Hagar Daw Ismael
16
Sarai na sawa Abram ula bata daw kanen an may suguon na bai na Egiptuanen na ngaran din Hagar. 2 Gambal Sarai ki Abram, “Matian a no. Pagbeet ta GINUO na dili a makabata. Daw pwidi nang, magdulog ka ta ake na suguon aged magbata kanen daw iya na bata kabigen ko na ake na bata.” Pag-ambal Sarai, kumpurmi Abram ta iya na plano.3 Yon tenaan na Sarai na sawa Abram paatag din iya na suguon na Hagar naan ki Abram aged sawaen Abram. Ta yon man na timpo, naan danen gaistar ta Canaan ta sampulo taon. 4 Gadumaay danen Abram daw Hagar daw gabagnes Hagar an. Na nlaman Hagar na bagnes kanen an, pasaligaan din Sarai na iya na ama.
5 Ambal Sarai ki Abram, “Mga malain an na buat Hagar ki yaken imo gid na sala. Paatag ko nang ake na suguon na Hagar naan ki kaon. Piro, na nlaman din na kanen an gabagnes, pasaligaan a din. Nlaman ta GINUO daw kino ki kiten may sala.” 6 Sabat Abram, “Kaon bala daw ino gusto no buaten tak kanen an imo na suguon.” Pagmati Sarai ta ambal Abram, umpisa en na dili dayad iya na pagtratar ki Hagar. Yon na galayas Hagar ki kanen.
7 Ta paglayas Hagar, kalambot kanen ta lugar na dani ta tuburan naan ta lugar na ula kabalayan daw dani man ta agian na munta ta lugar na Shur. Naan dya angil ta GINUO gapakita ki kanen 8 daw ginsa, “Hagar na suguon Sarai, indi ka galin daw indi ka punta?” Sabat Hagar, “Galayas a alin ki Sarai na ama ko.” 9 Ambal ta angil ta GINUO, “Malik ka naan ta ama no daw tumanen no kanen an.” 10 Ambal pa ta angil ta GINUO ki Hagar, “Patamaen ko mga linai no na danen dili mabilang tak sikad tama. 11 Anduni bagnes ka en daw kaon yan magbata ta mama daw ngaranan no kanen an na Ismaela tak GINUO kamati ta imo na pangamuyo na tabangan ka din ta imo na kabellay. 12 Imo an na bata magparyo ta asno na ila tak sigi kanen batok ta tanan na mga ittaw asta ta iya man na mga parinti daw tanan na mga ittaw magkuntra ki kanen.” 13 Pagmati Hagar ta ambal ta GINUO, paumaw din GINUO an na El-Roi na beet ambalen “Dyos na kakita ki yaken”. Iling tan ambal Hagar tak gatingala kanen an daw gaisip, “Man-o tak bui a pa na nakita ko Dyos daw gatan-aw kanen an ki yaken?”
14 Yon tenaan na paumaw din na Beer Lahai Roib tuburan an na dani ta lugar na naan dya gambal GINUO ki kanen. Tuburan an naan tengnga ta darwa na banwa na Cades daw Bered.