5 Ambal ta suguon din, “Basi bai na mapili ko dili miag muyog ki yaken na miling ta lugar na i. Daw dili miag bai na miling di, ino buaten ko? Liag no dleen ko bata no malik naan ta Padan-aram na alinan no kan-o?”

6 Sabat Abraham, “Dili a gid miag. Dili no dleen bata ko dya 7 tak GINUO Dyos na naan ta langit gasugo kan-o ki yaken na malin a ta balay ta amay ko ta lugar na naan a dya natao. Kanen man gapangako ki yaken na iatag din yi na lugar na Canaan ki yaken daw ta ake na mga linai. Gani, manaw ka en tak nlaman ko na magpadala Dyos an ta angil na mag-una ki kaon aged tabangan ka ta pagpili ta sawaen ta ake na bata naan ta yon na lugar na Padan-aram. 8 Piro, daw dili miag bai ya na muyog ki kaon, ula ka sabaten naan ki yaken. Basta dili no dleen bata ko naan ta Padan-aram.” 9 Pagtapos ta ambal Abraham, pabetang ta suguon iya an na lima naan dalem ta paa Abraham na iya na amo daw gapangako kanen na tumanen din sugo ta iya na amo.

10 Gakamang suguon an ta sampulo na kamilyo na iya Abraham na amo din daw pakarga din mga klasi-klasi ta maalen na mga rigalo alin ki Abraham. Gapanaw kanen na munta ta banwa na istaran Nahor na utod Abraham naan ta lugar na Aram-Naharaim.^b Na gabot kanen an naan ta banwa na istaran ta pamilya Nahor, 11 mapon en daw uras na mga dlaga an magsandok naan ta bubon na naan gwa ta iran na banwa. Papuay ta suguon mga kamilyo an naan dani ta bubon.

12 Gapangamuyo suguon an, “GINUO, Dyos ta ake na amo, kabay pa na maluoy ka ta ake na amo daw tabangan a no ta ake na pagpangita ta sawaen ta bata din. 13 Anduni gatindeg a naan ta kilid ta bubon i daw mga dlaga an alin ta banwa gailing di en aged magsandok.” 14 Gapadayon suguon an ta iya na pangamuyo, “Iling ti buaten ko aged mlaman ko daw kino na dlaga na papili no para sawaen ta bata ta amo ko daw nlaman ko man na gasabat ka ta iya na pangamuyo. Magprani a naan ta isya na dlaga daw mag-ambal a ki kanen na iebes din anay iya na tibod daw painemen a din. Daw miag kanen na painemen a din asta ta mga kamilyo ko, yon en na dlaga na pinili no.”

15 Na gapangamuyo pa suguon an, gabot isya na dlaga alin ta banwa na gapas-an ta tibod. Ngaran din Rebeca na bata Betuel. Betuel an bata Nahor daw Milca. Nahor an utod Abraham. 16 Dayaw na bai Rebeca an daw ula pa natandeg ta mama. Gapanaog kanen na munta ta bubon na naan ebes ta bungyod. Papanno din iya na tibod daw gapanaik isab.

17 Gadali suguon an na marani ki Rebeca daw gambal, “Daw pwidi nang, painemen a no maskin tise nang na waig naan ta tibod no.”

18 Sabat Rebeca, “Sir, minem ka.” Pag-ambal din, dayon din paebes tibod an na papas-an din daw papainem din suguon an. 19 Na kainem en suguon an, ambal Rebeca ki kanen, “Mamang a isab ta waig aged makainem man imo na mga kamilyo asta mabusog danen tanan.” 20 Pag-ambal Rebeca, pabubo din waig naan ta banggay na ineman ta mga ayep daw sigi kanen kamang ta waig asta tanan na mga kamilyo kainem. 21 Na gakamang pa Rebeca ta waig, suguon i galuag ki kanen na ula gasasaba. Naan ta iya na isip, yi en taan na bai sabat ta GINUO ta iya na pangamuyo parti ta sawaen Isaac.

22 Na tapos en inem mga kamilyo, gapagwa suguon an ta maalen na dilyos na blawan na para ta irong daw darwa na manilya na darko na blawan daw paatag din ki Rebeca.^c 23 Ambal din, “Daw pwidi nang, sugiran a no daw kino ginikanan no. May ligwa pa na tunugaan naan ta inyo na balay? Pwidi kay manuga dya anduni na kilem?”

24 Ambal Rebeca, “Yaken bata Betuel na bata Nahor daw Milca. 25 Ee, may ligwa kay pa na tunugaan naan ta ame para ki kyo. May uot man daw duma pa na pagkaan para ta mga kamilyo.”

26 Pag-ambal Rebeca, suguon i gademel daw padayaw din GINUO an. 27 Ambal din, “Dayawen GINUO an. Kanen Dyos ta ake na amo na Abraham. Ula kanen nalipat ta pangako din daw may kaluoy gid kanen naan ta ake na amo tak gatudlo kanen ki yaken na magdiritso a naan ta balay ta mga parinti ta amo ko.”

28 Na tapos en ambal ta suguon, gadlagan Rebeca na muli ta iran na balay daw pasugid din naan ta iya na ginikanan daw mga utod parti ta suguon ya. 29 May magulang Rebeca na mama na ngaran din Laban. Gadlagan Laban na magsugat ta suguon 30 tak nakita din dilyos naan ta irong daw mga manilya naan ta blukan Rebeca daw namatian din man sugid Rebeca ki danen parti ta ambal ta suguon. Pag-abot Laban naan ta bubon, gatagad pa dya suguon an Abraham duma ta mga kamilyo. 31 Ambal Laban naan ta suguon, “Mos, miling ki ta balay nay. Naan kaw dya manuga. Kaon paubayan ta GINUO. Dili kinanglan na unti kaw nang naan ta bubon tak gapriparar a ta tunugaan para ki kyo daw puayan man para ta mga kamilyo.”

32 Pag-ambal Laban, giling suguon Abraham naan ta balay danen Laban. Paaw-as Laban mga karga ta mga kamilyo. Gapakamang man kanen ta uot daw duma pa na pagkaan para ta mga kamilyo. Padala din suguon an daw iya na mga duma naan ta selled ta balay daw paatagan din danen an ta waig para mag-ugas ta iran na batiis. 33 Papatad din mga pagkaan na para ki danen. Piro, ambal ta suguon, “Bag-o a maan, isugid ko ki kyo anay ame na tuyo ta pag-iling nay di.” Ambal Laban, “Sigi, sugid no.”

34 Yon na gambal suguon an, “Yaken i suguon Abraham. 35 Dayad gid kabui ta ake na amo tak patabangan kanen an ta GINUO ta tanan din na mga buat daw anduni kanen an gamanggaranen pa gid. Ake an na amo paatagan ta Dyos ta tama na mga karniro, kanding, baka, asno, kamilyo, suguon na mga bai daw mama man, daw tama na mga pilak daw mga blawan. 36 Na manakem en Sara an na sawa din, gabata kanen ta mama. Tanan na mga pagkabetang ta amo ko panubli din naan ta iya na bata. 37 Gasugo kanen ki yaken na magpangako a na dili a magpili ta bai naan ta lugar na paistaran nay na Canaan para sawaen ta iya na bata. 38 Piro, papadala a din di ki kyo na mga parinti din na mga linai ta amay din aged mangita a di ta bai na sawaen ta iya na bata. 39 Gaisip a na daw magpili a ta dlaga, basi dili miag na muyog ki yaken na muli naan ta Canaan. 40 Ake an na amo mama na gatuman gid ta GINUO daw gasalig kanen an na magpadala GINUO an ta iya na angil na mag-ubay ki yaken daw tabangan a din na magpili ta bai na sawaen ta iya na bata naan ta lugar ta mga parinti din. 41 Piro, daw dili miag mga parinti ta bai na muyog dlaga an ki yaken munta Canaan, ula aren sabaten naan ta ake na amo.

42 “Pag-abot ko gina naan ta bubon ta yi na lugar, gapangamuyo a ta GINUO na Dyos ta amo ko na tabangan a din na makakita a ta sawaen ta bata ta ake na amo. 43-44 Ambal ko ta Dyos na ipakala din ki yaken daw kino dlaga na pilien ko. Bisan kino na magpainem ki yaken daw ta ake na mga kamilyo ta waig, yon gid en dlaga na papili ta GINUO na sawaen ta bata ta ake na amo.

45 “Na ula ko pa natapos ake na pangamuyo, gabot en Rebeca na gapas-an ta tibod. Gapanaog Rebeca munta ta bubon na ebes ta bungyod daw gatimba. Gangayo a ki kanen ta waig na inemen ko. 46 Paebes dayon Rebeca iya na tibod daw papainem a din asta mga kamilyo ko. 47 Pagtapos ko ta pag-inem, ginsa a ki kanen parti ta mga ginikanan din. Sabat Rebeca na kanen bata Betuel na bata Nahor daw Milca. Pag-ambal Rebeca, patakked ko dilyos an naan ta irong din daw mga manilya naan ta blukan din. 48 Pagtakked ko ta dilyos daw manilya, pademel ko ulo ko i daw pasimba ko GINUO an. Padayaw ko GINUO an na Dyos ta ake na amo tak gaubay gid kanen ki yaken na gadiritso a unti ta balay ta utod ta ake na amo daw nakita ko dlaga na apo ta utod din na sawaen ta iya na bata. 49 Gani, ambalen nyo daw miag kaw na ipasawa nyo Rebeca naan ta bata ta ake na amo aged mlaman ko daw ino buaten ko.”

50 Sabat Laban daw Betuel, “Ee, ula kay duma na ambalen daw dili, magsunod kay nang ta liag ta GINUO. 51 Anen di Rebeca. Dleen no kanen malik naan ta inyo na lugar daw pasawa no ta bata ta imo na amo tak nlaman nay na yi pagbeet ta GINUO.”

52 Na namatian ta suguon Abraham iran na ambal, galuod kanen daw gademel naan ta basak daw gapasalamat ta GINUO. 53 Pagwa din mga alaas na pilak daw blawan daw maalen na mga bayo daw paatag din naan ki Rebeca. Paatagan din man ta maalen na mga rigalo utod Rebeca na mama daw iya man na inay. 54 Na tapos en danen ta iran na pag-isturya, suguon Abraham daw mga duma din gakaan daw gainem. Na kilem en, gatunuga danen naan ta balay Laban.

Pagsellem, gabangon danen daw gapalam na muli en naan ta iran na amo. 55 Ambal ta utod Rebeca daw inay din, “Magtagad kaw anay ta sampulo adlaw bag-o dleen nyo Rebeca an. Ta pang-unsi na adlaw, pwidi en kanen kakuyog ki kyo.”

56 Sabat ta suguon, “Daw pwidi, dili kay nyo pegengan tak GINUO gatabang ki kami. Tugutan kay nyo na muli en naan ta ame na amo.”

57 Ambal danen, “Umawen nay anay Rebeca ya daw insaan.” 58 Paumaw danen Rebeca an daw painsaan, “Miag ka na muyog anduni ki danen?”

Sabat Rebeca, “Ee, muyog aren anduni.” 59 Pag-ambal Rebeca, papakuyog Laban utod din na Rebeca naan ta mga suguon Abraham na munta ta Canaan. Papakuyog man suguon Rebeca na gasagod ki kanen umpisa na tise pa asta ta iya na pagbakod. 60 Bag-o danen Rebeca gapanaw, Rebeca an pabindisyunan Laban,

61 Pagtapos Laban ta pagbindisyon, Rebeca daw mga suguon din gasakay ta mga kamilyo daw gasunod ta mga suguon Abraham. Yon paagi na Rebeca pakamang ta suguon Abraham daw padala din na muli.

62 Naan ta Canaan, Isaac an gaistar naan ta Negeb tak gasalyo kanen an alin ta Beer Lahai Roi. 63 Na mapon en, gapanaw kanen naan ta kaumaan aged mangamuyo. Nabantaw din mga kamilyo na gaprani daw may mga ittaw na gasakay. 64 Rebeca an, nakita din Isaac daw dayon gapanaog ta kamilyo na pasakayan din 65 daw gaprani kanen ta suguon Abraham. Gainsa kanen, “Kino mama an na gapanaw naan ta uma na magsugat ki kiten?”

Sabat ta suguon, “Yon Isaac na ake man na amo.” Pag-ambal ta suguon, patageban dayon Rebeca iya an na waleng ta bilo.

66 Na gaisturyaay suguon an daw Isaac, pasugid ta suguon ki Isaac tanan na mga natabo ta iran na pagpanaw. 67 Rebeca an padala Isaac naan ta balay na turda na dati paistaran ta inay din bag-o napatay daw gasawaay en danen an. Yon na nalipatan din en kamatayen ta iya na inay tak palangga din gid Rebeca an.