Sabat Esau, “Ngaran sa, Tay?”

2 Ambal Isaac, “Matian a no. Manakem aren en daw dali a nang en mapatay. 3 Kamangen no pana no an daw mga uwas daw miling ka naan ta kabalasan aged kamangan a no ta ayep. 4 Lutuan a no ta paburito ko na pagkaan aged kan-enen ko. Daw tapos a kaan, bindisyunan ko kaon yan na tagan ka ta Dyos ta tanan na mga kaayaran tak dali a nang en mapatay.”

5 Kamati Rebeca an ta isturya Isaac ki Esau. Pagpanaw Esau naan ta kabalasan, 6 Rebeca i gambal ki Jacob na bata din, “Kamati a gina ta ambal ta amay no naan ta magulang no na Esau. 7 Pasugo din na magpana Esau ta ayep daw lutuon din ta sabor na pagluto daw atag naan ta imo na amay aged kan-enen din. Daw tapos kanen kaan, bindisyunan din Esau na tagan ta GINUO ta tanan na mga kaayaran tak dali nang en mapatay amay no an.” 8 Ambal pa Rebeca ki Jacob, “Tong, patien no sugo ko. 9 Miling ka naan ta ate na kandingan daw mamang ka ta darwa buok na tambek daw bata pa aged lutuon ko ta sabor na pagluto na paburito ta imo na amay. 10 Daw luto en, dleen no naan ta amay no aged kan-enen din para bag-o kanen an mapatay kaon yan bindisyunan din na tagan ka ta Dyos ta tanan na mga kaayaran.”

11 Piro, ambal Jacob ki Rebeca, “Lagen a no. Dili a belbelen. Piro, Esau an a na utod ko belbelen gid. 12 Basi daw maibitan a ta amay ko, mlaman din na paluko ko nang kanen an. Imbis na mangamuyo amay ko an na tagan a ta Dyos ta mga kaayaran, mangamuyo kanen an na tagan a ta kaliseran.” 13 Ambal ta inay din, “Tong, dili ka magpalibeg. Daw pangamuyuan ka din na tagan ka ta kaliseran, ambalen ko na naan nang en ki yaken iatag. Patien a no. Mamang ka dya ta darwa buok na kanding na bata pa daw dleen no ki yaken.”

14 Pagmati Jacob ta ambal ta iya na inay, gapanaw kanen an daw gakamang ta darwa na kanding na bata pa daw paatag din naan ta iya na inay. Paluto ta inay din pagkaan na paburito ta amay din.

15 Rebeca an gaselled naan ta balay danen na turda daw gakamang ta dayad na bayo ta panganay din na bata na Esau daw paatag din bayo ya Esau naan ki Jacob na kamangnguran din na bata aged suuton. 16 Pablebed Rebeca langgit ta kanding naan blukan Jacob daw parti ta iya na lieg na ula belbel. 17 Paatag Rebeca ki Jacob linuto din na pagkaan daw tinapay.

18 Giling Jacob naan ta amay din daw gambal, “Tay.”

Ambal Isaac, “Kino ka na bata ko?”

19 Sabat Jacob, “Yaken bata no na Esau na panganay. Natuman ko en imo na sugo. Mangon ka daw kan-enen no linuto ko na karni ta ayep na nakamang ko aged bindisyunan a no na tagan a ta Dyos ta mga kaayaran.”

20 Piro, ambal Isaac ta bata din, “Tong, man-o tak ula ka nang lugay na gakamang ta ayep?”

Sabat Jacob, “GINUO na imo na Dyos gatabang ki yaken.”

21 Ambal Isaac ki Jacob, “Daw pwidi, marani ka di aged ikapen ko kaon yan para mlaman ko daw kaon gid matuod na bata ko na Esau.”

22 Gaprani dayon Jacob an ki Isaac na amay din. Jacob an paikap-ikap Isaac daw ambal din, “Imo an na kagi paryo kagi Jacob, piro imo an na blukan paryo blukan Esau.” 23 Jacob an ula nakala Isaac tak blukan Jacob belbelen man en paryo ta blukan Esau. Yon tenaan na Jacob an pabindisyunan Isaac na tagan kanen ta tanan na mga kaayaran.

24 Gainsa isab Isaac an, “Kaon gid bata ko na Esau?”

Sabat Jacob, “Ee, Tay.”

25 Ambal Isaac, “Sigi, dleen no di en ki yaken linuto na karni ta ayep na nakamang no aged kan-enen ko daw bindisyunan ta kaw.” Pag-ambal Isaac, padala Jacob karni an daw inemen naan ta iya na amay. Gakaan Isaac an daw gainem. 26 Na tapos en kaan Isaac, ambal din, “Marani ka ki yaken daw arekan a no.”

27 Gaprani Jacob naan ta iya na amay daw paarekan din. Napalimauan Isaac bayo an Esau na suot Jacob. Yon na nakamang pagdua-dua ya Isaac. Pabindisyunan din Jacob an na ambal din,

30 Na tapos en pagbindisyon Isaac ki Jacob, gapanaw en Jacob i na galin ki Isaac. Pag-alin nang Jacob, yon man a pag-uli Esau alin ta pagkamang ta ayep. 31 Esau an galuto man iya ta sabor na pagkaan daw padala din naan ta iya na amay. Ambal din, “Tay, mangon ka en daw kan-enen no linuto ko na karni ta ayep na nakamang ko aged bindisyunan a no.”

32 Ginsa amay din an ki kanen, “Kino ka?”

Sabat din, “Yaken Esau na panganay no na bata.”

33 Pagmati Isaac ta ambal Esau, gakereg gid Isaac an tenged nlaman din na paluko kanen an. Ginsa kanen an ki Esau, “Daw kaon Esau, kino ittaw ya gina na gakamang ta ayep daw gadala ki yaken ta linuto din na karni daw naubos ko ta kaan? Bag-o ka gabot, pabindisyunan ko pa man kanen ya daw dili ko en pwidi maisab ake na bindisyon. Kanen gid en tagan ta mga kaayaran.”

34 Na namatian Esau ambal ya ta iya na amay, sikad gid agal din na nasebean kanen an. Ambal din ta iya na amay, “Yaken man, Tay! Bindisyunan a no man na tagan a ta Dyos ta mga kaayaran.”

35 Piro, ambal Isaac, “Gina, giling ki yaken imo na mangngod daw naluko a din. Imbis na kaon yan pabindisyunan ko, mangngod no nabindisyunan ko ya.”

36 Ambal Esau, “Iya na ngaran na Jacob^a bagay gid ki kanen tak darwa en bisis paagawan a din ta pribiliyo na dapat inta ake. Pakamang din kan-o ake na mga pribiliyo bilang panganay daw anduni imbis na yaken pabindisyunan, kanen nabindisyunan no. Tay, ula ka gid en may nabilin na bindisyon para tagan a man ta Dyos ta mga kaayaran?”

37 Sabat Isaac, “Mamati ka. Nabindisyunan ko en Jacob ya na kanen magdumala ki kaon, tanan no na mga linai magsirbi ki kanen, daw tama iya na anien para ta iya na pagkaan daw inemen. Ino pa nabilin na maatag ko ki kaon?”

38 Gainsa eman Esau an naan ta iya na amay, “Tay, ula ka gid en may nabilin na bindisyon bisan isya nang? Bindisyunan a no tuo.”

Pag-ambal Esau, gagal isab kanen an ta tudo.

39 Sabat Isaac ki Esau,

41 Gaumpisa en Esau ta pagdemet ki Jacob tak Jacob an pabindisyunan ta iran na amay imbis na kanen. Ambal din ta iya na kaugalingen, “Ula bali tak dili maglugay kabui an ta ame na amay. Tapos ta ame na paglalaw parti ki kanen, patayen ko gid ake na mangngod na Jacob.”

42 Piro, nabalitaan Rebeca malain ya na plano Esau na panganay din na bata. Paumaw Rebeca mangngod ya na bata din na Jacob daw ambal din, “Imo na utod na Esau gaplano na patayen ka aged kabales kanen ki kaon. 43 Gani, tong, anduni patien no ake na sugo ki kaon. Miling ka ta ake na utod na Laban naan ta banwa na Haran. 44 Naan ka nang dya anay magtinir duma ki kanen asta na marwad gilek ta imo na utod. 45 Daw narwad en daw malipatan din en imo na sala, ipaumaw ta kaw dya daw paulien di. Dili ko kaya daw darwa ko na mga bata marwad ki yaken ta isya nang na adlaw.”

46 Pagtapos Rebeca ta isturya ki Jacob parti ta pag-iling Jacob naan ki Laban, gambal Rebeca ki Isaac, “Dili ko gid en maagwantaan mga sawa Esau na Hetanen. Daw mangasawa man Jacob ta dlaga na Hetanen, miad pa na mapatay a nang en.”