Anaw Na Galapaw Ta Bilog Na Kalibutan
7
Na tapos en Noe ta pagbuat ta sakayan na pangdagat, gambal GINUO ki Noe, “Makay ka daw imo na pamilya naan ta sakayan tak ta tanan na mga ittaw ta yi na timpo, kaon nang nakita ko na matareng. 2 Magkarga ka ta pitto paris ta tanan na mga klasi ta ayep na pwidi kan-enen daw isya na paris ta tanan na mga klasi ta ayep na bawal kan-enen 3 daw pitto paris ta tanan na mga klasi ta yupan aged may mabilin na mabui daw magtama isab naan ta kalibutan. 4 Daw matapos pitto na adlaw, uranen ko bilog na kalibutan seled ta kwarinta na adlaw daw kwarinta na kilem. Patayen ko tanan na mga may kabui na pabuat ko naan ta kalibutan.” 5 Pagtapos ta ambal ta GINUO, patuman Noe tanan din na sugo.6 Ta timpo na gabot anaw ya na galapaw ta bilog na kalibutan, idad Noe sais sintos na taon. 7 Bag-o mag-umpisa anaw ya, gasakay Noe daw iya na pamilya aged malibri danen ta anaw. 8 Tanan na mga klasi ta ayep bisan bawal o dili bawal kan-enen, daw tanan na mga klasi ta yupan daw mga ayep man na derse 9 gaparis-paris na gaselled naan ta sakayan na duma ki Noe paryo ta sugo ta Dyos. 10 Paglambay ta pitto na adlaw, gaumpisa ta uran daw gaumpisa man en maglapaw waig an naan ta bilog na kalibutan.
11 Ta pangdisi-syiti na adlaw ta pangarwa na bulan ta yon man na taon na gaidad Noe ta sisintay-sais na taon, gulpi gapuswak waig an ta sikad biskeg alin ta mga tuburan na naan ta dalem ta basak daw gauran ta sikad dakmel paryo ta waig na pabubo. 12 Sigi nang uran seled ta kwarinta na adlaw daw kwarinta man na kilem. 13 Piro, ta yon man na mga adlaw na gabot anaw na maglapaw ta bilog na kalibutan, Noe ya daw sawa din daw iya na mga bata na danen Sem, Ham, daw Jafet daw iran na mga sawa naan en ta sakayan ya. 14-15 Gaselled man naan ta sakayan duma ki danen mga may kabui na gaparis-paris: tanan na mga klasi ta ayep na naan ta blasan, kakauyan, kabatuan, daw tanan na mga klasi ta ayep na daram daw derse daw tanan man na mga klasi ta yupan. 16 Tanan danen naan en ta sakayan paryo ta sugo ta Dyos ki Noe daw pasaraan ta GINUO gangaan an ta sakayan.
17 Seled ta kwarinta na adlaw gadatas na gadatas waig an asta tanan an na basak nalapawan ta waig. Sakayan danen Noe galuttaw sunod ta waig na gadatas. 18 Mintras na waig an gadatas pa gid, dayad pagluttaw-luttaw ta sakayan ya. 19 Waig an padayon na gadatas asta na pinakadatas na mga bukid ta bilog na kalibutan nalapawan. 20 Gadatas pa gid waig an na lapaw ya mga appat duppa alin ta ugbos ta mga bukid. 21 Tanan na mga may kabui na gistar naan ta basak napatay: mga yupan, mga ayep na daram, mga ayep na naan ta blasan, kakauyan, daw kabatuan daw tanan na mga ayep na derse daw mga ittaw man. 22 Napatay tanan gid en na mga may kabui na naan ta basak 23 tenged papatay ta Dyos paagi ta anaw bisan ino na naan ta apaw ta basak naan ta bilog na kalibutan na yon man mga ittaw, mga ayep na darko daw derse, daw mga yupan man. Noe nang daw mga duma din na naan ta sakayan nalibri. 24 Gaanaw kalibutan seled ta sinto singkwinta na adlaw.