Pag-ubbas Ta Waig Ta Anaw
8
Dyos an ula nalipat ki Noe daw tanan na mga ayep na duma din naan ta sakayan. Gapadala Dyos an ta angin na gaeyep naan ta kalibutan daw waig ya gaamat-amat ta ubbas. 2 Gauntat pagpuswak ta waig alin ta mga tuburan naan ta dalem ta basak daw gaulaw en sikad an dakmel na uran. 3 Gapadayon ta pag-ubbas waig ya seled ta sinto singkwinta na adlaw. 4 Ta pangdisi-syiti na adlaw ta pangpitto na bulan, nabara sakayan danen naan ta kabukiran na lugar ta Ararat. 5 Gapadayon pa gid ta pag-ubbas waig ya asta ta una na adlaw ta pangsampulo na bulan. Ta yon man na adlaw, gagwa en apaw ta mga bukid.6 Pagtapos ta kwarinta pa na adlaw pabukasan Noe tumbuan ta sakayan. 7 Gapalayog kanen ta uwak daw uwak ya sigi balik ta layog asta na mubbas waig. 8 Gapalayog man kanen ta salampati aged mlaman din daw ubbas en waig daw may mara en na basak. 9 Piro, ula may nakita salampati an na tugdunan tak basak an nasanapan pa ta waig. Gabalik salampati ki Noe naan ta sakayan daw pagawat din na paselled. 10 Gatagad Noe ta pitto pa na adlaw bag-o palayog din isab salampati alin ta sakayan. 11 Pag-abot ta semsem, gabalik salampati ki Noe daw may dala na daon ta kaoy na olibo na bag-o nang pa sanggi. Yon na nlaman Noe na waig an ubbas en. 12 Gatagad eman Noe ta pitto pa na adlaw daw palayog din isab salampati ya. Piro, ula en gabalik salampati ya ki kanen.
13 Na gaidad Noe ta sais sintos uno na taon, ta yon man na taon ta una na adlaw ta una na bulan, waig ya ubbas en. Pabukasan Noe parti ta atep ta sakayan ya daw naan dya gatan-aw kanen ta palibot. Nakita din na mara en apaw ta basak. 14 Pag-abot ta pangbinti-syiti na adlaw ta pangarwa na bulan, basak an ubos en ta mara. 15 Dyos an gambal ki Noe, 16 “Mawas ka en daw imo na sawa, mga bata nyo daw iran na sawa. 17 Kawasen no man naan ta sakayan tanan na mga duma ki kaon na mga yupan daw mga ayep na darko daw derse aged magtama danen daw maglapta naan ta bilog na kalibutan.” 18 Pag-ambal ta Dyos, gakawas Noe daw iya na pamilya. 19 Pakawas danen alin ta sakayan tanan na mga klasi ta mga may kabui na naan gistar ta basak na yon man mga ayep na darko daw derse, daw mga yupan man. Pakawas danen mga ayep daw yupan na gagrupo-grupo dipindi ta iran na klasi.
20 Gabuat Noe ta alaran na bato daw gakamang kanen ta mga ayep daw mga yupan na alin ta klasi na pwidi kan-enen. Paiyaw din daw pasunog din naan ta alaran aged ialad naan ta GINUO. 21 Nalipay GINUO an ta ammot ta alad Noe. Ambal GINUO ta iya na kaugalingen, “Dili ko en isab samaren kalibutan na bilang silot ko ta mga ittaw tenged ta iran na mga buat na malain. Alin pa ta bata danen an, tanan na isip danen malain. Dili ko en isab patayen tanan na mga may kabui paryo ta pabuat ko. 22 Mintras na gapadayon pa kalibutan, dili muntat na may adlaw daw kilem, may tagtanem daw tag-ani, may tagdangga daw tagtignaw daw may tag-uran daw tag-adlaw.”