Pagbuat Ta Tanda Naan Ta Lawa
17
Na Abram gaidad en ta nubintay-nuibi na taon, gapakita GINUO an ki kanen daw gambal, “Yaken Dyos Na Makagagaem. Tumanen a no daw dili ka man magbuat ta malain. 2 Tumanen ko ake na pangako ki kaon na patamaen ko gid imo na linai.” 3 Pag-ambal ta Dyos, galuod Abram daw gademel naan ta basak na magtaod ta Dyos. Ambal pa ta Dyos ki kanen, 4 “Yi ake na pangako ki kaon. Patamaen ko imo na linai daw buaten ko danen na tama na mga nasyon. 5 Dili en Abram imo na ngaran.a Silian ko imo na ngaran ta Abrahamb tak buaten ko kaon yan na amay ta tama na mga nasyon. 6 Tagan ta kaw ta sikad tama na mga linai daw imo na mga linai buaten ko na mga nasyon daw duma ki danen manugdumala ta mga nasyon. 7 Tumanen ko ake na pangako ki kaon daw ta imo na mga linai ta ula katapusan na yaken imo na Dyos daw Dyos ta imo man na mga linai. 8 Iatag ko ki kaon daw ta imo na mga linai bilog na Canaan na patiniran nyo aged inyo en ta ula katapusan. Bantayan ko man imo an na mga linai tak yaken iran na Dyos.”9 Ambal pa ta Dyos ki Abraham, “Kaon daw imo na mga linai dapat na tumanen nyo asta ta katapusan na adlaw kasugtanan an na anduni iatag ko ki kyo. 10 Yi ake na kasugtanan ki kyo na dapat nyo tumanen: Kaon yan daw tanan na mga mama ta imo na panimalay daw mga mama na sakep ki kaon, kyo tanan magpabuat ta tanda naan ta inyo na lawa.c 11 Umpisa anduni kyo na mga mama magpabuat ta tanda naan ta inyo na lawa para magpademdem ki kyo ta kasugtanan na paatag ko ki kyo. 12 Tanan na mga bata nyo na mama, naan ta pangwallo na adlaw alin ta pagtao dapat na buatan nyo ta tanda naan ta iran na lawa. Mga mama na natao naan ta imo na panimalay daw imo na ittawan, daw mga ittaw man na alin ta duma na mga lugar na napalit no para magsirbi ki kaon danen an tanan buatan nyo ta tanda naan ta iran na lawa. 13 Tanan gid na mga mama bisan natao naan ta imo na panimalay daw imo na ittawan daw bisan man danen mga ittaw na napalit no para magsirbi ki kaon, dapat danen an tanan buatan nyo ta tanda. Daw kyo tanan na mga mama magpabuat ta tanda naan ta inyo na lawa, yon magpademdem ki kyo asta ta ula katapusan ta kasugtanan na paatag ko ki kyo. 14 Bisan kino na mama na ula nabuatan ta tanda naan ta iya na lawa, dili ko bilangen na ake na ittaw tak ula din tumana ake na kasugtanan.”
15 Dyos gambal pa gid ki Abraham, “Sarai na sawa no, dili no en umawen na Sarai tak anduni Sarad en iya na ngaran. 16 Bindisyunan ko kanen an daw tagan ta kaw ta bata na mama paagi ki kanen. Tagan ko kanen an ta bakod na pribiliyo na buaten ko kanen an na inay ta mga nasyon daw duma ta iya na mga linai buaten ko na mga manugdumala.”
17 Pagtapos ta ambal ta Dyos, Abraham i galuod daw gademel naan ta basak na magtaod ta Dyos. Gatatawa kanen an daw gambal ta iya na kaugalingen, “Dili en pwidi magbata pa sawa ko tak idad ko i isya gatos en daw idad din nubinta.”
18 Ambal Abraham ta Dyos, “Daw pwidi, Ismael nang en manubli an ta mga pangako no ki yaken.”
19 Piro, ambal ta Dyos, “Dili pwidi tak Sara na sawa no magbata ta mama daw ngaranan no na Isaac.e Tanan na mga pangako ko ki kaon iatag ko man ki Isaac daw ta iya na mga linai asta ta ula katapusan. 20 Parti ki Ismael, tumanen ko pangabay no an daw bindisyunan ko man kanen an. Patamaen ko gid iya na mga bata daw mga linai. Dusi na bata din manugdumala daw buaten ko iya na mga linai na bakod na nasyon. 21 Piro, tumanen ko ake na pangako paagi ki Isaac na bata no na matao ki Sara ta iling man ti na timpo ta sunod na taon.”
22 Pagtapos ta ambal ta Dyos, pabilin din Abraham an. 23 Ta yon man na adlaw, pabuatan Abraham bata din na Ismael ta tanda naan ta lawa daw tanan din na mga suguon na mama na natao naan ta iya na panimalay daw mga ittawan daw mga suguon man na mama na pinalit din. Ta iling tan na paagi patuman din sugo ta Dyos ki kanen. 24 Na gapabuat Abraham ta tanda naan ta iya na lawa, idad din nubintay-nuibi na taon. 25 Na pabuatan Ismael an na bata Abraham ta tanda naan ta iya na lawa, idad din trisi na taon. 26 Naan ta isya nang na adlaw dengngan na pabuatan ta tanda naan ta lawa danen an Abraham, Ismael, 27 daw tanan na mga mama na sakep ki Abraham na mga natao naan ta iya na panimalay daw bisan mga ittawan na napalit din naan ta duma na lugar para magsirbi ki kanen.