Pag-abot Jacob Naan Ta Balay Laban
29
Jacob an gapadayon ta pagpanaw asta kabot kanen ta lugar na naan dapit ta sennangngan na lugar ta mga parinti ta inay din. 2 Pag-abot din dya, nakita din isya na bubon na naan ta kaumaan daw takleb an naan ta baba ta bubon bakod na bato. May tallo na grupo ta mga karniro na galuko naan ta dani ta bubon tak gatagad na painemen ta waig. 3 Iling ti kaugalian ta mga ittaw na naan dya gaistar. Kada adlaw, kinanglan na tanan na mga grupo ta mga karniro magtipon anay naan ta bubon bag-o kamangen ta manugbantay bato ya na takleb ta bubon daw painemen mga karniro an. Daw tapos en mga karniro ta inem, takleban isab danen ta bato baba ta bubon.4 Pagkita Jacob ta mga manugbantay na gatagad dya, ginsa kanen ki danen, “Dey, taga-indi kaw?”
Sabat danen, “Taga-Haran.”
5 Ginsa isab Jacob ki danen, “Kala nyo Laban na apo Nahor?”
Sabat danen, “Ee, kala nay.”
6 Ginsa pa gid Jacob an, “Kamusta kanen ya?”
Sabat danen, “Miad man. Nakita no bai an na gaprani di na gadala ta mga karniro? Kanen Raquel na bata Laban.”
7 Na nlaman Jacob na isya na bata Laban gaprani, ambal din ki danen, “Ugto-adlaw nang pa i. Dili pa uras ta pagtipon ta mga karniro na painemen daw pabaliken naan ta turil. Dayad daw painemen nyo nang anay inyo an na mga karniro daw pabaliken nyo naan ta alaban.”
8 Ambal danen, “Naan ta ame i na lugar kinanglan na tagaran anay asta magtipon tanan na mga grupo ta mga karniro. Daw tanan gatipon en, pwidi nay en kamangen bato an naan ta baba ta bubon daw painemen ame na mga karniro.”
9 Na gaisturyaay pa danen Jacob daw mga manugbantay, Raquel an gaprani ki danen na dala din mga karniro ta amay din tak kanen gabantay. 10 Jacob an, na nakita din Raquel na bata Laban na tiyo din daw mga karniro Laban, gaprani kanen naan ta bubon daw paligid bato an alin ta baba ta bubon. Papainem din mga karniro ta tiyo din. 11 Pagpainem din ta mga karniro, paarekan din Raquel an daw gagal kanen ta kalipay. 12 Pasugid din ki Raquel na kanen an gamangken ta amay Raquel tak kanen bata Rebeca na utod ta amay Raquel. Pagmati Raquel ta ambal Jacob, gadlagan kanen na muli daw gasugid naan ta iya na amay.
13 Pagmati Laban ta sugid Raquel parti ki Jacob na bata ta utod din, gadlagan kanen na mugat ki Jacob. Patakes din Jacob an daw paarekan. Padala din Jacob an naan ta balay danen daw naan dya pasugid Jacob tanan na mga natabo ki kanen. 14 Ambal Laban ki Jacob, “Kaon gid ake na gamangken.” Jacob an gatinir naan ta balay Laban ta isya bulan.
Pagpangasawa Jacob Ki Lea Daw Raquel
15 Paglambay ta isya bulan na Jacob an naan ta balay Laban, ambal Laban ki kanen, “Bisan magparinti ki, dili usto na magsirbi ka ki yaken na ula ka swildo. Mambal ka nang daw pila gusto no na iswildo ki kaon.”
16 Laban an may darwa na bata na bai. Ngaran ta magulang ya Lea daw mangngod ya Raquel. 17 Dayad lagen mata Lea. Piro, Raquel i a dayaw daw dayad kurti ta iya na lawa. 18 Tenged may liag Jacob an ki Raquel, ambal din ki Laban, “Daw pwidi, magsirbi a ki kaon ta pitto na taon aged sawaen ko Raquel an na bata no na kamangnguran.”
19 Ambal Laban, “Sigi, magsirbi ka di. Mas dayad daw kaon mangasawa ta ake na bata kaysa ta duma na mama.” 20 Yon na gasirbi Jacob ki Laban ta pitto na taon aged mangasawa kanen ki Raquel. Para ki Jacob ula nang lugay mga tinaon an ta iya na pagsirbi, paryas ta pila nang na adlaw tenged ta bakod din na liag ki Raquel.
21 Paglambay ta pitto na taon, ambal Jacob ki Laban, “Tapos en pitto taon na pagsirbi ko. Atag no en ki yaken bata no an aged sawaen ko.”
22 Gakumbira Laban i daw paimbitar din tanan na mga ittaw na naan gaistar ta lugar ya para ta kasal ta bata din. 23 Pagkilem, padala Laban ki Jacob panganay din na bata na Lea daw padulog Jacob. 24 Bag-o danen gasawaay, Laban an gaatag ki Lea ta suguon na ngaran din Zilpa.
25 Pagsellem, nakita Jacob na Lea pla pasawa an ki kanen. Gariklamo kanen ki Laban, “Man-o tak nabuat no iling an tan ki yaken? Gasirbi a ki kaon aged sawaen ko Raquel an. Man-o tak paluko a no?”
26 Ambal Laban, “Dili kaugalian naan ta ame i na lugar na muna mangngod an mangasawa kaysa ta magulang. 27 Magtagad ka anay ta isya na duminggo. Patapuson no anay pagsilibrar ta kasal no ki Lea. Daw tapos en, ipasawa ko ki kaon Raquel an. Piro, kinanglan na magsirbi ka isab ki yaken ta pitto pa na taon para ki kanen.”
28 Pasunod Jacob ambal an Laban daw gatagad kanen an asta natapos isya na duminggo ta pagsilibrar ta kasal din ki Lea. Pagtapos ta isya na duminggo, Raquel an papasawa Laban ki Jacob. 29 Laban an gaatag ki Raquel ta suguon na ngaran din Bilha. 30 Gadulog Jacob an ki Raquel. Mas palangga Jacob Raquel an kaysa ki Lea. Gasirbi isab Jacob an ki Laban ta pitto pa na taon para ki Raquel.
Mga Bata Jacob
31 Na nakita ta GINUO na Jacob an ula liag ki Lea, paatagan din Lea an ta bata. Piro, Raquel an a baog. 32 Lea an gabagnes daw gabata ta mama daw pangaranan din na Rubena tak ambal din, “Tenged nakita ta GINUO ake na kalised, paatagan a din ta bata. Anduni, sigurado aren en na palanggaen a ta sawa ko.”
33 Gabagnes isab Lea an daw gabata ta mama daw pangaranan din na Simeon.b Ambal Lea, “Tenged nlaman ta GINUO na dili a palangga Jacob, yon na paatagan a din isab ta bata.”
34 Gabagnes isab Lea daw gabata ta mama daw pangaranan din na Levic tak ambal din, “Sigurado a na anduni mulog gid en nakem ta sawa ko naan ki yaken tak paatagan ko kanen ta tallo na bata na mama.”
35 Gabagnes isab Lea an daw gabata ta mama daw pangaranan din na Judad tak ambal din, “Magdayaw a ta GINUO.”
Pagtapos ta pagbata Lea ta pang-appat din na bata, gauntat en iya na pagminata.