2-3 Sabat Abram, “GINUO Dyos, ino man pulos ta mga dayad na atag no ki yaken? Ula a no paatagi ta bata na manubli ta ake na mga pagkabetang. Eliezer na suguon ko naan ta ake na panimalay na taga-Damasco, kanen nang manubli ta ake na mga pagkabetang.”

4 Namatian Abram isab na gambal GINUO an ki kanen, “Dili Eliezer manubli an ta mga pagkabetang no tak imo gid na bata manubli an ta imo na mga pagkabetang.” 5 Abram an papagwa ta Dyos daw ambal din pa ki Abram, “Mangad ka ta langit daw lagen no mga bituon an daw bilangen. Di' ba sikad tama daw dili man mabilang? Iling man tan katama ta imo na mga linai.”

6 Abram i gasalig ta GINUO daw tenged ta iya na pagsalig, pakabig ta Dyos na kanen an matareng. 7 Ambal ta Dyos ki Abram, “Yaken GINUO na gadala ki kaon kan-o na miling ka di alin ta banwa na Ur na sakep ta Caldea aged iatag ko ki kaon lugar i na Canaan.”

8 Piro, gainsa Abram ta Dyos, “GINUO Dyos, ino paagi na mlaman ko na maangken ko yi na lugar na pangako no?” 9 Ambal ta Dyos ki Abram, “Yi buaten no aged mlaman no na imo tanan i na lugar. Dlaan a no ta isya na baka na bai, isya na kanding na bai daw isya na karniro na mama na tanan gaidad ta tallo na taon. Dlaan a no man ta isya na tukmo daw isya na salampati na bata pa.”

10 Pagtapos ta ambal ta Dyos, tanan na mga sugo din patuman Abram daw padala Abram naan ta Dyos mga ayep ya. Paiyaw Abram mga ayep ya daw patenga din na pabiak mga lawa ta mga ayep. Kada tenga paato din na paayang. Piro, mga yupan ya, ula din patengaa. 11 Mga uwak an magdagit inta ta patay na mga lawa ta mga ayep, piro patabog din.

12 Na gasalep nang pa adlaw an, katunuga Abram ta sikad meek daw gadagammo kanen an. Naan ta iya na dagammo nalibutan kanen ta sikad delem daw nadlek gid kanen an. 13 GINUO gambal ki Abram, “Sigurado gid na imo na mga linai mag-istar bilang mga istrangiro naan ta lugar na dili iran. Naan dya buaten danen an na mga ulipen daw pabellayan ta usto ta mga ittaw dya keteb ta appat gatos na taon. 14 Piro, silutan ko mga ittaw an ta nasyon na mag-ulipen ta imo na mga linai daw ta uryan, imo na mga linai malin dya daw magdala ta tama na mga pagkabetang. 15 Kaon imo, tagan ko ta dayad daw lawig na kabui daw tawway na kamatayen. 16 Imo na mga linai magtinir ta appat gatos na taon naan ta Egipto na yon man asta ta mga apo ta kalingking bag-o mabot timpo na igo na imo na mga linai malik di ta Canaan i. Yon igo na timpo na malik danen tak anduni dili ko pa anay paalinen mga Amornen na gaistar naan ta Canaan asta ta timpo na sikad gid en malain iran na mga buat daw igo gid na silutan ko danen an.”

17 Pagsalep ta adlaw na gadelem en, Abram i may nakita na pugon na gaaso daw bat-aw na galegleg daw gaagi naan ta tengnga ta biak na mga lawa ta mga ayep. 18 Iling tan pabuat ta GINUO naan ta yon na adlaw na kanen an gapangako ki Abram daw papalig-en din man iya na pangako. Ambal ta GINUO ta iya na pagpangako, “Iatag ko ta imo na mga linai yi na lugar alin ta suba na dlunan ta Egipto asta ta bakod na Suba Eufrates 19 na yon man lugar ta mga ittaw na Cenanen, Cenisnen, Kadmonen, 20 Hetanen, Pereznen, Refaimnen, 21 Amornen, Canaanen, Gergesnen daw Jebusnen.”