Turi Ta Babel
11
Anay pa sa, tanan na mga ittaw ta bilog na kalibutan may isya nang na linggwai. 2 Na mga ittaw galapta naan ta kalibutan alin ta sennangngan, duma ya ki danen kalambot ta wayang na patag naan ta lugar na Sinar. Gatukod danen ta iran na mga balay daw naan dya gaistar. 3 Gasapol danen daw gambal, “Mag-ubra ki ta mga kwadrado na lunang daw lutuon ta asta na magdessen.” Yon na gabuat danen ta kwadrado na lunang daw paluto danen bilang sal-i ta bato daw gakamang danen ta alkitran na gamiten bilang pangdekket ta iran na pagsampaw-sampaw ta mga kwadrado. 4 Gasapol danen isab na gambal, “Magtukod ki ta banwa daw sikad datas na turi na kalambot ta kalangitan aged mabantog ki daw dili man matabo na magbelagay ki daw maglapta naan ta bilog na kalibutan.”5 GINUO an gapanog aged tan-awen din banwa an daw turi na patukod ta mga ittaw. 6 Pagtan-aw ta GINUO, ambal din ta iya na kaugalingen, “Mga ittaw isya nang ta nasyon daw iran na ambal isya nang man. Yi na banwa daw turi umpisa nang pa ta iran na mga buaten tak daw ino naan ta iran na isip sigurado na buaten danen. 7 Ilingan ta danen an daw iran na mga linggwai buaten ta na lain-lain na mga linggwai aged dili danen mag-intindiay.” 8 Pagtapos ta ambal ta GINUO, papalapta din danen an naan ta bilog na kalibutan na ula en danen an gaintindiay. Yon na ula danen nadayon pagtukod ta banwa. 9 Lugar ya na naan dya pabuat ta mga ittaw turi ya pangaranan na Babela tak naan ta Babel linggwai ta mga ittaw pabuat ta GINUO ta lain-lain na mga linggwai para dili danen an mag-intindiay. Alin Babel palapta danen an ta GINUO naan ta bilog na kalibutan.
Mga Linai Sem
10 Yi parti ta mga linai Sem. Paglambay ta darwa na taon pagtapos ta anaw, Sem gaidad ta isya gatos na taon. Gabata sawa din ta mama daw pangaranan danen na Arfaxad. 11 Alin ta pagtao Arfaxad, kinintos pa na taon nadugang ta kabui Sem bag-o kanen napatay daw ta yon na mga tinaon may mga bata pa kanen an na mga mama daw mga bai.
12 Na gaidad Arfaxad ta trintay-singko na taon, gabata sawa din ta mama daw pangaranan danen na Sela. 13 Alin ta pagtao Sela, kwattro sintos tris pa na taon nadugang ta kabui Arfaxad bag-o kanen napatay daw ta yon na mga tinaon may mga bata pa kanen an na mga mama daw mga bai.
14 Na gaidad en Sela ta trinta na taon, gabata sawa din ta mama daw pangaranan danen na Heber. 15 Alin ta pagtao Heber, kwattro sintos tris pa na taon nadugang ta kabui Sela bag-o kanen napatay daw ta yon na mga tinaon may mga bata pa kanen an na mga mama daw mga bai.
16 Na gaidad Heber ta trintay-kwattro na taon, gabata sawa din ta mama daw pangaranan danen na Peleg. 17 Alin ta pagtao Peleg, kwattro sintos trinta pa na taon nadugang ta kabui Heber bag-o kanen napatay daw ta yon na mga tinaon may mga bata pa kanen an na mga mama daw mga bai.
18 Na gaidad Peleg ta trinta na taon, gabata sawa din ta mama daw pangaranan danen na Reu. 19 Alin ta pagtao Reu, dos sintos nuibi pa na taon nadugang ta kabui Peleg bag-o kanen napatay daw ta yon na mga tinaon may mga bata pa kanen an na mga mama daw mga bai.
20 Na gaidad Reu ta trintay-dos na taon, gabata sawa din ta mama daw pangaranan danen na Serug. 21 Alin ta pagtao Serug, dos sintos syiti pa na taon nadugang ta kabui Reu bag-o kanen napatay daw ta yon na mga tinaon may mga bata pa kanen an na mga mama daw mga bai.
22 Na gaidad Serug ta trinta na taon, gabata sawa din ta mama daw pangaranan danen na Nahor. 23 Alin ta pagtao Nahor, dos sintos pa na taon nadugang ta kabui Serug bag-o kanen napatay daw ta yon na mga tinaon may mga bata pa kanen an na mga mama daw mga bai.
24 Na gaidad Nahor ta binti-nuibi na taon, gabata sawa din ta mama daw pangaranan danen na Tera. 25 Alin ta pagtao Tera, sinto disi-nuibi pa na taon nadugang ta kabui Nahor bag-o kanen napatay daw ta yon na mga tinaon may mga bata pa kanen an na mga mama daw mga bai.
26 Na idad Tera subla ta sitinta na taon, natao mga bata danen na Abram, Nahor daw Haran.
Mga Linai Tera
27 Yi mga linai Tera. Mga bata Tera na mama: Abram, Nahor daw Haran. Bata Haran na mama Lot. 28 Na bui pa Tera, napatay Haran naan ta iran na banwa na Ur na sakep ta lugar na Caldea. 29 Abram an a nangasawa ki Sarai daw Nahor ya a nangasawa ta bata Haran na ngaran din Milca. Isya man ta mga bata Haran na bai Isca.
30 Sarai an ula bata tak baog kanen an.
31 Danen Tera galin ta iran na banwa na Ur naan ta Caldea. Duma Tera bata din na Abram, magad din na Sarai daw apo din na Lot na bata Haran. Miling danen inta naan ta lugar na Canaan, piro ula danen gapadayon tak pag-abot danen ta syudad na Haran, naan dya danen gaistar. 32 Napatay Tera ya naan ta syudad na Haran ta idad na dos sintos singko.