Pagbelagay Abram Daw Lot
13
Abram daw sawa din galin ta Egipto na munta ta Negeb. Padala danen tanan na mga pagkabetang danen daw iran na mga duma. Gakuyog man ki danen gamangken din na Lot. 2 Manggaranen gid en Abram tak tama iran na mga baka, karniro, kanding, pilak daw blawan. 3 Gasalyo-salyo danen alin ta lugar na Negeb asta na kalambot danen ta dati na lugar na patukuran danen ta balay na turda naan ta tengnga ta darwa na banwa na Betel daw Ai. 4 Yon man lugar na naan dya Abram an dati gabuat ta alaran na bato para ta pagsimba naan ta Dyos. Pag-abot danen dya, pasimba din GINUO an.5 Pamilya Lot daw mga ittawan din gakuyog man ki Abram. Tama man iran na mga karniro, kanding, baka daw mga balay na turda. 6 Gatama pa gid mga ayep Abram daw Lot asta dili en danen pwidi magtingeb ta lugar na paistaran danen tak kulang en mga lamunon dya para ta iran na mga ayep na sikad tama. 7 Yon tenaan na pirmi gakuntranay mga manugbantay ta mga ayep Abram daw mga manugbantay man ta mga ayep Lot. Ta yon man na timpo naan dya gaistar mga Canaanen daw mga Pereznen.
8 Gambal Abram ki Lot, “Daw pwidi, dili ki magkuntranay daw dapat man na ate na mga manugbantay ta mga ayep dili magkuntranay tak kiten i isya nang ta pamilya. 9 Miad taan daw magbelagay ki tak lapad yi na lugar. Daw pwidi, libuton no ta tan-aw daw pilien no daw indi ka gusto na magsalyo. Daw magsalyo kaw naan dapit ta wala, naan kay ame dapit ta tuo. Piro, daw naan kaw dapit ta tuo, naan kay ame dapit ta wala.”
10 Na gatan-aw Lot naan ta palibot, nakita din lapad na patag ta Suba Jordan asta ta banwa na Zoar. Nakita din na dayad gid lagen tak bilog na patag tama suba paryo ta gardin ta GINUO naan ta Eden daw paryo man ta Egipto. Ta yon man na timpo ula pa pasamad ta GINUO mga banwa na Sodoma daw Gomora. 11 Bilog na patag ta Suba Jordan naan ta sennangngan papili Lot daw gapanaw danen Lot na miling dya. Iling tan pagbelagay an danen Lot daw Abram 12 na Abram an gatinir naan ta lugar na Canaan daw Lot an a naan ta patag ta Suba Jordan. Danen Lot gatukod ta iran na mga balay na turda naan dani ta Sodoma na isya ta mga banwa naan ta patag ya. 13 Mga ittaw naan ta Sodoma gabuat ta sikad malain. Ula gid danen gasunod ta GINUO.
Pagsalyo Abram Naan Ta Hebron
14 Pagbelag Lot ki Abram, GINUO an gambal ki Abram, “Man-aw ka naan dapit ta nurti, naan dapit ta sur, naan dapit ta sennangngan daw naan dapit ta salepan. 15 Tanan na mga basak na makita no iatag ko ki kaon daw ta imo na mga linai ta ula katapusan. 16 Patamaen ko mga linai no an paryo ta yab-ok na dili mabilang. 17 Manaw ka daw lagen no kalangkawen daw kalaparen ta yi na basak tak iatag ko ki kaon.” 18 Pag-ambal ta GINUO, gapanaw danen Abram daw galibot ta yon na lugar na paambal ta Dyos. Patukod danen Abram iran na mga balay na turda dani ta darko na mga kaoy na iya Mamre na naan ta banwa na Hebron. Gabuat isab kanen ta alaran na bato para ta pagsimba naan ta GINUO.