3 Tenged Lot gapangabay gid ki danen, gakuyog nang en danen ki kanen naan ta iran na balay. Gapaluto Lot ta dayad na pagkaan daw tinapay na ula pampaabok daw gakaan danen an.

4 Bag-o danen gatunuga, tanan na mga mama na naan ta banwa na Sodoma, mga bata pa asta ta mga manakem galibot ta balay Lot. 5 Paumaw Lot i ta mga ittaw daw paambalan, “Indya darwa ya na mama na giling di ki kaon gina? Pagwaen no danen an aged dulugan nay.”

6 Gagwa Lot an ta iya na balay daw pasaraan din gangaan an. Gatindeg kanen an naan ta tubangan ta mga mama. 7 Ambal din, “Mga kasimanwa, daw pwidi nang, dili kaw magbuat ta malain na iling tan. 8 May darwa a na bata na dlaga na ula pa natandeg ta mama. Daw gusto nyo, pagwaen ko danen an. Bala kaw daw ino gusto nyo na buaten ki danen. Basta dili nyo nang imuan ta malain darwa an na mga mama tak danen ake na mga bisita daw dapat ko ambligan.”

9 Ambal ta mga mama ya, “Malin ka dyan! Giling ka di ta ame i na lugar bilang istrangiro nang. Dili ka taga-unti, kaon pa maglaygay ki kami daw ino buaten nay? Kani, sakiten nay kaon yan na subla pa ta mga bisita no.” Pag-ambal danen, gadas-eg danen naan ki Lot aged marani danen naan ta gangaan ta balay din para gubbaen sara ta gangaan. 10 Piro, pabukasan ta darwa na bisita gangaan ta tise nang daw pabeteng danen Lot an na melled daw pasaraan danen gangaan ya. 11 Nali nang tanan na mga mama naan ta gwa ta balay dili en makakita tak pabulag danen an ta darwa na angil na mga bisita Lot. Tanan danen, mga bata daw mga manakem, gangapkap nang en daw indi gangaan ya.

12 Gainsa mga angil ki Lot, “May mga bata ka, mga magad daw duma pa na mga parinti naan ta yi na banwa? Daw may anen, dleen no danen mwa ta yi na banwa. 13 Pasugo kay ta GINUO na miling di aged samaren nay yi na banwa tak namatian ta GINUO tama an na mga riklamo parti ta malain na mga buat ta mga ittaw di.”

14 Pagtapos ta ambal ta darwa na bisita, gapanaw Lot na miling ta mga mama na sawaen ta mga bata din na bai. Ambal din ki danen, “Mos, malin ki di tak samaren ta GINUO yi na banwa.” Piro, ula danen gapati ki Lot tak salig danen galaeg-laeg nang kanen an.

15 Pagsennang ta adlaw, padali ta mga angil Lot an. Ambal danen, “Giran no! Dleen no imo na sawa daw darwa no na bata na bai daw malin kaw di tanan. Daw dili kaw malin, madapil kaw ta silot ta GINUO ta yi na banwa daw mapatay kaw man.”

16 Piro, Lot i ula din dayon patuman ambal ya ta mga angil. Yon na paibitan ta mga angil lima ya Lot, lima ta iya na sawa daw lima ta darwa din na bata daw paguyod pagwa ta banwa. Iling tan na tenged ta kaluoy ta GINUO danen an Lot naluwas alin ta silot na mabot ta Sodoma. 17 Na naan en danen ta gwa ta banwa, ambal ta mga angil, “Giran nyo. Mlagan kaw naan ta bukid. Dili kaw magblikid. Dili kaw man magteneng bisan indi ta yi na patag aged dili kaw madapil ta silot ta Sodoma.”

18 Piro, ambal Lot ki danen, “Dili pwidi Sir. 19 Bisan miad ka ki kami daw naluoy ka ki kami na luwasen kay no alin ta kamatayen, dili a man gyapon kalambot ta yon na bukid tak sikad madyo. Nali mabutan a ta silot mintras gailing a nang pa dya. 20 Di' ba may sise na banwa na dani nang daw makalambot a pa dya? Daw pwidi, tugutan kay no na miling ta sise na banwa aged maluwas kay alin ta kamatayen.”

21 Ambal ta isya na angil ta Dyos, “Sigi, dili ko samaren sise an na banwa na paambal no tenged naluoy a ki kyo. 22 Giran nyo. Mlagan kaw dya en tak kinanglan naan kaw dya en bag-o mag-umpisa pagsamad ta mga banwa.” Yon na banwa na pailingan danen Lot pangaranan na Zoar.^a

23 Gasilak en adlaw na danen Lot gabot naan ta Zoar. 24 Pag-abot danen dya, papauranan ta GINUO mga banwa an na Sodoma daw Gomora ta apoy daw ta galegleg na mga bato na asupri na alin ki kanen naan ta langit. 25 Iling tan pagsamad ta GINUO ta mga banwa asta ta bilog na patag. Tanan na mga ittaw, mga ayep daw tanan na mga gatubo naan ta basak naan ta patag ya napatay. 26 Na gadlagan danen Lot munta ta Zoar, sawa din an gasunod ki kanen. Natabo na gablikid sawa din an daw ta iya na pagblikid kanen an nimo na bato na asin.

27 Ta sunod na adlaw, sellem pa Abraham giling ta lugar ya na naan dya gaisturya GINUO ki kanen. 28 Gatan-aw kanen tubang ta Sodoma daw Gomora asta ta bilog na patag naan ta ebes. Nabantaw din dakmel gid na aso na gatumbuok alin ta basak na paryo ta aso na gagwa alin ta simburio ta bakod na pugon. 29 Yon na paagi na pasamad ta Dyos mga banwa naan ta patag. Piro, pademdem din pangabay ya Abraham ki kanen daw paluwas din ta kamatayen Lot an asta ta pamilya Lot bag-o din samaren lugar na patiniran danen.

30 Lot daw darwa din na bata na bai gapanaw alin ta Zoar. Gatukad danen ta bukid daw naan dya gaistar ta kwiba tak adlek en Lot na mag-istar naan ta Zoar. 31 Ambal ta panganay din na bata naan ta mangngod, “Kaugalian ta mga ittaw ta bilog na kalibutan mangasawa danen an daw magbata. Piro, kiten dili kangasawa daw kabata tak ula mama naan ta yi na lugar. Anen di ate nang na amay, piro kanen an manakem en. 32 Mos, paingawen ta daw dulugan ate an na amay aged kabata ki man paagi ki kanen.”

33 Tenged iling tan iran na plano, paingaw danen ta yon na kilem iran na amay daw panganay ya gadulog ta iran na amay. Ula gid kalibutan iran an na amay ta pagdulog ya daw pag-alin ta panganay.

34 Sunod na adlaw, ambal ta panganay naan ta mangngod, “Kabii kilem, yaken gadulog ta ate na amay. Paingawen ta isab kanen an daw kaon eman magdulog ki kanen aged kabata ki paagi ki kanen.” 35 Pag-abot ta kilem ta yon man na adlaw, paingaw danen isab iran na amay. Mangngod an giling naan ta iran na amay daw gadulog ki kanen. Ula gid kalibutan iran an na amay ta pagdulog ya daw pag-alin ta mangngod ya. 36 Yon en na darwa na bata Lot ubos bagnes paagi ki kanen.

37 Panganay an na bata Lot gabata ta mama daw gaatag naan ta iya na bata ta ngaran na Moab. Mga linai Moab isya na nasyon na paumaw Moabnen asta anduni. 38 Gabata man mangngod an na bata Lot ta mama daw gaatag naan ta iya na bata ta ngaran na Benami. Mga linai Benami isya man na nasyon na paumaw na Amonen asta anduni.