3 Ta pagpanaw danen Jacob, pasugo din iya an na mga suguon na muna ki kanen miling ki Esau na utod din na naan ta lugar na Seir. Lugar ya na Seir paumaw man na Edom. 4 Patudluan Jacob mga suguon din daw ino iran na ambalen ki Esau. Ambal din, “Ambalen nyo ki Esau na amo ko na yaken i na suguon din lugay aren gatinir naan iran Laban daw anduni a nang kauli. 5 Tama en ake na baka, asno, kanding, karniro daw mga suguon. Ambalen nyo man na pasugo ko kyo yan na mga suguon ko na sugiran kanen parti ki yaken aged miaran a din.”

6 Pagbalik ta mga suguon Jacob naan ki kanen, ambal danen, “Naan kay alin ki Esau na utod no. Kanen ya miling di na mugat ki kaon daw duma din kwattro sintos na mama.”

7 Pagmati Jacob ta ambal ta iya na mga suguon, nakulbaan kanen an daw gapalibeg gid. Patenga din ta darwa grupo mga duma din asta mga karniro, kanding, baka daw kamilyo. 8 Pabelag din darwa an na grupo tak naan ta isip din na daw magsulong gid man Esau ki danen, isya na grupo malibri.

9 Gapangamuyo Jacob an, “O Dyos ta ake na lolo na Abraham daw ake na amay na Isaac, kaon na GINUO na gambal kan-o ki yaken na muli a ta ame na parinti naan ta lugar nay daw miad ka gid ki yaken, yi ake na pangamuyo ki kaon. 10 Bisan kebes a nang na suguon no, ula ka nalipat ta pangako no daw naluoy ka ki yaken. Na galakted a kan-o ta Suba Jordan munta ta Padan-aram, dala ko nang sungkod. Piro, anduni ta ake na pagbalik, tama gid ake na mga pagkabetang daw tama man mga ittaw na sakep ta ake na panimalay asta na pabuat ko danen an na darwa na grupo. 11 Gapangabay a ki kaon na daw pwidi nang, luwasen no kami i tak nadlek a na basi patayen kay tanan ta utod ko na Esau asta mga sawa daw mga bata ko. 12 Ambal no gid kan-o ki yaken na ubayan a no daw patamaen mga linai ko paryo ta katama ta pantad naan ta baybay na dili mabilang.”

13 Na kilem en, danen an Jacob gatunuga naan ta lugar na naan dya pabelag din iya an na mga duma ta darwa na grupo. Sunod na adlaw, gapili Jacob i ta mga ayep na iatag din ki Esau. 14 Yi mga rigalo din: dos sintos na kanding na bai, binti na kanding na mama, dos sintos na karniro na bai, binti na karniro na mama, 15 trinta na kamilyo na mga gatasan daw iran na mga bata, kwarinta na baka na bai, sampulo na baka na mama, binti na asno na bai daw sampulo na asno na mama. 16 Kada klasi ta ayep pagrupo-grupo din daw paintriga naan ta mga suguon. Gasugo kanen ta mga suguon din, “Muna kaw ki kami na miling ki Esau. Manaw kaw nang na magsunod-sunuray. Kada grupo ta ayep kinanglan may distansya naan ta unaan daw uryan naan ki danen.”

17 Suguon na naan ta una na grupo ta mga ayep patudluan Jacob daw ino ambalen din ki Esau. Ambal Jacob ki kanen, “Daw magsugatay kaw daw Esau, basi insaan ka din ta iling ti: Kino amo no? Indi ka punta? Iya ti na mga ayep dala no i? 18 Sabaten no Esau an na yaken Jacob na iya na suguon gapadala ta yi na mga ayep na iatag ki kanen. Yaken munod nang na miling ki kanen.”

19 Yon man gyapon ambal Jacob naan ta tanan din na mga suguon na gadala ta mga ayep para iatag ki Esau. 20 Ambal pa Jacob naan ta mga suguon din, “Dili nyo lipatan na ambalen ki Esau na munod a nang ki kyo.” Iling tan pagpadala Jacob ta mga rigalo ki Esau tak naan ta iya na isip na basi makamang gilek Esau ki kanen paagi ta mga rigalo. Naan man ta isip din na daw magkitaay danen, magmiad Esau ki kanen. 21 Pauna Jacob mga rigalo daw gapabilin kanen ta isya kilem naan ta yon man na lugar na patunugaan danen.

22 Na kilem en, pauna Jacob darwa din na sawa, darwa din na suguon na bai daw unsi din na bata na maglakted ta Suba Jaboc. 23 Papadala man Jacob tanan na mga pagkabetang danen naan ta liyo ta suba. 24 Piro, gapabilin Jacob na kanen nang naan ta liyo ta suba na alinan danen. May giling dya na mama daw padumog din Jacob asta ta pagsennang ta adlaw. 25 Na nlaman ta mama na dili din mapirdi Jacob an, paibitan din blat-ang Jacob daw nasuplo gid mintras gadumugay danen an. 26 Ambal ta mama, “Buy-an a no tak adlaw en.”

Ambal Jacob, “Dili ta kaw buy-an mintras dili a no bindisyunan.”

27 Gainsa mama an, “Ino ngaran no?”

Sabat din, “Jacob.”

28 Ambal ta mama, “Dili ka en umawen na Jacob tak ngaran no an en Israel^b tenged gabatok ka ta Dyos daw ta mga ittaw man daw kaon yan kadaag.”

29 Ambal Jacob, “Daw pwidi nang, sugiran a no ta ngaran no.”

Piro, sabat ta mama an, “Man-o tak gainsa ka ta ngaran ko?” Ula pasugid ta mama ngaran din, piro pabindisyunan din Jacob an naan ta lugar na padumugan danen.

30 Lugar ya na padumugan danen pangaranan Jacob na Peniel^c daw ambal din, “Gatubangay kay daw Dyos daw bui a man gyapon!”

31 Na gasennang en adlaw an, galin Jacob i naan ta Peniel na gapiang-piang tenged ta blat-ang din na nasuplo. 32 Yon tenaan na asta anduni mga Israelinen^d ula gakaan ta sapo ta blat-ang ta mga ayep tak yon man na parti ta lawa Jacob na paibitan ta mama na gadumog ki kanen.