2 Na naan kanen ta Gerar, papakala din ta mga ittaw dya na Sara an iya na utod. Ari an naan ta Gerar ngaran din Abimelec. Papakamang din Sara an daw papadala naan ta iya na balay.

3 Piro, ta isya na kilem, gapakita Dyos an ki Abimelec paagi ta dagammo daw gambal, “Mapatay ka anduni tenged ta bai na pakamang no. Kanen an may sawa en.”

4 Piro, ula pa kaprani Abimelec ki Sara daw ula din pa man natandeg. Ambal Abimelec, “Ginuo, ino, patayen no ittaw na ula gabuat ta sala? Ula a yi sala! 5 Na papakamang ko Sara, salig ko igo ake na buat tak Abraham gambal ki yaken na Sara an utod din daw ambal man a Sara na Abraham an utod din. Ula a may nakita na sala ake na pabuat.”

6 Ambal ta Dyos ki Abimelec naan ta dagammo din, “Ee, nlaman ko na ta pagpakamang no ki kanen salig no igo imo na buat. Yon na gaamblig a ki kaon aged dili ka makasala ki yaken tak papegengan ko kaon yan na dili ka marani ki kanen daw dili no man kanen an tandegen. 7 Anduni, balik no dayon Sara an ki Abraham na sawa din. Abraham an manugsugid ta kabebet-en ko daw kanen an mangamuyo para ki kaon aged dili ka mapatay. Piro, daw dili no balik bai an, kaon daw tanan no na mga ittawan mapatay.”

8 Sunod na adlaw, sellem pa gabangon Abimelec daw paumaw din tanan na mga upisyalis daw pasugiran din danen parti ta iya na dagammo. Tanan danen nadlek gid. 9 Abraham an paumaw Abimelec daw pambalan din, “Ino sala nay ki kaon? Man-o tak gabuat ka ki kami ta malain na yaken i daw ake na mga sinakepan nakabuat ta bakod na sala? Dili igo buat no ki kami.” 10 Ambal pa Abimelec ki Abraham, “Ino gasuot naan ta imo na isip? Man-o tak gabula ka na ambal no na Sara an utod no?”

11 Sabat Abraham, “Gabula a tak salig ko mga ittaw di ula adlek ta Dyos. Gaisip a na tenged ta ake na sawa patayen a danen para maagaw kanen an. 12 Ta matuod, Sara an utod ko na bai tak bata man kanen an ta amay ko, piro dili kanen an bata ta inay ko. Yon na pasawa ko kanen an tak lain man iya na inay. 13 Pasugo a kan-o ta Dyos na malin ta balay ta ake na amay daw sigi kay nang salyo naan ta tama na mga lugar. Paambalan ko ake na sawa na yi paagi na ipakita din ki yaken na palangga a din: Daw miling kay naan ta duma na mga lugar, ambalen din naan ta mga ittaw dya na kami mag-utod.”

14 Abimelec ya, pabalik din Sara an naan ki Abraham. Gakamang man kanen ya ta mga karniro, mga baka, daw mga suguon na mama daw bai daw paatag din ki Abraham. 15 Gambal kanen ya ki Abraham, “Lagen no yi na lugar daw pilien no daw indi gusto no na magtinir.”

16 Ambal din man ki Sara, “Lagen no. Anduni, tagan ko utod no an ta isya libo na bilog na pilak bilang bayad ta imo na kagayyaan daw para man may pamatuod naan ta mga duma no na kaon yan ula gabuat ta sala.”

17-18 Umpisa na Sara an na sawa Abraham nakamang Abimelec, papegengan ta GINUO na dili makabata tanan na mga bai ta pamilya Abimelec daw mga sinakepan din. Piro, na nabalik Sara ki Abraham, gapangamuyo Abraham naan ta Dyos para ki danen Abimelec daw paayad ta Dyos danen tanan daw mga bai gabagnes isab.