3 Sunod na adlaw, sellem pa gabangon Abraham i daw gabis-ak ta kaoy na sunggan para ta alad na sunugon. Pakarga din mga sunggan naan ta iya na asno daw pakuyog din iya na bata na Isaac daw darwa na suguon na mama. Gapanaw danen na munta ta lugar na pasambit ta Dyos ki kanen. 4 Ta pangallo na adlaw ta iran na pagpanaw, nabantaw din Moria na lugar na ilingan danen. 5 Ambal Abraham ta darwa din na suguon, “Tagad kaw nang di duma ta asno i. Kami nang en bata ko miling dya daw simbaen nay Dyos an. Daw tapos en, malik kay di.”

6 Pag-ambal Abraham, pakamang din mga sunggan ya daw papas-an din ki Isaac daw iya an a na dala bari daw baga. Gapanaw danen na darwa. 7 Na gapanaw pa danen, ambal Isaac ki Abraham na amay din, “Tay.” Sabat Abraham, “Ngaran sa, tong?” Insa Isaac, “May dala ki na baga daw sunggan, piro indya bata pa na karniro para patayen ta daw sunugon bilang ate na alad naan ta Dyos?” 8 Sabat Abraham, “Tong, Dyos mag-atag ki kiten ta bata pa na karniro para ialad ta.” Pag-ambal din, gapadayon danen ta iran na pagpanaw.

9 Pag-abot en danen Abraham naan ta lugar na paambal ta Dyos ki Abraham, gabuat Abraham ta alaran na bato daw paplastar din mga sunggan ya. Pagapos din Isaac an daw panegga din naan ta alaran na may mga sunggan. 10 Paibitan din bari an aged patayen iya na bata. 11 Piro, nali nang may angil ta GINUO na gumaw ki kanen alin ta langit, “Abraham, Abraham.” Sabat Abraham, “Ngaran sa?” 12 Ambal ta angil ta GINUO, “Dili no patayen bata no an daw dili ka man magbuat ta bisan ino na masakitan kanen an. Anduni, nlaman ko en na gatuman ka ta sugo ta Dyos daw gataod ka ki kanen tak tumanen no inta ambal ta Dyos na ialad no bugtong no na bata naan ki kanen.”

13 Pagtapos ta ambal ta angil, Abraham i gatan-aw naan ta palibot daw nakita din isya na karniro na mama naan ta sagbetan na iya na sungay nasangit dya. Pakamang din karniro an daw papatay daw pasunog na sal-i ta bata din para alad naan ta Dyos. 14 Tenged paatag ta GINUO iran na kinanglan, pangaranan Abraham lugar ya na “GINUO An Gaatag Ta Ate Na Kinanglan.” Asta anduni mga ittaw an gambal ta iling ti, “Naan ta bukid ta GINUO mag-atag kanen ki kiten ta ate na kinanglan.”

15 Gaumaw isab angil ta GINUO ki Abraham alin ta langit daw gambal, 16 “GINUO an gapangako ki kaon paagi ta iya na ngaran na tenged patuman no iya na ambal na ialad no bugtong no na bata naan ki kanen, 17 mag-atag gid kanen an ki kaon ta sikad tama na mga kaayaran daw patamaen din gid imo na mga linai na paryo katama ta mga bituon naan ta langit daw pantad naan ta baybay. Pirdien ta imo na mga linai daw sakepen mga banwa ta iran na mga kuntra. 18 Paagi ta imo na mga linai, mga ittaw ta tanan na mga nasyon ta kalibutan tagan din ta mga kaayaran tak gatuman ka ta sugo ta Dyos.”

19 Pagtapos ta ambal ta angil, danen Abraham gabalik naan ta iya na mga suguon. Gapanaw danen tanan na muli naan ta Beerseba daw naan danen dya gapadayon na gaistar.

20 Nabalitaan Abraham na Milca na sawa ta utod din na Nahor may mga bata. 21 Iya na panganay na bata na mama Uz. Pangarwa din na bata na mama Buz daw sunod na bata din na mama Kemuel. Kemuel amay Aram. 22 Sunod na mga bata danen na mama Kesed, Hazo, Pildas, Jidlaf daw Betuel. 23 Betuel amay Rebeca. Wallo buok mga bata Milca daw Nahor na utod Abraham. 24 Pasawa Nahor suguon danen na ngaran din Reuma daw gabata man Reuma ki Teba, Gaham, Taas daw Maaca.