2 Ambal Jacob ta pamilya din daw mga sinakepan daw mga ittaw na gaduma ki kanen, “Pilak nyo inyo an na mga dyos-dyusan daw limpyuan^a nyo inyo na kaugalingen daw magsili kaw ta inyo na bayo. 3 Magpriparar kaw tak manaw ki naan ta Betel daw magbuat a dya ta alaran na bato aged naan ta dya simbaen Dyos an tenged kan-o na naagian ko mga kabellay, pasabat din pangamuyo ko na tabangan a din. Bisan indi a punta, kanen an pirmi gaubay ki yaken.” 4 Pagtapos ta ambal Jacob, paatag danen ki kanen tanan na mga dyos-dyusan daw mga dilyos danen^b daw palebbeng Jacob naan dalem ta isya na kaoy naan ta Siquem.

5 Gapanaw danen an Jacob alin ta Siquem na munta ta Betel. Ta iran na pagpanaw, paambligan danen an ta Dyos daw paadlek ta Dyos mga ittaw naan ta mga banwa na palambayan danen daw ula may gasulong ki danen Jacob. 6 Paglambay ta pila na mga adlaw, gabot Jacob i daw mga duma din naan ta Betel na sakep man ta Canaan. Anay pa sa Betel paumaw man na Luz. 7 Naan dya gabuat Jacob ta alaran na bato daw pangaranan din lugar an na El Betel^c tak naan dya Dyos gapakita ki kanen ta timpo na gapamadyo kanen an ta utod din.

8 Naan man ta Betel, napatay suguon Rebeca na bai na ngaran din Debora daw palebbeng Debora an naan ta dalem ta isya na kaoy na naan dapit ta sur ta Betel daw pangaranan danen kaoy an na Allon Bacut.^d

9 Na naan danen Jacob ta Betel alin ta Padan-aram, Dyos gapakita isab ki Jacob daw pabindisyunan din Jacob an na 10 ambal din, “Imo an na ngaran Jacob. Piro anduni, dili ka en umawen na Jacob tak ngaran no an Israel en.” Yon na paumaw kanen an na Israel.

11 Ambal pa ta Dyos ki Jacob, “Yaken Dyos Na Makagagaem. Magtama pa gid mga linai no an. Danen an maimo na bakod na nasyon. Dili nang nyan, danen an maimo na alinan ta mga grupo ta mga nasyon. May anen na mga linai no na magdumala bilang mga ari. 12 Yi na lugar paatag ko pugya ta lolo no na Abraham daw ta amay no na Isaac. Iatag ko man ki kaon daw ta mga linai no.” 13 Pagtapos ta ambal ta Dyos, galin kanen ta lugar na naan dya kanen gaisturya ki Jacob.

14 Gapatindeg Jacob i ta bato bilang pangdemdem na naan dya gapakita Dyos ki kanen. Pabubuan din bato an ta inemen bilang alad din naan ta Dyos daw pabubuan din man ta lana ta olibo. 15 Lugar ya na gaisturya Dyos ki kanen pangaranan Jacob na Betel.^e

16 Na galin danen Jacob ta Betel munta ta Efrata, umpisa na gapasakit Raquel an tak uras en na kanen an magbata daw nakulian gid kanen an. 17 Na nabatyagan din sikad sakit tak gagwa bata an, ambal ta nanligan ki Raquel, “Dili ka madlek tak mama isab imo na bata.” 18 Natao bata an Raquel, piro Raquel an tagumatayen. Bag-o kanen napatay, pangaranan din bata din na Ben-oni.^f Piro, Jacob na amay ta bata papangaranan din bata an na Benjamin.^g

19 Napatay Raquel ya daw palebbeng danen dani ta agian na munta ta banwa na Efrata na paumaw man na Betlehem. 20 Patindegan Jacob ta bato lebbengan Raquel para tanda. Naan pa dya bato an asta anduni.

21 Jacob na paumaw man en na Israel daw mga duma din gapadayon ta iran na pagpanaw daw gatukod danen ta iran na balay na turda naan ta liyo ta turi na Eder.

22 Jacob na paumaw man en na Israel daw mga duma din gaistar naan ta lugar na liyo ta turi na Eder. Na gaistar danen dya, Ruben an gadulog ki Bilha na isya ta mga sawa Jacob na amay din daw buat ya Ruben nlaman Jacob.

Yi dusi na mga bata Jacob na mama:

Yon mga bata Jacob na mama na natao naan ta Padan-aram.

27 Giling Jacob ta amay din na Isaac naan ta lugar na Mamre na dani ta Kiryat-arba na paumaw man na Hebron. Naan dya pugya gaistar Abraham daw Isaac. 28 Na gaidad Isaac ta sinto utsinta na taon, 29 napatay kanen an. Manakem gid en kanen an bag-o napatay. Palebbeng kanen an ta iya na mga bata na danen Esau daw Jacob na tingeb ta iya na mga kaapuan.