Isaac Naan Ta Gerar
26
May letem isab naan ta lugar na Canaan na lain man ta letem na naagian ta mga ittaw naan ta timpo Abraham. Yon na galin danen Isaac ta iran na lugar daw giling naan ta lugar na Gerar na padumalaan Abimelec na ari ta mga Filistinen. 2 Bag-o danen Isaac giling ta Gerar, GINUO an gapakita ki kanen daw gambal, “Dili ka miling ta lugar na Egipto. Naan ka mistar ta lugar na itudlo ko ki kaon. 3 Daw naan ka ta lugar na itudlo ko, yaken mag-ubay ki kaon daw tanan na mga kaayaran iatag ko man ki kaon. Lugar i na Canaan iatag ko ki kaon daw mga linai no aged tumanen ko ake na pangako ki Abraham na amay no. 4 Patamaen ko imo na mga linai paryo ta katama ta mga bituon naan ta langit daw iatag ko man ki danen bilog i na lugar. Paagi ta imo na mga linai, mga ittaw ta tanan na mga nasyon ta kalibutan tagan ko ta mga kaayaran 5 tak Abraham gatuman ta tanan na mga sugo daw tudlo ko na dapat tumanen ta mga ittaw.” 6 Pagtapos ta ambal ta Dyos ki Isaac, gasunod Isaac ta ambal ta Dyos daw gatinir kanen naan ta Gerar.7 Nakita ta mga mama naan ta Gerar na dayaw Rebeca an daw ginsa danen ki Isaac daw kino duma din na bai. Sabat Isaac, “Kanen utod ko.” Iling tan sabat Isaac tak nadlek kanen na magsugid ki danen na Rebeca an sawa din tenged naan ta iya na isip basi patayen kanen ta mga mama aged agawen Rebeca an.
8 Na danen Isaac daw Rebeca lugay en naan ta lugar na Gerar, may adlaw na Abimelec na ari ta Filistinen galuaw naan ta tumbuan daw nakita din danen Isaac daw Rebeca na gatakesay. 9 Yon na paumaw din Isaac an daw pasukna, “Rebeca an sawa no pla. Man-o tak ambal no na kanen an utod no?”
Sabat Isaac, “Nadlek a na daw mlaman nyo na kanen sawa ko, basi patayen a nyo.”
10 Ambal Abimelec, “Dili ka inta magbula ta iling tan ki kami. Daw isya na ittaw naan ta yi na lugar magdulog ta sawa no, makasala kay tenged ki kaon.” 11 Pag-ambal Abimelec ki Isaac, gamando kanen naan ta iya na mga sakepan na ambal din, “Sintinsyaan ta kamatayen bisan kino na magbuat ta malain ta yi na mama daw iya na sawa.”
12 Na gatinir pa Isaac naan ta lugar ta mga Filistinen, ganguma kanen an daw ta yon man na taon gaani kanen ta sikad tama tak pauswag ta GINUO iya na pangabui. 13 Gadugang pa gid mga manggad Isaac asta na gamanggaranen kanen ta usto. 14 Tama iya na mga karniro, mga kanding, mga baka daw tama gid iya na mga suguon. Yon tenaan na gainggit mga Filistinen ki kanen tak gamanggaranen kanen an. 15 Tenged nainggit mga Filistinen an, patampekan danen tanan ya na mga bubon na kinutkutan dati ta mga suguon Abraham na bui pa kanen ya.
16 Ambal Abimelec ki Isaac, “Malin kaw ta ame i na lugar tak kaon yan mas manggaranen kaysa ki kami.” 17 Tenged ta ambal Abimelec, galin danen Isaac daw gasalyo ta Patag Gerar daw lugay danen dya gatinir. 18 Pakutkot isab Isaac mga bubon ya Abraham na amay din tak na napatay amay din ya, mga bubon ya patampekan ta mga Filistinen. Pangaranan din man gyapon mga bubon ya ta dati na mga ngaran na paatag ta amay din. 19 Na gakutkot mga suguon Isaac ta bag-o na bubon naan ta patag, may nakita danen na tuburan. 20 Mga manugbantay ta mga ayep ta mga taga-Gerar daw mga manugbantay ta mga ayep Isaac gaguluay tak ambal ta mga taga-Gerar na iran bubon ya. Pangaranan Isaac bubon an na Eseka tak naan dya danen gaguluay. 21 Gakutkot isab danen Isaac ta isya pa na bubon daw gaguluay eman mga manugbantay ya tenged ta bubon an. Pangaranan Isaac bubon an na Sitna.b 22 Gasalyo isab danen Isaac naan ta isya pa na lugar daw gakutkot ta bubon. Piro, ula en may gakuntra ki danen parti ta bubon. Pangaranan Isaac bubon an na Rehobot.c Ambal Isaac, “GINUO an gaatag ta ligwa na para ki kiten naan ta yi na lugar daw pwidi en magdayad pa gid ate na pangabui.”
23 Alin ta Patag Gerar gasalyo danen Isaac naan ta banwa na Beerseba. 24 Naan ta kilem ta iran na pag-abot, gapakita GINUO an ki Isaac daw gambal, “Yaken Dyos ta imo na amay na Abraham. Dili ka madlek tak paubayan ta kaw daw iatag ko ki kaon tanan na mga kaayaran. Patamaen ko imo na mga linai tenged ta ake na pangako kan-o ki Abraham na gasirbi ki yaken.”
25 Na naan Isaac an gaistar ta Beerseba, gabuat kanen ta alaran na bato daw pasimba din GINUO an. Patukod danen mga balay na turda daw gakutkot isab mga suguon din ta bubon.
Kasugtanan Isaac Daw Abimelec
26 Na naan danen Isaac ta Beerseba, Ari Abimelec daw iya na mga duma Ahuzat na manugtugda din daw Picol na kumander ta iya na mga sundalo giling ki Isaac alin ta Gerar. 27 Isaac gambal ki danen, “Man-o tak giling kaw di ki yaken? Di' ba pademetan a nyo kan-o daw papaalin ta inyo na lugar?” 28 Sabat danen, “Nakita nay na matuod gid na GINUO an gaubay ki kaon. Gani, gusto nay na kiten i magbuat ta kasugtanan daw magpangako ki na 29 dili ki magbuat ta malain ta kada isya. Dili kay magbuat ta malain ki kaon daw dili ka man magbuat ta malain ki kami tak pag-alin nyo kan-o ta ame na lugar, dayad ame na pagtratar ki kyo daw ula kay man gabuat ta malain ki kyo. Nlaman nay na kaon yan paubayan ta GINUO.”
30 Gapriparar Isaac an ta tama na pagkaan daw gakaan daw gainem danen Isaac duma ki danen an Abimelec. 31 Sunod na adlaw, sellem pa danen Isaac daw Abimelec gabangon daw gapangako na tumanen danen iran na inambalan. Pagtapos ta iran na pagpangako, padul-ong Isaac danen an Abimelec naan ta unaan daw danen an Abimelec gapanaw na muli. Yon en na Abimelec daw Isaac gamiaray.
32 Ta yon man na adlaw, mga suguon Isaac giling ki kanen daw gasugid na may waig naan ta bubon na pakutkot danen. 33 Banwa na paistaran danen na may bubon pangaranan Isaac na Seba.d Asta anduni, yon na bubon pangaranan na Beerseba.
Mga Sawa Esau