3 Ambal Raquel ki Jacob, “Yi ake na suguon na Bilha. Magdulog ka ki kanen aged magbata kanen daw kabigen ko na ake na bata.”

4 Pagtapos ta iran na isturya, paatag Raquel suguon din an ki Jacob daw padulog Jacob. 5 Gabagnes Bilha an daw gabata ta mama ki Jacob. 6 Ambal Raquel, “Dyos an naan gakampi ki yaken. Namatian din ake na pangamuyo daw paatagan a din ta bata.” Yon na pangaranan din iya na bata na Dan.^a

7 Gabagnes isab Bilha an daw gabata ta pangarwa din na bata na mama ki Jacob. 8 Ambal Raquel, “Gakuntraay kay gid daw ake na magulang daw nasito ko kanen an.” Yon na pangaranan din bata an na Neftali.^b

9 Na nlaman Lea na gauntat iya na minata, paatag din man suguon din na Zilpa ki Jacob aged dulugan Jacob bilang sawa. 10 Gabagnes Zilpa an daw gabata kanen ta mama ki Jacob. 11 Ambal Lea, “Mas miad Dyos an ki yaken kaysa ta utod ko.” Yon na pangaranan din bata din an na Gad.^c

12 Zilpa an na suguon Lea gabata isab ta pangarwa din na bata na mama ki Jacob. 13 Ambal Lea, “Nalipay a gid. Mga bai mambal na yaken malipayen na ittaw tenged ta ake na mga bata.” Yon na pangaranan din bata din an na Aser.^d

14 Ta timpo ta ani ta trigo, Ruben an na bata Lea giling naan ta uma daw kakita kanen ta tanem na mandragura.^e Pakamang din daw padala naan ta inay din. Na nakita Raquel na bata an Lea may mandragura, ambal din ki Lea, “Daw pwidi nang, tagan a no tuo ta mandragura na dala ta bata no.”

15 Piro, sabat Lea, “Dili ka pa kuntinto na paagaw no sawa ko an? Anduni, kamangen no man mandragura ta bata ko?”

Ambal Raquel, “Daw atag no ki yaken mandragura ta bata no, pwidi ka magdulog kani ki Jacob.”

16 Na mapon en, gabot Jacob alin ta uma. Gasugat Lea ki kanen daw gambal, “Yi na kilem, naan ka ki yaken magdulog tak pabalyo ko para ki kaon mandragura an ta bata ko.” Yon na gadulog Jacob an ki Lea ta kilem ta yon man na adlaw.

17 Namatian ta Dyos daw pasabat pangamuyo an Lea. Gabagnes Lea an daw gabata ta panglimma na bata na mama ki Jacob. 18 Ambal Lea, “Paatagan a ta Dyos ta dayad na bales tak paatag ko ake na suguon naan ta sawa ko.” Yon na pangaranan din iya na bata na Isacar.^f

19 Gabagnes isab Lea an daw gabata ta pang-annem na bata na mama ki Jacob. 20 Ambal din, “Dyos gaatag ki yaken ta dayad na rigalo. Anduni, may ipabugal en sawa ko parti ki yaken tak kabata a ta annem na mama.” Yon na pangaranan din bata din na Zabulon.^g

21 Gabata Lea an ta bai daw pangaranan din na Dina.

22 Piro, Raquel an ula nalipatan ta Dyos daw pasabat din pangamuyo Raquel. Yon na sarang en makabata Raquel an. 23 Gabagnes kanen an daw gabata ta mama daw ambal din, “Pakamang en ta Dyos ake na kagayyaan na dili a makabata.” 24 Pangaranan din na Jose^h iya na bata tak ambal din, “Kabay pa na GINUO mag-atag ta isya pa na bata ki yaken.”

25 Na natao Jose, ambal Jacob ki Laban, “Tugutan a no en na muli ta ake na lugar na alinan ko. 26 Pakuyugon no ki yaken mga sawa ko an daw mga bata ko tak gasirbi a ki kaon para ki danen. Nlaman no man na gaeged a gid ta pagsirbi ki kaon.”

27 Piro, sabat Laban, “Daw pwidi, may ambalen a ki kaon. Dili kaw malin ki yaken tak nakita ko gid na ake na pangabui pauswag ta GINUO tenged ki kaon. 28 Ambalen no daw pila liag no na iswildo ko ki kaon tak iatag ko.”

29 Sabat Jacob, “Nlaman no na dayad pagsirbi ko ki kaon daw gatama mga ayep no tenged ta ake na pag-asikaso. 30 Daw nademdeman no, kan-o na bag-o a nang pa gabot di tise nang mga pagkabetang no. Piro anduni, tama en tak paatagan ka ta GINUO ta tama na mga kaayaran paagi ta mga ubra ko. Piro anduni, ake eman na pamilya asikasuon ko.”

31 Sabat Laban, “Ino gusto no na iatag ko ki kaon?”

Sabat Jacob, “Dili en kinanglan na mag-atag ka pa ki yaken. Piro, daw gusto no na dayunon ko pag-asikaso ta mga karniro daw mga kanding no, 32 tugutan a no na miling naan ta imo na mga karniro daw mga kanding daw pilien ko tanan na mga karniro daw mga kanding kambang-kambang man o puntok-puntok, daw mga bata pa na karniro na kulor ta iran na belbel sikad luto.ⁱ Yon nang en ake na suol. Piro, imo nang en duma an na mga karniro daw kanding 33 para mlaman no dayon daw ganakaw a ta mga ayep no. Ta uryan na adlaw, daw usisaen no mga ayep ko daw makita no na naan ki yaken kanding na dili kambang-kambang daw karniro na puti, nlaman no na patakaw ko mga ayep no an.”

34 Ambal Laban, “Miag a na buaten ta paryo an ta ambal no.” 35 Piro, ta yon man na adlaw, tanan din na mga kanding daw mga karniro kambang-kambang man o puntok-puntok, daw mga bata pa na karniro na kulor ta iran na belbel sikad luto pabelag din ta duma din na mga karniro daw mga kanding daw paatag din naan ta iya na mga bata na mama aged danen bala mag-asikaso. 36 Kanen daw iya na mga bata, papadala danen mga ayep na pabelag din naan ta madyo na daw panawen, tallo adlaw. Piro, Jacob an a nabilin na gaasikaso ta nabilin na mga ayep Laban.^j

37 Gakamang Jacob i ta sanga ta tallo klasi na kaoy na alamo, almendra daw platano. Papanitan din duma na parti ta mga sanga para makita puti an aged daw lagen mga sanga an gakambang-kambang. 38 Pabetang din mga sanga naan ta ineman ta mga ayep aged daw minem danen, makita danen mga gakambang-kambang na sanga. Ta uras na gainem mga ayep an, gasawaay man danen an. Gani, naan tubangan ta mga sanga na gakambang-kambang gasawaay mga ayep an. 39 Tenged na gasawaay mga ayep naan ta tubangan ta mga sanga, gabata danen ta mga samay-samay, kambang-kambang daw puntok-puntok. 40 Mga kambang-kambang na bata ta mga kanding daw karniro, pabelag Jacob ta duma na mga kanding daw karniro na dili kambang-kambang na iya Laban. Ta uras ta pagsawaay ta mga ayep, mga ayep an Laban na dili kambang-kambang patubang Jacob naan ta mga karniro daw kanding na kambang-kambang daw ta mga karniro na kulor ta belbel sikad luto aged may mga karniro daw kanding Laban na magbata ta mga kambang-kambang daw may mga karniro na magbata ta mga may belbel na sikad luto na kulor. Ta iling tan na paagi Jacob an may ayep na iya en tak may karniro daw kanding na kambang-kambang daw may karniro man na kulor ta belbel sikad luto. Pabelag Jacob iya an na mga ayep alin ta mga ayep Laban. 41 Na gasawaay mga tambek na ayep, pabetang Jacob mga sanga na gakambang-kambang naan dani ta waig na ineman danen. 42 Piro, na gasawaay mga niwang na ayep na iya Laban, ula din pabetangi ta mga sanga naan ta dani ta ineman danen. Ta iling tan na paagi mga ayep na niwang iya Laban, piro mga ayep na tambek iya Jacob. 43 Yon tenaan na gamanggaranen gid en Jacob an. Gatama iya na mga karniro, kanding, kamilyo, asno daw mga suguon.