Pagkitaay Jacob Daw Esau
33
Pag-alin Jacob ta Peniel, galutos kanen naan ta pamilya din. Nabantaw din Esau an daw kwattro sintos na mga ittawan Esau na mga mama na mugat ki danen. Pagrupo-grupo Jacob mga bata din naan ta iran na mga inay. Mga bata Lea naan ki Lea daw bata Raquel naan ki Raquel daw bata ta darwa din na suguon naan ki danen. 2 Paayos Jacob danen an para ta pagsugat ki Esau na naan ta una darwa na suguon daw iran na mga bata. Gasunod danen Lea daw iya na mga bata daw naan ta uryan Raquel daw bata din na Jose. 3 Jacob i naan ta unaan danen na munta ki Esau. Mintras na gaprani danen naan ta utod din, galuod kanen ta pitto bisis daw gademel naan ta basak na magtaod. 4 Piro, Esau an gadlagan na mugat ki Jacob. Patakes daw paarekan din Jacob an daw gagal danen na darwa. 5 Na nakita din mga sawa Jacob daw mga bata na gasunod ki Jacob, gainsa kanen an ki Jacob, “Kino mga duma no an?”Sabat Jacob, “Yi ake na mga bata na atag ta Dyos ki yaken na suguon no.”
6 Dayon prani darwa an na suguon daw iran na mga bata daw gademel na magtaod. 7 Sunod ki danen, gaprani man Lea daw iya na mga bata daw gademel danen an. Uryan na gaprani, danen Raquel daw Jose daw gademel man.
8 Gainsa Esau, “Ino beet ambalen ta tama ya gina na grupo ta mga ayep na nasugat ko?”
Sabat Jacob, “Pakabig ko na kaon yan ake na amo daw yon mga rigalo ko ki kaon aged miaran a no.”
9 Piro, ambal Esau, “Tong, tama en ake na mga pagkabetang. Imo nang nyan en.”
10 Ambal Jacob, “Daw miad nakem no ki yaken, batunon no ake an na rigalo ki kaon tak pagkita ko ki kaon, paryo ko man nakita waleng ta Dyos tenged pabaton a no na may kalipay. 11 Daw pwidi, batunon no nang en ake na mga rigalo na padala ko ki kaon tak paatag ta Dyos ki yaken tanan na mga kinanglanen ko.”
Tenged ta padayon na pagpangabay Jacob ki Esau na batunon iya an na mga atag, ta uryan pabaton Esau.
12 Ambal Esau, “Mos, manaw ki en. Yaken muna ki kyo para magtudlo ta inyo na agian.”
13 Piro, ambal Jacob, “Sir, nlaman no na derse pa mga bata ko daw mga ayep ko may mga bata man. Nadlek a daw padalien ko danen ta iran na pagpanaw, bisan ta isya nang na adlaw, basi mapatay tanan na mga ayep. 14 Daw pwidi, Sir, muna ka nang en ki kami. Munod kay nang ki kaon ta inay-inay tak dili pwidi manaw ta dasig mga ayep daw mga bata ko. Magkitaay ki nang naan ta lugar na Seir.”
15 Sabat Esau, “Sigi. Piro, ibilin ko ki kaon duma ko na mga ittawan.”
Sabat Jacob, “Sir, dili en kinanglan na ibilin no pa duma no na mga ittawan. Usto en ki yaken na gamiad ka ki yaken.”
16 Ta yon man na adlaw, gapanaw danen Esau na muli naan ta Seir. 17 Piro, danen Jacob gapanaw na miling naan ta banwa na Sucot. Pag-abot danen naan ta Sucot, gapatindeg danen ta iran na mga balay daw mga pasilungan man ta iran na mga ayep. Yon tenaan na banwa na naan dya pangaranan danen na Sucot.a
18 Paglambay ta pila na mga taon, galin danen ta Sucot daw gasalyo danen naan ta banwa na Siquem na naan man ta Canaan. Yon en sulat parti ki danen Jacob na galin ta Padan-aram daw guli naan ta Canaan na dayad iran na kaimtangan.
Pag-abot danen ta Siquem, gapatindeg danen ta iran na mga balay naan ta lugar na dani nang ta banwa. 19 Basak na patindegan danen ta iran na balay palit Jacob naan ta pamilya Hamor na amay Siquem ta isya gatos na sinsilyo ta iran na kwarta. 20 Naan dya gabuat Jacob ta alaran na bato daw pangaranan din na El-Elohe-Israel.b