3 Galin Abraham naan ta kilid ta patay daw giling kanen naan ta mga Hetanen na gatipon naan ta gangaan ta padir ta iran na banwa. Ambal din ki danen, 4 “Yaken isya nang na istrangiro na gatinir ta inyo na lugar. Daw pwidi, papaliten a nyo ta basak para lebbengan ta sawa ko na napatay.”

5 Sabat ta mga Hetanen, 6 “Sir, matian kay no. Nlaman nay na kaon papili ta Dyos daw may datas ka na katengdanan paryo ta prinsipi na gatinir ta ame i na lugar. Pwidi no ilebbeng sawa no bisan naan ta pinakadayad na lebbengan ta ame i na lugar. Magpili ka nang bisan indi no gusto na ilebbeng sawa no an. Dili kay magpegeng ki kaon.”

7 Gatindeg Abraham daw gademel aged magtaod ta mga Hetanen na mga ittaw na gaistar naan ta banwa ya. 8 Ambal din, “Daw pwidi, matian a nyo. Tenged patugutan a nyo na ilebbeng ko di ake na sawa, insaan nyo Efron na bata Zohar 9 daw bligya din ki yaken iya na kwiba naan ta Macpela na naan ta kilid ta uma din. Bisan pila pa na balor na gusto din paliten ko daw bayaran ko naan ta tubangan nyo aged may lebbengan a para ta ame na pamilya.”

10 Efron an anen dya duma ta mga Hetanen na gatipon naan ta gangaan ta padir na galibot ta iran na banwa. Namatian din ambal Abraham daw gasabat kanen an ki Abraham na tanan man na mga ittaw dya kamati ta iran na isturya. 11 Ambal Efron, “Sir, dili ko bligya. Daw pwidi, matian a no anay. Naan ta tubangan ta ake na mga kasimanwa, iatag ko nang ki kaon yon na uma daw kwiba para lebbengan ta imo na sawa.”

12 Gademel isab Abraham i aged magtaod ta mga ittaw ta yon na banwa 13 daw gambal kanen an ki Efron naan ta tubangan danen, “Daw pwidi nang, mamati ka ki yaken. Magbayad a ta usto. Batunon no aged may anen a lebbengan para ta ake na sawa.”

14 Sabat Efron ki Abraham, 15 “Sir, matian a no. Bayad ta yon na basak kwattro sintos bilog na pilak. Piro, dili kinanglan na isipen ta anduni parti ta bayad. Sigi, pwidi lebbeng no dya sawa no an.”

16 Kumpurmi Abraham an ta ambal ya Efron parti ta bayad ta basak. Naan ta tubangan ta mga Hetanen, gatimbang Abraham ta kwattro sintos na bilog na pilak paagi ta timbangan ta mga nigusyanti ta yon man na timpo.

17 Yon na pabligya Efron iya na uma na naan ta Macpela dapit ta sennangngan ta Mamre asta kwiba daw mga kaoy 18 ki Abraham daw pagpalit ya Abraham naan ki kanen nakita ta mga Hetanen na gatipon naan gangaan ta iran na banwa. 19 Pagtapos ta pagpalit Abraham ta uma ya, palebbeng din Sara naan ta kwiba ta uma na naan ta Macpela na naan dapit ta sennangngan ta Mamre na naan ta Hebron naan ta Canaan.

20 Iling tan isturya parti ta uma ya na may kwiba na napalit Abraham naan ta Hetanen para lebbengan ta sawa din.