Sugo Daw Mga Pangako Ta Dyos Ki Abram
12
Na danen Abram naan pa ta syudad na Haran, GINUO gambal ki kanen, “Malin ka ta lugar na i na paistaran nyo. Ibilin no imo an na amay daw mga parinti daw miling ka ta lugar na itudlo ko ki kaon. 2 Patamaen ko imo na mga linai daw buaten ko danen an na bakod na nasyon. Tanan na mga kaayaran iatag ko ki kaon daw bantugon ko imo na ngaran paagi ta mga buat ko para ki kaon aged mga ittaw na alin ta duma na mga nasyon tagan ko man ta mga kaayaran paagi ki kaon. 3 Bisan kino na magmiad ki kaon, tagan ko man ta mga kaayaran. Piro, bisan kino na magbuat ta malain ki kaon, silutan ko. Paagi ki kaon, mga ittaw ta tanan na mga lai naan ta kalibutan tagan ko ta mga kaayaran.”4 Pag-ambal ta Dyos, galin Abram i ta Haran na patuman din ambal ta GINUO daw Lot ya gakuyog ki kanen. Na galin Abram ta Haran, iya na idad sitintay-singko na taon.
5 Ta pag-alin Abram ta Haran, pakuyog din Sarai na sawa din daw gamangken din na Lot. Padala danen tanan na mga pagkabetang danen asta mga ittaw na sakep ta iya na panimalay na naan pa kanen ta Haran. Gapanaw danen tanan munta ta lugar na Canaan. Pag-abot danen ta Canaan, 6 gapadayon danen ta pagpanaw asta na kalambot danen ta bantog na kaoy na pangaranan na More na sakep ta banwa na Siquem naan ta Canaan. Ta yon man na timpo, naan pa dya gaistar mga Canaanen.
7 Na danen Abram naan ta Canaan, gapakita GINUO ki kanen daw gambal, “Lugar na i iatag ko ta imo na mga linai.” Pagmati Abram, gabuat kanen dya ta alaran na bato para simbaen din GINUO an na gapakita ki kanen. 8 Alin dya danen Abram giling ta bukid na naan ta sennangngan ta banwa na Betel daw gatukod kanen ta balay na turda naan ta tengnga ta darwa na banwa na Betel daw Ai. Betel an naan dapit ta salepan daw Ai an a naan dapit ta sennangngan. Gabuat isab kanen ta alaran na bato daw pasimba din GINUO an. 9 Paglambay ta timpo ta iran na pagtinir dya, galin danen daw gapadayon ta pagsalyo-salyo naan ta mga lugar na sakep ta Canaan munta ta Negeb naan dapit ta sur.
Abram Naan Ta Egipto
10 Ta yon man na timpo na naan danen Abram gaistar ta Canaan, naan dya may segeng na letem. Yon na giling danen an Abram naan ta lugar na Egipto aged naan dya magtinir. 11 Na dani nang en danen ta Egipto, gambal Abram ki Sarai na iya na sawa, “Kaon yan sikad dayaw. 12 Daw makita ka ta mga Egiptuanen daw mlaman danen na kiten i magsawa, patayen a danen aged agawen ka danen ki yaken. 13 Gani, daw pwidi, ambalen no ki danen na mag-utod ki nang aged magmiad danen ki yaken tenged ki kaon daw dili a man danen patayen.”
14 Pagselled danen naan ta Egipto, nakita ta mga Egiptuanen na sikad dayaw na bai Sarai an na sawa Abram. 15 Nakita man Sarai an ta mga upisyalis Paraon na ari ta Egipto daw pasugiran danen Paraon an na sikad dayaw Sarai. Yon na Sarai an papaistar Paraon naan ta iya na palasyo. 16 Tenged ki Sarai, gamiad Paraon ki Abram daw kabaton Abram ta mga atag na mga karniro, baka, asno, mga suguon na bai daw mama, daw mga kamilyo.
17 Tenged na Sarai an na sawa Abram pakamang Paraon, paatagan ta GINUO ta segeng na masakit Paraon ya daw mga ittaw na gasirbi ki kanen naan ta palasyo din. 18 Yon na paumaw Abram an Paraon daw pambalan, “Man-o tak nabuat no iling ti ki yaken? Man-o tak ula ka gasugid ki yaken na Sarai sawa no? 19 Man-o tak gambal ka na kanen i utod no asta nang en na kanen pakamang ko aged sawaen? Yi sawa no. Mangen no daw malin kaw di!”
20 Pagtapos ta ambal Paraon ki Abram, pasugo Paraon iya an na mga ittawan na palinen Abram an daw Sarai naan ta Egipto. Na papalin danen an Abram, padala danen tanan an na mga pagkabetang danen.