3 Limma na ari daw iran na mga sundalo gatipon naan ta Patag Sidim na anduni paumaw man na Dagat Asin. 4 Gapriparar danen na maggira kuntra ki danen Ari Kedorlaomer tak ta dusi na taon Ari Kedorlaomer gadumala ki danen. Piro, ta pangtrisi na taon, danen an gabatok.

5 Ta pangkatursi na taon, Ari Kedorlaomer daw duma din na mga ari gaugyunay na magsulong ta gira. Napirdi danen mga Refaimnen na naan ta banwa na Astarot Carnaim, mga Zuzimnen na naan ta banwa na Ham daw mga Emimnen naan ta Patag Kiryataim. 6 Napirdi man danen mga Horanen naan ta iran na bukid na Seir daw palagas danen asta ta banwa na Elparan na dani ta lugar na ula kabalayan. 7 Gabalik Ari Kedorlaomer daw duma din na mga ari daw kabot danen naan ta banwa na Enmispat na paumaw man na Cades. Napirdi man danen tanan na mga banwa ta mga Amalecnen daw napirdi man danen mga Amornen na gaistar ta banwa na Hasason Tamar.

8 Mga sundalo daw ari ta Sodoma, Gomora, Adma, Zeboim, daw Bela na paumaw man na Zoar giling naan ta Patag Sidim. Naan dya danen gapwisto aged maggira kuntra ki danen Ari Kedorlaomer. 9 Giling man dya Kedorlaomer na ari ta Elam daw iya na mga duma na danen Tidal na ari ta Goim, Amrafel na ari ta Sinar, daw Arioc na ari ta Elasar, daw iran man na mga sundalo. Gagiraay appat an na ari kuntra ta limma ya. 10 Naan ta Patag Sidim tama na mga lungag na panno ta alkitran. Limma na ari napirdi ta appat na ari daw gapadyo limma ya na ari asta iran na mga sundalo. Na gapadyo ari ta Sodoma daw ari ta Gomora duma ta iran na mga sundalo, nulog duma an ki danen naan ta mga lungag na tama alkitran. Duma ki danen gatago naan ta mga bukid. 11 Tanan na mga pagkabetang daw pagkaan naan ta banwa na Sodoma daw Gomora pakamang ta appat na ari daw gapanaw danen na muli. 12 Lot ya na gamangken Abram pabiag danen daw pakamang man tanan din na mga pagkabetang tak naan kanen gaistar ta Sodoma.

13 Isya ta mga ittaw na ula nabiag giling ki Abram daw pasugiran din na Lot ya nabiag. Ta yon man na timpo ta pagbiag ki Lot ya, Abram an na isya na Hebreo naan gistar dani ta darko na mga kaoy na iya Mamre. Mamre isya na Amornen daw kanen an may darwa na utod na Escol daw Aner. Danen Abram daw Mamre daw mga utod Mamre may kasugtanan na magtabangay danen an.

14 Pagsugid ta ittaw ki Abram na nabiag Lot ya, patipon Abram tanan na mga suguon din na masaligan gid na natao naan ta iya na panimalay daw sagad maggamit ta mga armas na panggira. Tanan danen tris sintos disi-utso. Danen Abram, Mamre, Escol daw Aner, palagas danen appat ya na ari daw iran na mga sundalo asta nalambot naan ta banwa na Dan. 15 Pag-abot ta kilem, pagrupo Abram iya na mga ittawan daw pagira danen appat ya na ari daw iran na mga sundalo. Napirdi appat ya na ari daw iran na mga sundalo daw gadlagan danen ya. Palagas Abram danen an asta ta banwa na Hoba na naan liyo ta banwa na Damasco naan dapit ta nurti. 16 Nalibri Abram gamangken din an na Lot daw tanan na mga ittaw na nabiag. Nabawi man tanan na mga pagkabetang na pakamang ta appat na ari.

17 Pagpirdi Abram ki danen Ari Kedorlaomer, gapanaw danen Abram na muli. Ari ta Sodoma gasugat ki Abram naan ta Patag Save na anduni paumaw man na Patag Ta Ari. 18 Gasugat man ki Abram ari ta banwa na Salem na ngaran din Melquisedec. Gadala Melquisedec an ta tinapay daw bino. Kanen pari na gasirbi ta Dyos Na Labaw Ta Tanan. 19 Abram an pabindisyunan Melquisedec na ambal din,

Pagtapos ta pagbindisyon Melquisedec, gaatag Abram ki Melquisedec ta isya ta sampulo na parti ta tanan na mga betang na nakamang din naan ta mga ari na napirdi din ta gira.

21 Ari ta Sodoma gambal ki Abram, “Daw pwidi, ibalik no ake na mga ittaw na nabiag ta mga ari naan ta ame na banwa. Piro, imo nang en tanan na mga betang na alin ta ame na banwa na nakamang ta mga ari na pabawi no.” 22 Piro, sabat Abram ta ari ta Sodoma, “May pangako a naan ta GINUO Dyos Na Labaw Ta Tanan na gabuat ta kalangitan daw ta kalibutan. 23 Nangako a na dili a mamang ta bisan ino na betang na alin ki kyo maskin isya naet na ilo o isya na igot ta sandal aged dili no maambal na kaon gapamanggad ki yaken. 24 Dili a magkamang ta bisan ino para ki yaken. Piro, mga nakaan ta mga ittawan ko, bilangen ta na ake na ulas. Iatag no man ta mga duma ko na danen Aner, Escol daw Mamre iran na mga ulas.”