Genesis 10

Mga Linai Ta Mga Bata Noe

Yi sulat parti ta mga bata Noe na Sem, Ham daw Jafet. Pagtapos ta anaw, mga sawa ta mga bata Noe gabata pa ta mga mama.

2 Yi mga bata Jafet na mama: Gomer, Magog, Madai, Javan, Tubal, Mesec daw Tiras.

3 Mga bata Gomer na mama: Askenaz, Rifat daw Togarma.

4 Mga bata Javan na mama: Elisa, Tarsis, Kitim daw Dondanim.

5 Mga linai Javan gaistar dani ta mga baybay daw naan ta mga pulo.

Mga linai Jafet, danen an gatama daw may lain-lain na mga grupo ta pamilya. Kada grupo ta pamilya may kaugalingen na lugar daw linggwai.

6 Yi mga bata Ham na mama: Cus, Egipto, Put daw Canaan.

7 Mga bata Cus na mama: Seba, Havila, Sabta, Raama daw Sabteca.

Mga bata Raama na mama: Saba daw Dedan.

8 May isya pa na bata Cus na mama na ngaran din Nimrod. Kanen una na ittaw na pinakabantog na manugdumala naan ta kalibutan. 9 Ta pagtan-aw ta GINUO ki Nimrod, kanen sikad sagad na magdakep daw magpatay ta ila na mga ayep. Yon na pirmi pagamit ta mga ittaw ambal na, “Kabay pa na kaon yan magparyo ki Nimrod na sagad magdakep daw magpatay ta ila na mga ayep ta pagtan-aw ta GINUO.” 10 Yi una na mga syudad na sakep ta pagdumala Nimrod: Babel, Erec daw Cad na naan ta lugar na Sinar. 11 Alin Sinar, giling Nimrod i naan ta lugar na Asiria daw gatukod kanen ta mga banwa na Ninive, Rehobot-Ir, Cala 12 daw Resen. Resen an naan ta tengnga ta darwa na banwa na Ninive daw bakod na banwa na Cala.

13 Mga linai Egipto mga ittaw naan ta lugar na Lud, Anam, Lehab, Naftu, 14 Patrus, Caslu daw Caftor. Mga Filistinen galin ta Caftor.

15 Panganay na bata Canaan na mama, Sidon daw mangngod din Het. 16 Canaan an alinan ta mga Jebusnen, Amornen, Girgasanen, 17 Hevhanen, Araknen, Sinhanen, 18 Arvadnen, Zemamen daw Hamatnen. Paglambay ta pila na mga taon, lain-lain na mga grupo ta pamilya na mga linai Canaan galapta naan ta duma na mga lugar. 19 Gadugang basak na iya ta mga linai Canaan. Dlunan ta iran na basak alin ta Sidon asta ta Gerar na dani ta Gaza naan dapit ta sur daw alin man ta Sodoma, Gomora, Adma daw Zeboim na dani Lasa naan dapit ta sennangngan.

20 Yon mga linai Ham. Danen an gatama daw may lain-lain na mga grupo ta pamilya. Kada grupo ta pamilya may kaugalingen na lugar daw linggwai.

21 Sem an na manong Jafet, kanen an may mga bata man na mama. Isya na linai din Heber na alinan ta tanan na mga Hebreo.

22 Mga bata Sem na mama: Elam, Asur, Arfaxad, Lud daw Aram.

23 Mga bata Aram na mama: Uz, Hul, Geter daw Mesec.

24 Arfaxad amay Sela daw Sela amay Heber.

25 Heber may darwa na bata na mama. Ngaran ta isya na bata din Peleg na beet ambalen belag tak ta yon man na timpo mga ittaw gagrupo-grupo na naan gistar ta lain-lain na mga lugar. Ngaran ta utod din Joctan.

26 Mga bata Joctan na mama: Almodad, Selef, Hazarmavet, Jera, 27 Hadoram, Uzal, Dicla, 28 Obal, Abimael, Saba, 29 Ofir, Havila daw Jobab. Yon mga linai Joctan. 30 Iran na lugar alin ta Mesa asta ta Sefar naan ta mga bukid na naan dapit ta sennangngan.

31 Yon mga linai Sem. Danen gatama daw may lain-lain na mga grupo ta pamilya. Kada grupo ta pamilya may kaugalingen na lugar daw linggwai.

32 Yon mga grupo ta mga linai ta mga bata Noe. Kada grupo may kaugalingen na linai daw nasyon. Pagtapos ta anaw na galapaw ta bilog na kalibutan, galapta mga linai ta mga bata Noe naan ta bilog na kalibutan daw yon umpisa ta tanan na mga nasyon.