3 Ambal din, “Sir, daw miad nakem no ki yaken, dili a nyo lambayan. Daw pwidi nang, mapit kaw di anay aged magsirbi a ki kyo. 4 Magpuay kaw anay naan ta lambong ta yi na kaoy mintras gapakamang a pa ta tise na waig aged maugasan nyo inyo na batiis. 5 Mag-imes kay anay ta pagkaan para ki kyo aged magbiskeg lawa nyo ta inyo na pagpadayon ta pagpanaw. Gusto ko na magsirbi ki kyo tak naan kaw di ki kami.”

Sabat danen, “Ee, pwidi man.”

6 Gadali Abraham na malik ta balay na turda daw gasugo kanen ki Sara, “Mag-imes ka dagli ta tallo na sekeb na arina^a na dayad klasi daw masaen no daw magluto ka ta tinapay.”

7 Gadlagan isab kanen na miling ta iya na mga baka daw gapili ta isya na tinday na tambek. Paatag din ta iya na suguon daw gadali suguon din na iyawen daw lutuon. 8 Na luto en, gadala Abraham ta kiso na puti, gatas daw karni baka naan ta tallo ya na mama naan ta lambong ta kaoy. Gakaan danen an daw Abraham i gatindeg naan dani aged magsirbi ki danen.

9 Gainsa danen ki Abraham, “Indya Sara na sawa no?”

Sabat Abraham, “Naan kanen selled ta turda.”

10 Isya ta mga mama, kanen GINUO. Ambal din, “Ta sunod na taon, ta iling man ti na timpo, malik a di daw sawa no an may bata en na mama.” Na gaisturya danen, kamati Sara ta iran na pag-isturya tak naan kanen ta gangaan ta balay na turda na naan dapit ta iran na tudtod.

11 Abraham an daw Sara manakem en daw ula en gabot pamulanen Sara. 12 Yon na gatatawa Sara tak gaisip kanen na dili en kanen malipay na magdulog ta sawa din daw magbata tak manakem en danen an.

13 GINUO gainsa ki Abraham, “Man-o tak gatatawa Sara an daw ula gapati ta ambal ko? Gambal kanen na impusibli na kanen an magbata tak manakem en. 14 Ula impusibli para ta GINUO. Ta sunod na taon ta timpo na paambal ko, malik a ki kyo daw Sara an may bata en na mama.” 15 Nadlek Sara an tenged ta ambal ya ta GINUO. Yon na gabula kanen an, “Ula a gatatawa.” Piro, ambal ta GINUO, “Ee, matuod, gatatawa ka.”

16 Pagtapos Abraham daw tallo din na bisita ta iran na pag-isturyaay, gapadayon iya na mga bisita ta iran na pagpanaw munta ta Sodoma daw padul-ong Abraham danen an naan ta unaan ta iran na balay. Pabantaw danen banwa na Sodoma naan ta ebes.

17 Ambal GINUO ta iya na kaugalingen, “Sugiran ko Abraham ta plano ko na buaten en naan ta Sodoma. 18 Dapat mlaman din tenged kanen an pinili na buaten ko na amay ta bakod na nasyon na bantog gid daw tanan na mga nasyon naan ta kalibutan tagan ko ta mga kaayaran paagi ki kanen daw ta mga linai din. 19 Kanen papili ko aged magtudlo kanen ta iya na mga bata daw mga linai daw tanan na mga ittaw na naan ta iya na panimalay na magtuman ki yaken paagi ta pagbuat ta igo ta liag ko daw igo na pagtratar naan ta mga paryo danen na ittaw. Daw magtuman danen ki yaken, tumanen ko man ake na pangako.”

20 Yon na gambal GINUO ki Abraham, “Namatian ko mga riklamo parti ta sikad lain na mga buat ta mga ittaw naan ta Sodoma daw Gomora. 21 Gani, miling kay dya daw manilag aged mlaman nay daw sikad malain mga buat danen.” 22 Pag-ambal din, gapanaw dayon darwa na mama munta ta Sodoma. Piro, GINUO an gapabilin na duma ki Abraham. 23 Abraham i gaprani ta GINUO daw gainsa, “Daw may mga ittaw na matareng dya, silutan no danen an na mapatay danen an duma ta mga ittaw na malain? 24 Alimbawa, daw may singkwinta na ittaw na matareng naan dya, samaren no pa yon na banwa? Sigurado a na palibrien no mga ittaw dya aged dili mapatay mga singkwinta na ittaw na matareng na gaistar dya. 25 Nlaman ko na dili ka magbuat ta iling tan na silutan no man mga ittaw an na matareng tenged ta mga buat ta mga ittaw na malain. Dili iling tan ugali no! Kaon Manug-ukom ta mga ittaw ta bilog na kalibutan daw imo an na pag-ukom igo.” 26 Sabat ta GINUO, “Daw makita ko na may singkwinta na ittaw na matareng naan ta Sodoma, dili ko samaren yon na banwa tenged ki danen.”

27 Abraham gambal isab, “Ginuo, ittaw a nang na paryo ta yab-ok daw abo. Pasinsyaen a no nang ta mga ambalen ko ki kaon. 28 Alimbawa, daw ula kamang singkwinta na ittaw na matareng naan dya tak kwarintay-singko nang, samaren no pa man gyapon yon na banwa?”

Ambal ta GINUO, “Daw may kwarintay-singko na mga ittaw na matareng dya, dili ko samaren yon na banwa.”

29 Gainsa isab Abraham i, “Alimbawa, daw may kwarinta nang?”

Sabat ta GINUO, “Para ta kwarinta na ittaw na matareng dili ko samaren yon na banwa.”

30 Ambal pa gid Abraham, “Ginuo, dili ka nang magilek ki yaken tak may ambal a pa ki kaon. Alimbawa, daw may trinta nang dya?”

Sabat ta GINUO, “Daw may trinta nang dya na ittaw na matareng, dili ko samaren yon na banwa.”

31 Ambal isab Abraham, “Ginuo, pasinsyaen a no nang tak may ambal a isab ki kaon. Alimbawa, daw may binti nang dya?”

Sabat ta GINUO, “Para ta binti na ittaw na matareng na anen dya dili ko samaren.”

32 Ambal Abraham, “Ginuo, dili ka magilek tak mambal a isab ki kaon piro isya nang gid en. Alimbawa, daw may sampulo na ittaw dya?”

Sabat ta GINUO, “Para ta sampulo na ittaw na matareng na anen dya dili ko man gyapon samaren.”

33 Pagtapos ta iran na pag-isturya, gapanaw GINUO daw Abraham an a guli en.