Pagtao Isaac
21
Sara an paatagan ta GINUO ta kaayaran paagi ta pagtuman ta GINUO ta iya na pangako ki danen Abraham. 2 Bisan na manakem en danen Abraham, gabagnes Sara daw gabata ta mama naan ta timpo na sunod ta pangako ta Dyos ki Abraham. 3 Pangaranan Abraham bata din an na Isaac. 4 Na wallo nang pa adlaw Isaac alin ta iya na pagtao, kanen an pabuatan Abraham ta tanda naan ta iya na lawaa tak patuman Abraham sugo an ta Dyos parti ta mga bata na mama. 5 Pagtao Isaac, idad Abraham isya gatos na taon.6 Ambal Sara, “Palipay a ta Dyos daw tanan na mga ittaw na kamati na gabata a, malipay man danen duma ki yaken 7 tak kino man abi magpati daw mag-ambal ki Abraham na makabata a pa! Piro anduni, bisan manakem kay en, kabata a pa ta mama!”
8 Isaac an gabakod daw naan ta adlaw na patalin kanen an, Abraham gakumbira. 9 Nakita Sara na Isaac an pasunlog Ismael na bata Abraham ki Hagar na Egiptuanen. 10 Ambal Sara ki Abraham, “Palayasen no suguon na yan na bai daw iya na bata tenged bata din an dili pwidi na isya man na manubli ta ate na mga pagkabetang. Isaac nang na bata ko manubli.”
11 Nasebean gid Abraham i tak Ismael an bata din man. 12 Piro, ambal ta Dyos ki Abraham, “Dili ka mangasebe parti ta bata an daw suguon no na inay din. Sunuron no liag an Sara tak mga linai nang Isaac kalaen ko na imo na mga linai. 13 Piro, mga linai ta bata ta suguon no buaten ko man na isya na nasyon tak kanen an bata no man.”
14 Sunod na adlaw, sellem pa gabangon Abraham an daw gakamang ta mga pagkaan daw waig daw paduol din ki Hagar. Papanaw din danen Hagar daw Ismael. Galibot-libot danen an Hagar na ula sigurado na ilingan naan ta lugar na ula kabalayan na dani ta banwa na Beerseba.
15 Ta pagpanaw danen Hagar, naubusan danen ta waig naan ta ugsakan na dala danen. Galuya Ismael an daw pabetang Hagar kanen an naan ta dalem ta tanem para palambungan. 16 Naan dya pabilin Ismael an daw gapanaw Hagar an naan ta unaan. Kamadyuon ta panaw din paryo ta malambot ta uwas ta pana. Gapungko kanen an daw ambal din, “Dili a kagwanta na makita ko ake na bata na mapatay.” Na gamungko kanen an, gagal Ismael ta sikad tudo.
17 Namatian ta Dyos agal ta bata Hagar. Angil ta Dyos na naan ta langit gaumaw ki Hagar daw painsaan din, “Ino prublima no? Dili ka madlek. Namatian ta Dyos agal ta imo na bata. 18 Pranian no bata an daw lipayen no nakem din an tak mga linai din buaten ko bakod na nasyon.”
19 Pag-ambal ta angil, papakita ta Dyos ki Hagar isya na bubon daw papanno Hagar iya na ugsakan ta waig alin ta bubon ya daw papainem din iya na bata.
20 Bata an Hagar paubayan ta Dyos. Na bakod en kanen an, naan kanen gaistar ta lugar na ula kabalayan na paumaw na Paran daw sikad kanen sagad na mamana ta mga ayep. 21 Na naan kanen ta Paran, papasawa kanen ta inay din naan ta isya na Egiptuanen.
Pagsugtanay Abraham Daw Abimelec Naan Ta Lugar Na Beerseba
22 Ta timpo na Abimelec ari ta mga Filistinen, giling kanen an ki Abraham duma ta kumander ta iya na mga sundalo na ngaran din Picol daw gambal, “Dyos pirmi gaubay ki kaon ta tanan no na mga buat. 23 Magsumpa ka di anduni paagi ta pagsambit ta ngaran ta Dyos na dili a no lukuon daw dili no man lukuon ake na mga linai. Magsumpa ka man na magmiad ka ki yaken daw ta mga ittaw naan ta yi na lugar na patiniran nyo paryo na yaken i miad ki kaon.” 24 Sabat Abraham, “Sigi, magsumpa a.”
25 Ta pag-isturyaay danen, gariklamo Abraham ki Abimelec parti ta bubon na paagaw ta mga sinakepan Abimelec. 26 Sabat Abimelec ta riklamo Abraham, “Ula a nalam daw kino gaagaw ta yi na bubon. Anduni ko nang namatian nyan. Man-o tak anduni ka nang gasugid ki yaken?”
27 Gakamang Abraham an ta mga karniro daw mga baka daw paatag din naan ki Abimelec para magbuat danen ta kasugtanan ta iran na pagmiaray. 28 Pagbuat danen ta kasugtanan, pabelag Abraham pitto na karniro na bai na bata pa naan ta duma din na mga karniro. 29 Abimelec gainsa ki Abraham, “Man-o tak pabelag no pitto na karniro? Ino beet ambalen no?”
30 Sabat Abraham, “Batunon no pitto i na karniro aged ipakita naan ta mga ittaw na kumpurmi ka na yi na bubon ake tak yaken gakutkot ti.”
31 Lugar na naan dya bubon ya paumaw na Beersebab tenged naan dya Abraham daw Abimelec gabuat ta iran na kasugtanan.
32 Pagtapos ta pagbuat danen ta kasugtanan naan ta Beerseba, Abimelec daw Picol na kumander ta iya na mga sundalo guli naan ta iran na istaran na lugar na yon man lugar ta mga Filistinen. 33 Pag-alin danen Abimelec, gatanem Abraham ta isya na kaoy na tamaris naan ta Beerseba daw naan dya pasimba din GINUO na Dyos Na Bui Ta Ula Katapusan. 34 Lugay gaistar Abraham naan ta lugar ta mga Filistinen.