28
Pagtapos ta pagmati Isaac ta ambal Rebeca, paumaw din Jacob an daw pangamuyuan din daw paambalan din, “Dili ka mangasawa ta bai na Canaanen. 2 Manaw ka na miling ki Betuel na amay ta inay no naan ta Padan-aram daw mangasawa ka ta bata ta tiyo no na Laban. 3 Kabay pa na Dyos Na Makagagaem mag-atag ki kaon ta tanan na mga kaayaran daw patamaen din mga linai no daw danen an buaten din na bakod na nasyon na may tama na grupo ta mga linai. 4 Kabay pa na tumanen ta Dyos naan ki kaon daw imo na mga linai pangako din ya kan-o naan ta amay ko na Abraham aged maangken nyo yi na lugar na patiniran ta anduni na paatag kan-o ta Dyos ki Abraham.” 5 Pagtapos ta pangamuyo Isaac, dayon din papailing Jacob an naan ta Padan-aram naan ki Laban na utod ta inay Jacob daw Esau. Laban daw Rebeca isya nang ta amay na ngaran din Betuel na Arameanen.Pagpangasawa Isab Esau
6 Esau an, nlaman din na Jacob an pabindisyunan Isaac daw paambalan man na dili mangasawa ta bai na Canaanen daw papailing naan ta lugar na Padan-aram aged naan dya mangasawa. 7 Nlaman din man na Jacob ya gapati ta sugo ta ginikanan din daw gapanaw kanen na munta ta Padan-aram. 8 Tenged nlaman Esau na dili gusto ta iran na amay na sawa an danen mga bai na Canaanen, 9 giling kanen ta tiyo din na Ismael na bata Abraham daw nangasawa pa ta bata Ismael na ngaran din Mahalat na utod Nebayot.
Dagammo Jacob
10 Jacob an gapanaw alin ta banwa na Beerseba na munta ta banwa na Haran. 11 Pagsalep ta adlaw, kabot kanen ta isya na lugar daw naan dya kanen gapuay. Gakamang kanen ta bato na palunan din daw ganegga na manuga. 12 Gadagammo kanen na may isya na geddan na alin ta basak munta ta langit daw nakita din na gapanaik daw gapanaog mga angil ta Dyos. 13 Nakita din man na gatindeg GINUO an naan ta apaw ta geddan. Gambal GINUO an, “Yaken GINUO daw Dyos ta imo na alinan na kaapuan na Abraham daw yaken Dyos man ta amay no na Isaac. Lugar i na Canaan na anduni naan ka gatunuga iatag ko ki kaon daw ta imo na mga linai. 14 Patamaen ko imo na mga linai na paryo katama ta yab-ok ta basak na dili mabilang. Sakep ta inyo na lugar magwayang naan dapit ta salepan, sennangngan, nurti daw sur. Mga nasyon ta bilog na kalibutan tagan ko man ta mga kaayaran paagi ki kaon daw imo na mga linai. 15 Mamati ka. Yaken mag-ubay daw mag-amblig ki kaon bisan indi ka punta daw dleen ta kaw malik ta yi na lugar. Dili ta kaw dilian daw tumanen ko man ake na pangako ki kaon.”
16 Pagtapos ta ambal ta Dyos ki Jacob, gabugtaw Jacob an daw gambal, “Matuod gid, GINUO an naan ta yi na lugar daw ula a gid kabatyag.” 17 Nadlek Jacob an daw gatingala. Ambal din, “Yi na lugar makaadlek daw katingalaan tak Dyos an naan di gaistar daw naan di taan gangaan na munta ta langit.” 18 Sunod na adlaw, sellem pa gabangon Jacob an daw pakamang din bato an na palunan din daw patindeg din aged magpademdem ta tanan na mga ittaw na naan dya Dyos an gapakita ki kanen. Apaw an ta bato pabubuan din ta lana ta olibo bilang tanda na gataod kanen ta Dyos. 19 Yon na lugar na naan dya kanen gatunuga pangaranan din na Betel na beet ambalen Istaran Ta Dyos. Piro, ta yon man na timpo, banwa na dani ta Betel paumaw ta mga ittaw na Luz.
20 Gapangamuyo Jacob an daw gapangako naan ta Dyos na ambal din, “Ambligan a no daw ubayan ta ake na pagpanaw. Tagan a no ta ake na mga kinanglanen na pagkaan daw bayo. 21 Dleen a no malik naan ta balay ta amay ko na ula may malain na matabo. O GINUO, daw tanan na mga paayo ko anduni ki kaon iatag no ki yaken, gapangako a na ula duma daw dili, kaon nang Dyos na sirbian ko. 22 Yi na bato na patindeg ko magpademdem ta tanan na mga ittaw na anen ka di ta lugar na i daw dapat na simbaen ka danen. Ta tanan na mga betang na atag no ki yaken iatag ko ki kaon isya ta sampulo na parti.”