Pagpadayon Pa Gid Ta Mga Ittaw Ta Pagbuat Ta Malain
6
Mga ittaw gatama na gatama daw galapta ta bilog na kalibutan. Tama mga bata danen na bai. 2 Ta yon man na timpo may mga mama na darko daw biskeg gid. Nakita danen na dayaw mga bai daw pasawa danen mga bai na naliagan danen.3 GINUO an gambal, “Dili dayad daw tugutan ko mga ittaw na mabui ta sikad lugay tak danen ittaw nang. Umpisa anduni, kabui ta mga ittaw asta nang en ta sinto binti na taon.”
4 Mga bai ya na pasawa ta mga mama na darko, danen an gabata. Iran na mga bata bantog daw iseg ta pagtubang ta gira ta yo na timpo. Danen an mga Nefilim.
5 Nakita ta GINUO na pirmi malain mga buat, isip daw plano ta mga ittaw. 6 Ganelsel GINUO na gabuat kanen ta mga ittaw daw paistar din naan ta kalibutan. Sakit gid beet din daw nasebean ta usto. 7 Gambal GINUO, “Patayen ko tanan na mga ittaw na pabuat ko, mga ayep daw mga yupan tak ganelsel a ta pagbuat ko ki danen.” 8 Piro, Noe nang gasunod ta liag ta GINUO daw GINUO an pirmi gaubay ki kanen.
Sugo Ta Dyos Ki Noe
9 Yi sulat parti ki Noe. Ta tanan na mga ittaw ta timpo Noe, kanen nang matareng daw ula may masaway ki kanen. Gasunod gid kanen ta liag ta Dyos. 10 Noe an may tallo na bata na mama: Sem, Ham daw Jafet.
11 Noe nang matareng tak duma na mga ittaw naan ta bilog na kalibutan sikad malain iran na batasan naan ta pagtan-aw ta Dyos. Sikad malain iran na mga buat naan ta mga paryo danen na ittaw. 12 Nakita ta Dyos na lain gid en kaimtangan ta kalibutan tenged tanan na mga ittaw gasunod ta malain na batasan na kuntra ta iya na liag. 13 Gambal Dyos ki Noe, “Gadisisyon a na patayen ko tanan na mga ittaw daw samaren ko man bilog na kalibutan tak lain gid en kaimtangan ta kalibutan tenged tanan na mga ittaw gasunod ta malain na batasan na kuntra ta ake na liag. 14 Magbuat ka ta bakod na sakayan na pangdagat na alin ta kaoy na sipres daw betangan no ta mga elet. Sakayan an balawan no ta alkitran naan ta selled daw gwa. 15 Iling ti kalangkawen ta sakayan ya, sitintay-tris duppa. Kawayangen an dusi duppa daw kadatasen din pitto duppa. 16 Atepan no daw antaran ta tallo dangaw sablayan an daw dingding. Buatan no ta tallo na papag daw isya na gangaan naan ta kilid. 17 Gasugo a ki kaon na magbuat ta sakayan na pangdagat tenged magpadala a ta anaw na maglapaw ta bilog na kalibutan aged mapatay tanan na mga may kabui. 18 Piro, magpangako a ki kyo na luwasen ta kyo. Daw tapos en pabuat no na sakayan, makay ka daw sawa no, mga bata nyo daw iran na sawa. 19-20 Magkarga ka ta isya na paris ta tanan na mga klasi ta ayep daw yupan, mga darko daw derse, aged danen maluwas man. 21 Tanan na mga klasi ta pagkaan tipunon no daw karga no para may kan-enen kaw daw mga duma nyo na ayep.” 22 Patuman Noe tanan na mga sugo ta Dyos ki kanen.