5 Pagmati Jacob na bata din na Dina pagayyaan Siquem, ula kanen gasasaba tak patagaran din duma din na mga bata na muli alin ta uma na naan dya danen gabantay ta mga ayep.

6 Piro, na ula pa guli mga bata Jacob, giling ki kanen Hamor an na amay Siquem aged mag-isturya parti ta kasal danen Siquem daw Dina. 7 Pag-uli ta mga bata Jacob, namatian danen na Dina ya paleges Siquem. Gasakit gid iran na beet daw gagilek gid tak papagayyaan Siquem pamilya Jacob paagi ta iya na pagleges ki Dina. Yon na buat Siquem malaw-ay gid.

8 Ambal Hamor ki Jacob, “Siquem na bata ko, bakod gid liag din ki Dina. Daw pwidi nang, ipasawa no Dina an naan ta bata ko. 9 Kabay na tugutan no na inyo na mga bata na dlaga pasawa nyo ta ame na mga miron daw ame na mga dlaga ipasawa nay ta inyo na mga miron. 10 Libri kaw magpili ta bisan indi ta ame na lugar para inyo na istaran daw inyo man en na basak. Pwidi kaw man na naan di magnigusyo.”

11 Gambal Siquem naan ki Jacob daw naan man ta mga mama na utod Dina, “Daw miag kaw ta ambal ko na sawaen ko Dina an, atag ko ki kyo daw ino gusto nyo. 12 Ambalen nyo nang daw pila bayad ki kyo daw ino rigalo na gusto nyo iatag ko naan ta inyo na pamilya. Bisan ino ambalen nyo, iatag ko, basta Dina an pasawa nyo nang ki yaken.”

13 Mga bata Jacob na mama gaplano na lukuon nang danen Siquem an daw iya na amay tenged Dina an na iran na utod papagayyaan Siquem. 14 Ambal danen ki Siquem daw amay din, “Dili pwidi ipasawa nay utod nay an ta mama na ula nabuatan ta tanda naan ta iya na lawa^a tak makagayya nang ki kami. 15 Daw tanan na mga mama naan ta inyo na banwa magpabuat ta tanda naan ta iran na lawa paryo ki kami, magtugot kay en na ipasawa utod nay ki Siquem. 16 Daw magpabuat kaw ta tanda naan ta inyo na lawa, pasawa nay ame na mga dlaga naan ta inyo na mga mama. Sawaen nay man inyo na mga dlaga. Unti kay mag-istar na magtingeb ki kyo ta inyo na banwa daw kiten tanan isya nang na nasyon. 17 Piro, daw dili kaw mapati ki kami na magpabuat kaw ta tanda naan ta inyo na lawa, mangen nay ame na utod na bai daw malin kay di.”

18 Danen an Hamor daw Siquem nalipay parti ta ambal ya ta mga bata Jacob. 19 Gatuman dayon Siquem an ta ambal ya ta mga bata Jacob tenged ta bakod din na liag ki Dina. Naan ta bilog na pamilya ta amay din kanen gid pataod an. 20 Pag-uli Hamor daw Siquem, tanan na mga mama na kasimanwa danen patipon danen naan ta gangaan ta padir na galibot ta iran na banwa. Ambal danen naan ta iran na mga kasimanwa, 21 “Danen Jacob miad ki kami. Tugutan ta danen an na mag-istar daw magnigusyo unti tak lapad pa ate na lugar. Pwidi ta sawaen iran na mga dlaga daw sawaen man danen ate na mga dlaga. 22 Daw kiten tanan magbuat ta tanda naan ta ate na lawa paryo ki danen Jacob, mag-istar danen an di aged mag-isya ki nang ta nasyon. 23 Daw ipasawa ta ate na mga dlaga ki danen daw iran man na mga dlaga pasawa man danen ki kiten, ate man en iran na mga baka, ayep daw mga pagkabetang. Gani, magpabuat ki ta tanda naan ta ate na lawa aged unti danen mistar na tingeb ki kiten.”

24 Tanan na mga mama naan ta banwa na Siquem gapati ta ambal danen Hamor daw Siquem daw gapabuat ta tanda naan ta iran na lawa.

25 Ta pangallo na adlaw na nabatyagan gid danen sikad sakit ta iran na nina tenged ta pagbuat ta tanda naan ta iran na lawa, giling ta banwa na Siquem darwa na bata Jacob na danen Simeon daw Levi na mga utod gid Dina ta inay. Ula nalam mga ittaw naan ta Siquem na malain plano Simeon daw Levi. Gadala danen an Simeon ta ispada daw papatay danen tanan na mga mama naan ta Siquem. 26 Hamor daw Siquem papatay man danen paagi ta ispada. Pakamang danen Dina an naan ta balay Siquem daw gapanaw danen an muli. 27 Pagpanaw Simeon daw Levi, giling duma na mga bata Jacob naan ta banwa na Siquem daw nakita danen dya tanan na mga mama na napatay en. Pakamang danen tanan na mga pagkabetang naan ta banwa tak gabales danen ta iran na utod na papagayyaan. 28 Pakamang danen mga kanding, karniro, baka, asno daw bisan ino na mga pagkabetang naan ta banwa daw naan ta uma. 29 Pakamang danen tanan na mga manggad daw ino man na nakita danen naan ta mga balay. Tanan na mga bata daw mga bai na sawa ta mga ittaw na taga-Siquem padala danen muli na mga biag.

30 Na nlaman Jacob pabuat ta mga bata din, pabasol din danen Simeon daw Levi, “Paatagan a nyo ta bakod na prublima tak basi mga ittaw ta yi na lugar na mga Canaanen daw mga Pereznen mag-isip na kiten i sikad gid malain na mga ittaw tenged ta nabuat nyo naan ki danen Siquem. Tise ki nang ate. Daw magsapol danen na magsulong ki kiten, tanan ki asta mga ittaw na gaistar ta ate na balay mapatay tak tise ki nang.”

31 Sabat danen, “Dili pwidi na pabay-an nay nang malain na buat Siquem naan ta mangngod nay tak paparyo din nang ta bai na gabligya ta iya na lawa.”