3 Ambal ta GINUO ki Jacob, “Muli ka naan lugar ta amay no daw mga parinti no. Yaken mag-ubay ki kaon.”

4 Yon na gabot adlaw na papaumaw Jacob danen ya Lea daw Raquel na miling naan ta alaban na naan kanen dya gabantay ta mga karniro daw mga kanding. 5 Ambal din ki danen, “Nabatyagan ko na lain en pagtratar ta amay nyo ki yaken. Dili en dayad paryas kan-o. Piro bisan iling tan iya na pagtratar, tawway nakem ko tak Dyos na pasirbian ta ake na amay pirmi gaubay ki yaken. 6 Nlaman nyo na gaeged a gid ta pagsirbi ta inyo na amay. 7 Piro, pirmi a din paluko tak sampulo bisis na paisab din ake na suol. Piro, ula gid gatugot Dyos an na samaren nang ta amay nyo ake na pangabuian. 8 Na gambal kan-o amay nyo ki yaken na tagan a din ta mga puntok-puntok na karniro daw kanding para suol ko, tanan na mga ayep gabata ta puntok-puntok. Na gambal kanen na tagan a din ta mga samay-samay na karniro daw kanding, tanan na mga ayep gabata ta samay-samay. 9 Ta iling tan na paagi pakamang ta Dyos mga ayep ta amay nyo daw paatag din ki yaken. 10 Ta timpo kan-o ta pagsawaay ta mga ayep, gadagammo a daw nakita ko naan ta ake na dagammo na mga kanding na mama na gasawa ubos samay-samay, puntok-puntok daw kambang-kambang. 11 Naan ta dagammo ko, angil ta Dyos gaumaw ta ngaran ko daw gasabat a ki kanen, ‘Ngaran sa?’ 12 Ambal din, ‘Lagen no mga kanding na mama na gasawa. Tanan danen samay-samay, puntok-puntok daw kambang-kambang. Iling tan pagbeet ta Dyos aged magtama mga ayep no na kambang-kambang daw samay-samay tak nlaman din tanan na mga malain na buat Laban naan ki kaon.’ 13 Gaambal an ki yaken naan ta dagammo ko, pasugiran a din man, ‘Yaken Dyos na gapakita kan-o ki kaon naan ta Betel na lugar na naan dya gapatindeg ka ta bato bilang pangdemdem daw pabubuan no ta lana ta olibo. Naan man dya gapangako ka ki yaken. Anduni malin ka ta lugar na i daw muli naan ta lugar na Canaan na naan ka dya natao.’”

14 Pagtapos ta ambal Jacob parti ta iya na dagammo, sabat Raquel daw Lea, “Sigi malin ki di tak ula kay man en panublien na alin ta ame na amay. 15 Pagtratar ta amay nay ki kami paryas dili iya na mga bata. Pabligya kay din daw naubos din en bayad ya ki kanen. 16 Tanan na mga ayep daw manggad na nakamang ta Dyos ki kanen ame en daw iya man ta ate na mga bata. Bisan ino ambal ta Dyos ki kaon, tumanen no.”

17 Yon tenaan na gapriparar danen an Jacob na manaw daw pasakay Jacob iya na mga sawa daw mga bata naan ta mga kamilyo. 18 Padala din tanan na sinagod na mga ayep na ulas din ta iya na sirbisyo na kanen an naan ta Padan-aram. Gapanaw danen an Jacob munta ta Canaan naan ta lugar Isaac na amay din.

19 Na galin danen Jacob, ula dya Laban ya tak giling naan ta mga karniro din aged dumalaan mga ittaw an na gagunting ta belbel ta iya na mga karniro. Piro, bag-o gapanaw danen an Jacob, pakamang Raquel daw padala mga dyos-dyusan ya ta amay din.

20 Iling tan, Laban na Arameanen pawaisan Jacob tenged danen an Jacob galin na ula galisinsya ki Laban. 21 Galayas danen an na padala tanan na mga pagkabetang danen. Galakted danen ta Suba Eufrates daw gapadayon danen ta pagpanaw na munta ta kabungyuran naan ta lugar na Galaad.

22 Paglambay ta tallo na adlaw alin ta pag-alin danen Jacob, may gasugid ki Laban na galayas danen ya Jacob. 23 Na namatian Laban, pakuyog din mga parinti din daw palagas danen ya Jacob. Ta pangpitto na adlaw ta paglagas, dani nang en malambot Laban danen ya Jacob naan ta kabungyuran ta Galaad. 24 Piro, ta yon man na kilem bag-o Laban kalambot ki danen Jacob, gapakita Dyos ki Laban naan ta dagammo daw ambal din, “Mamati ka. Dili ka magbuat ta malain ki Jacob ta maski ino na paagi.”

25 Danen ya Jacob nalambot Laban naan ta kabungyuran ta Galaad tenged naan dya danen Jacob gatukod ta iran na mga balay na turda. Pag-abot danen Laban, naan man dya ta kabungyuran gatukod danen ta iran na mga balay na turda. 26 Pagkitaay Jacob daw Laban, gainsa Laban, “Man-o tak paluko a no? Galin kaw na ula gapalam ki yaken daw padala no mga bata ko na paryo ta mga biag. 27 Man-o tak galin kaw ta sikrito nang? Dapat gapalam ka ki yaken aged bag-o kaw malin, magdispidida ki inta daw mangalipay na may mga gakanta, gatugtog ta tambol daw gakuskos ta arpa. 28 Man-o tak ula a no paareka naan ta mga bata ko daw mga apo? Nakasala ka tak ula ka gataod ki yaken na ugwangan no. 29 Tenged ta buat no ki yaken, may matareng a na magbuat ta malain ki kaon. Piro, kabii kilem, Dyos ta imo na amay gambal ki yaken na dili a magbuat ta maski ino na malain ki kaon. 30 Naintindian ko na galin ka tak nidlaw ka gid ta ginikanan no. Piro, man-o tak patakaw no pa ake na mga dyos-dyusan?”

31 Sabat Jacob, “Ula a gapalam tak nadlek a na basi pwirsaen no na kamangen mga sawa ko. 32 Piro, parti ta imo na mga dyos-dyusan na narwad, ngitaen no daw kamangen. Bisan kino na gakamang ta mga dyos-dyusan no, patayen no unti naan ta tubangan ta ate na mga parinti.” Na gambal Jacob ta iling tan, ula kanen nalam na Raquel gakamang ta mga dyos-dyusan Laban.

33 Gaselled Laban naan ta mga balay na turda Jacob, ta turda man Lea daw ta turda ta darwa na suguon na bai aged ngitaen mga dyos-dyusan din. Piro, ula din nakita. Paggwa din ta balay na turda Lea, gaselled kanen an naan ta balay na turda Raquel. 34 Piro, bag-o gangita Laban naan ta balay na turda Raquel, pakamang en Raquel mga dyos-dyusan ya naan ta pataguan din daw patago din isab naan ta blusa ta pungkuan para ta pagsakay ta kamilyo daw naan dya gapungko kanen an. Yon na ula nakita Laban mga dyos-dyusan ya. 35 Ambal Raquel ta amay din, “Tay, dili ka nang magilek ki yaken na ula a gatindeg naan ta tubangan no na magtaod ki kaon. Dili a makatindeg tak gabot ake na pamulanen.” Yon na bisan indi gangita Laban an, ula din gid nakita mga dyos-dyusan din ya.

36 Gagilek gid Jacob ki Laban daw pabasol din, “Man-o tak gagilek ka ki yaken daw palagas a no man? Ino sala ko ki kaon na paakusaran a no? 37 Na pausisa no gid ta usto tanan ko na mga betang, ino nakita no dya na imo na betang? Daw may anen na imo na betang, dleen no unti naan ta tubangan ta ate na mga parinti aged mlaman danen daw kino ki kiten may sala. 38 Ta binti na taon na gaubra a ki kaon, ula nal-asi mga karniro daw mga kanding no na bai daw ula ko man paiyaw mga karniro no na mama. 39 Na may mga karniro daw mga kanding ka na natekeb ta ila na mga ayep, ula ko padala ki kaon tak pasilian ko nang ta mga ayep ko aged dili ka malugi. Na may mga ayep ka na natakaw adlaw man o kilem, papabayaran no pa ki yaken. 40 Iling ti ake na kaimtangan na gabantay a ta imo na mga ayep. Daw adlaw, pagwanta ko sikad sakit na dangga ta adlaw. Daw kilem, pagwanta ko man tignaw daw dili a man katunuga ta usto. 41 Ta tanan na mga taon na gaubra a ki kaon, naagian ko tanan na mga kabellay. Gasirbi a ki kaon ta katursi na taon para masawa ko mga bata no daw gasirbi a ta annem pa na taon para ta mga karniro daw mga kanding na paatag no ki yaken. Sampulo gid bisis na paisab-isab no ake na suol. 42 Miad tak paubayan a ta Dyos na pasirbian ta lolo ko na Abraham daw pasimba ta amay ko na Isaac. Daw ula taan kanen an gaubay ki yaken, paalinen a no nang na ula a gid may padala na mga pagkabetang. Ake na mga kabellay daw ake na pag-eged ta pag-ubra nakita ta Dyos daw yon na pasaway ka din kabii kilem.”

43 Pag-ambal Jacob, pasabat Laban ki kanen, “Yi na mga bai na sawa no mga bata ko daw inyo an na mga bata mga apo ko. Imo na mga karniro daw mga kanding alin ta ake na mga ayep daw tanan na mga nakita no alin ki yaken. Piro, ula a may mabuat tak dili pwidi kamangen ko ake na mga bata daw mga apo ki kaon. 44 Anduni, magbuat ki ta kasugtanan aged may pamatuod ki na tumanen ta ate na mga ambalen.”

45 Yon na gakamang Jacob i ta bato daw patindeg din bato an bilang pangdemdem ta iran na kasugtanan. 46 Pasugo Jacob mga parinti din na magtipon ta mga bato. Gatipon danen an ta mga bato daw patumpok. Gakaan danen naan tengnged ta tinumpok na mga bato. 47 Tinumpok an na mga bato pangaranan Laban na Jegar Sahaduta. Piro, pangaranan Jacob na Galeed.^a

48 Ambal Laban, “Yi na tinumpok na mga bato tanda na magpademdem ki kiten ta ate na kasugtanan.” Yon tenaan na paumaw ta mga ittaw lugar ya na Galeed. 49 Ambal pa Laban, “Kabay pa na daw magbelagay ki na muli ta ate na mga lugar, GINUO an magbantay ki kiten na tumanen ta gid ate na kasugtanan.” Yon na pangaranan din bato na patindeg na Mizpa.^b 50 Ambal pa Laban, “Daw sakiten no ake na mga bata na bai daw mangasawa ka isab ta duma na bai, bisan ula ittaw na magsugid ki yaken, demdemen no na Dyos kakita daw gabantay daw ino mga pabuat ta.”

51 Ambal Laban ki Jacob, “Lagen no yi na bato na patindeg daw mga bato na patumpok para magpademdem ki kiten. 52 Yi na tinumpok na mga bato daw bato na patindeg tanda na dili a maglakted miling ki kaon daw dili ka man maglakted miling ki yaken aged magbuat ta malain. 53 Daw magbuat ki ta malain, Dyos ta lolo no na Abraham daw Dyos ta ake na lolo na Nahor daw ta iran na amay, kanen magsintinsya ki kiten.”

Pagtapos ta iran na pag-isturyaay, gapangako Jacob an na tumanen din kasugtanan danen. Ta iya na pagpangako, gasumpa kanen an paagi ta pagsambit ta ngaran ta Dyos na pasimba ta iya na amay na Isaac. 54 Na naan danen pa ta kabungyuran, gaiyaw Jacob ta ayep daw pasunog din bilang alad naan ta Dyos. Paumaw din iya na mga parinti na maan daw naan danen dya kadlaw.

55 Sunod na adlaw sellem pa, danen Laban gapriparar na manaw. Paarekan din darwa din na bata na bai daw mga apo din. Gapangamuyo kanen na tagan danen an ta Dyos ta mga kaayaran daw gapanaw danen Laban na muli.