5 Tanan na mga pagkabetang Abraham paatag din ki Isaac na bata din ki Sara. 6 Piro, bag-o mapatay Abraham ya, iya na mga bata na mama ta duma din na mga sawa, paatagan din man ta mga rigalo. Papaalin din danen an aged naan danen mag-istar madyo ki Isaac. Giling danen naan ta lugar naan dapit ta sennangngan.

7 Na gaidad Abraham ta sinto sitintay-singko na taon, 8 napatay kanen an na dayad daw lawig gid iya na kabui. Manakem gid en kanen an bag-o napatay. Palebbeng kanen an tingeb ta iya na mga kaapuan. 9 Mga bata din na Isaac daw Ismael gatabangay ta paglebbeng ki kanen naan ta kwiba naan ta Macpela na naan ta uma Efron na bata Zohar na Hetanen na naan dapit ta sennangngan ta Mamre. 10 Yon man uma na napalit Abraham naan ta mga Hetanen aged lebbengan Sara na sawa din. 11 Na napatay Abraham ya, Isaac an patabangan ta Dyos ta tanan din na mga buat daw gadayad iya na kabui paryo ta kabui Abraham ta pagtabang ta Dyos. Gaistar Isaac an naan ta lugar na Beer Lahai Roi.

12 Yi mga linai Ismael na bata Abraham daw Hagar na Egiptuanen na suguon Sara. 13 Panganay na bata din Nebayot. Sunod na mga bata din: Kedar, Adbeel, Mibsam, 14 Misma, Dumah, Massa, 15 Hadad, Tema, Jetur, Nafis daw Kedema. 16 Yon dusi na bata Ismael. Danen gadumala ta mga nasyon ta iran na mga linai na gaistar naan ta mga banwa daw ta mga lugar na patindegan ta iran na mga balay na turda. Ngaran ta iran na mga banwa daw lugar na patindegan ta iran na mga balay na turda paryo man ta iran na mga ngaran. 17 Na gaidad Ismael ta sinto trintay-syiti na taon, napatay kanen daw palebbeng tingeb ta iya na mga kaapuan. 18 Mga linai Ismael gaistar naan tengnga ta mga lugar na Havila daw Shur naan dapit ta sennangngan ta Egipto munta ta Assur. Naan danen gaistar tingeb ta iran na mga parinti.

19 Yi sulat parti ta mga linai Isaac na bata Abraham. 20 Na gaidad Isaac ta kwarinta na taon, nangasawa kanen ki Rebeca na bata Betuel na taga-Padan-aram. Rebeca an utod Laban. Danen Betuel daw Laban mga Arameanen.

21 Isaac an gapangamuyo naan ta GINUO para ki Rebeca na sawa din tak baog. Pasabat ta GINUO iya na pangamuyo daw gabagnes Rebeca an. 22 Nabatyagan Rebeca na gadas-egay mga bata na kapid na naan ta iya na gettek. Ambal Rebeca naan ta iya na kaugalingen, “Man-o tak iling ti natabo ki yaken?” Yon na gainsa kanen ta GINUO.

23 Gasabat GINUO ki kanen,

24 Na gabata Rebeca, bata din kapid paryo gid ta ambal ya ta GINUO. 25 Una gwa na bata minog langgit din an daw lawa din belbelen. Yon tenaan na pangaranan danen bata an na Esau.^a 26 Na gagwa mangngod na bata, iya na lima gaawid ta tudo naan ta kitin Esau. Yon tenaan na pangaranan bata an na Jacob.^b Idad Isaac sisinta na taon na natao iya na mga bata.

27 Na darko en kapid an, Esau sikad sagad magpana ta mga ila na ayep daw sigi nang kanen naan ta kabalasan. Piro, Jacob an a, beet na ittaw daw ula kanen an ilig na magpanaw-panaw. Nadayaran kanen na naan nang ta iran na balay na turda. 28 Esau an palangga gid Isaac tak gusto Isaac na pirmi nang kanen kakaan ta karni ta ila na mga ayep na nakamang Esau paagi ta pana. Piro, Jacob an a palangga Rebeca.

29 Isya na adlaw na Jacob an galaga ta minog na blatong, gabot Esau naan alin ta kabalasan daw naluyaan gid kanen an tak sikad letem. 30 Ambal Esau ki Jacob, “Daw pwidi, tagan a no ta minog na blatong na paluto no tak sikad a gid en nletem.” Yon tenaan na Esau an paumaw man na Edom.^c

31 Ambal Jacob, “Daw iatag no ki yaken imo na mga pribiliyo bilang panganay na bata, tagan ta kaw ta yi na pagkaan.”

32 Ambal Esau, “Sigi. Paryas aren mapatay ta kaletem. Daw mapatay a, ula man gyapon pulos ake na mga pribiliyo bilang panganay.”

33 Ambal Jacob, “Magpangako ka anay ki yaken bag-o ko iatag pagkaan i.”

Gapangako Esau an daw paatag din mga pribiliyo din bilang panganay naan ki Jacob. 34 Dayon atag Jacob ki Esau tinapay daw linaga na blatong. Gakaan Esau daw pagtapos din ta kaan, gapanaw kanen ya. Yon paagi na papakita Esau na pakabig din na ula pulos iya na mga pribiliyo bilang panganay.