon daw sugiran a no.” Pag-ambal din, papanaw din Jose alin ta Patag Hebron.

Pag-abot Jose naan ta Siquem, 15 galibot-libot kanen naan ta kabalasan ta pagpangita ta iya na mga utod. Na nakita kanen ta isya na mama, painsaan kanen an, “Ino pangita no?”

16 Sabat Jose, “Papangita ko mga utod ko ya na gabantay ta mga karniro daw mga kanding. Daw nakita no danen ya, sugiran a no tuo daw indi danen ya.” 17 Ambal ta mama, “Ula di en danen ya. Gapanaw en. Namatian ko na gambal danen na miling kon naan ta Dotan.”

Pag-ambal ta mama, Jose i galutos ki danen daw nakita din naan ta Dotan. 18 Na madyo pa Jose i naan ta mga utod din, kanen an nabantaw en danen. Bag-o kabot kanen ki danen, gasapol danen na kanen an patayen. 19 Ambal danen, “Anen en sikad i magdagammo. 20 Sigi, patayen ta kanen daw ulog naan ta isya na lungag di na saluran ta uran. Lagen ta daw matuman pa iya na dagammo. Daw may mag-insa daw indya kanen ya, ambalen ta nang na natekeb kanen ta pintas na ayep.”

21 Isya ta mga utod Jose na Ruben kamati ta plano ta duma din na mga utod daw gusto din na luwasen Jose ki danen. Ambal din, “Dili ta patayen Jose an.” 22 Ambal pa Ruben, “Dili nyo kanen sakiten daw dili man patayen. Ulog nyo nang kanen an naan ta lungag di na saluran ta uran.” Iling tan ambal Ruben tak plano din na luwasen Jose an daw ibalik naan ta iran na amay.

23 Pagprani Jose naan ta mga utod din, palubbas danen dayad din ya na bayo. 24 Padala danen kanen an daw paulog naan ta lungag ya. Piro, lungag ya ula en waig tak naubbasan.

25 Pagtapos danen ulog ki kanen naan ta lungag, gapungko danen an daw gakaan. Na gakaan danen, nabantaw danen isya na grupo ta mga nigusyanti na Ismaelinen na miling naan ta Egipto alin ta banwa na Galaad. Karga ta mga kamilyo ta mga Ismaelinen mga bligya danen na paammot, bulong na pamanyos daw saleng na alin ta tagek ta mira. 26 Juda an na utod Jose gambal naan ta mga utod din, “Ula pulos daw patayen ta ate na utod daw isikrito ta nang daw kino gapatay ki kanen. 27 Miad pa bligya ta nang kanen an naan ta mga Ismaelinen. Dili ta kanen sakiten tak kanen an utod ta man gyapon daw sugpon ta bituka.” Pag-ambal Juda, gapati mga utod din an ki kanen.

28 Na gaagi dya mga nigusyanti na Midianen na yon man mga Ismaelinen, pabatak Jose i ta mga utod din naan ta lungag daw pabligya danen naan ta mga Ismaelinen na balor ta binti na bilog na pilak ta iran na kwarta. Jose i padala ta mga Ismaelinen naan ta Egipto.

29 Na pabligya danen Jose ya, ula nalam Ruben tak ula kanen dya. Pagbalik Ruben, ula din en nakita Jose ya naan ta lungag. Pagisi-gisi din iya na bayo ta sikad na kalised. 30 Gabalik kanen naan ta mga utod din daw gambal, “Ula dya en ate ya na mangngod. Ino buaten ko?”

31 Pag-ambal Ruben, paiyaw danen isya na kanding daw patusmog danen bayo ya Jose na dayad naan ta lengngessa ta kanding. 32 Na guli en danen naan ta iran na amay, padala danen bayo ya Jose daw gapakuno-kuno na ula danen nalam daw ino natabo ki Jose. Ambal danen, “May nakita kay na bayo. Tan-awen no daw iya ni ta bata no.”

33 Nakala ta amay danen bayo an Jose daw ambal din, “Yi na bayo iya ta bata ko daw beet ambalen na natekeb kanen ta pintas na ayep! Kaluluoy gid kanen ya tak sigurado na paguspat gid lawa din ya!” 34 Pagisi Jacob iya an na bayo daw gasuot kanen ta bayo na sanot-sanuton aged ipakita na sebe gid kanen an. Tama na mga adlaw na gangasebe kanen an. 35 Tanan na mga bata Jacob gaprani ki kanen aged alam-alaman kanen an na dili mangasebe. Piro, dili kanen an miag. Ambal din, “Bay-an a nyo nang. Mangasebe a nang en asta ta adlaw na mapatay a daw magtingeb a ta bata ko naan ta lugar ta mga patay.” Sigi nang kanen an agal tenged ki Jose.

36 Na gabot naan ta Egipto mga nigusyanti na Midianen na yon man mga Ismaelinen, pabligya danen Jose an ki Potifar na isya na upisyal Paraon na ari ta Egipto. Potifar an kapitan ta mga gwardya ta ari.