Pangako Ta Dyos Ki Noe
9
Noe i daw iya na mga bata pabindisyunan ta Dyos na ambal din, “Magbata kaw daw magtama aged inyo na mga linai maglapta naan ta bilog na kalibutan. 2 Tanan na mga ayep na naan ta basak, darko daw derse, daw tanan na mga yupan na naan ta kalangitan, daw mga sidda naan ta dagat madlek ki kyo daw kyo magdumala ki danen. 3 Pwidi kaw magkaan ta karni tenged umpisa anduni atag ko ki kyo tanan na mga may kabui para ta inyo na pagkaan paryo ta ake na pag-atag ki kyo ta mga tanem na inyo na pakaan. 4 Piro, daw mag-iyaw kaw ta ayep para pagkaan, dapat kamangan nyo ta lengngessa tak lengngessa an simbulo ta kabui. 5-6 Tenged mga ittaw pabuat ko na paryo ki yaken, panabaten ko bisan ino na makapatay ta ittaw. Daw may ayep na kapatay ta ittaw, dapat na patayen. Daw may ittaw na kapatay ta paryo din na ittaw, dapat na patayen man. Ta matuod, daw may ittaw na magpatay ta paryo din na ittaw, mga paryo din man na ittaw magsilot ki kanen ta kamatayen.” 7 Gambal pa Dyos an naan ki danen Noe, “Magbata kaw daw magtama aged tama isab mga ittaw naan ta kalibutan.”8 Ambal pa ta Dyos ki Noe daw ta iya na mga bata, 9 “Anduni, may pangako a ki kyo daw ta inyo na mga linai 10 daw ta tanan na mga may kabui na duma ki kyo na yon man mga ayep na daram, mga ayep na naan gistar ta blasan, kakauyan, kabatuan daw tanan man na mga yupan na gakawas alin ta sakayan. 11 Gangako a na dili ko en isab patayen tanan na mga may kabui daw samaren kalibutan paagi ta anaw na maglapaw ta bilog na kalibutan. 12 Yi tanda ta ake na pangako naan ki kyo daw ta tanan man na mga may kabui daw naan man ta tanan nyo na mga linai asta ta ula katapusan: 13 Gabetang a ta blangaw naan ta kalangitan para yon tanda na pademdem ko ake na pangako naan ta tanan na mga may kabui na naan ta kalibutan. 14 Daw ipadala ko mga item naan apaw ta kalibutan daw maggwa blangaw an naan ta kalangitan, 15 demdemen ko ake na pangako naan ki kyo daw ta duma pa na mga may kabui na dili ko en patayen tanan na mga may kabui paagi ta anaw na maglapaw ta bilog na kalibutan. 16 Gani, daw may blangaw, tan-awen ko daw demdemen ko na yaken na Dyos may pangako na ula katapusan naan ta tanan na mga may kabui ta bilog na kalibutan.”
17 Ambal isab ta Dyos ki Noe, “Blangaw an tanda ta ake na pangako naan ta tanan na mga may kabui naan ta kalibutan.”
Noe Daw Iya Na Mga Bata
18 Yi ngaran ta mga bata Noe na gakawas duma ki kanen alin ta sakayan: Sem, Ham daw Jafet. Ham amay Canaan. 19 Tallo na bata Noe alinan ta tanan na mga ittaw ta bilog na kalibutan.
20 Pagtapos ta anaw, Noe gaumpisa na manguma isab daw gatanem kanen an ta ubas. 21 Natabo na gainem kanen ta inemen na buat alin ta ubas daw ningaw kanen an. Galubbas kanen an ta iya na bayo daw gatunuga na palaw naan ta selled ta balay din na turda. 22 Ham na amay Canaan gaselled ta balay na turda daw nakita din na amay din an palaw. Gagwa kanen daw gasugid ta mga utod din. 23 Pagmati Sem daw Jafet, gakamang danen ta isya na pangtageb daw pabetang danen naan ta iran na tudtod. Gatalikod danen an na gaselled naan ta balay na turda daw patageban danen iran na amay. Ula danen an gablikid aged dili danen makita iran na amay na palaw. 24 Na nampawan Noe i daw nlaman din na Ham na kamangnguran din na bata nakasala ki kanen, 25 gambal Noe parti ta bata Ham,
“Sumpaen ko Canaan an.
Kanen magsirbi ta mga utod din
bilang pinakakebes na ulipen.”
26 Ambal pa Noe,
“Dayawen GINUO an. Kanen Dyos na pasirbian Sem.
Canaan an magsirbi ki Sem bilang ulipen.
27 Kabay pa na patamaen ta Dyos mga linai Jafet
daw magdugang iran na basak.
Mga linai Jafet mag-istar duma ta
mga linai Sem naan ta iran na lugar.
Canaan an magsirbi ki Jafet bilang ulipen.”