Mga Linai Adan
5
1-2 Yi sulat parti ta mga linai Adan. Na pabuat ta Dyos mga ittaw, pabuat din danen an na mama daw bai daw paryo man ki kanen. Umaw din an ki danen “ittaw” daw pabindisyunan din danen an. 3 Na gaidad Adan ta sinto trinta na taon, gabata sawa din ta mama. Pangaranan Adan bata an na Set daw Set an suot gid ki kanen. 4 Alin ta pagtao Set, utso sintos pa na taon nadugang ta kabui Adan bag-o kanen napatay daw ta yon na mga tinaon may mga bata pa kanen an na mga mama daw mga bai. 5 Napatay Adan ta idad na nuibi sintos trinta.6 Na gaidad Set ta sinto singko na taon, gabata sawa din ta mama daw pangaranan danen na Enos. 7 Alin ta pagtao Enos, utso sintos syiti pa na taon nadugang ta kabui Set bag-o kanen napatay daw ta yon na mga tinaon may mga bata pa kanen an na mga mama daw mga bai. 8 Napatay Set ta idad na nuibi sintos dusi.
9 Na gaidad Enos ta nubinta na taon, gabata sawa din ta mama daw pangaranan danen na Kenan. 10 Alin ta pagtao Kenan, utso sintos kinsi pa na taon nadugang ta kabui Enos bag-o kanen napatay daw ta yon na mga tinaon may mga bata pa kanen an na mga mama daw mga bai. 11 Napatay Enos ta idad na nuibi sintos singko.
12 Na gaidad Kenan ta sitinta na taon, gabata sawa din ta mama daw pangaranan danen na Mahalalel. 13 Alin ta pagtao Mahalalel, utso sintos kwarinta pa na taon nadugang ta kabui Kenan bag-o kanen napatay daw ta yon na mga tinaon may mga bata pa kanen an na mga mama daw mga bai. 14 Napatay Kenan ta idad na nuibi sintos dyis.
15 Na gaidad Mahalalel ta sisintay-singko na taon, gabata sawa din ta mama na pangaranan danen na Jared. 16 Alin ta pagtao Jared, utso sintos trinta pa na taon nadugang ta kabui Mahalalel bag-o kanen napatay daw ta yon na mga tinaon may mga bata pa kanen an na mga mama daw mga bai. 17 Napatay Mahalalel ta idad na utso sintos nubintay-singko.
18 Na gaidad Jared ta sinto sisintay-dos na taon, gabata sawa din ta mama daw pangaranan danen na Enoc. 19 Alin ta pagtao Enoc, utso sintos pa na taon nadugang ta kabui Jared bag-o kanen napatay daw ta yon na mga tinaon may mga bata pa kanen an na mga mama daw mga bai. 20 Napatay Jared ta idad na nuibi sintos sisintay-dos.
21 Na gaidad Enoc ta sisintay-singko na taon, gabata sawa din ta mama daw pangaranan danen na Metusela. 22 Alin ta pagtao Metusela, tris sintos pa na taon nadugang ta kabui Enoc bag-o kanen pakamang ta Dyos daw ta yon na mga tinaon may mga bata pa kanen an na mga mama daw mga bai. Nangabui Enoc na Dyos an pirmi gaubay ki kanen daw kanen an pirmi gasunod ta liag ta Dyos. 23 Idad ya Enoc kabot ta tris sintos sisintay-singko na taon. 24 Mintras Enoc nangabui na pirmi paubayan ta Dyos, gulpi nang Enoc an narwad tak padala ta Dyos na duma ki kanen.
25 Na gaidad Metusela ta sinto utsintay-syiti na taon, gabata sawa din ta mama na pangaranan danen na Lamec. 26 Alin ta pagtao Lamec, syiti sintos utsintay-dos pa na taon nadugang ta kabui Metusela bag-o kanen napatay daw ta yon na mga tinaon may mga bata pa kanen an na mga mama daw mga bai. 27 Napatay Metusela ta idad na nuibi sintos sisintay-nuibi.
28 Na gaidad Lamec ta sinto utsintay-dos na taon, gabata sawa din ta mama 29 daw pangaranan din na Noe. Ambal din, “Yi na bata mag-atag ki kiten ta kalipaya ta ate na pangabellay ta panguma ta basak na pasumpa kan-o ta GINUO.” 30 Alin ta pagtao Noe, kinintos nubintay-singko pa na taon nadugang ta kabui Lamec bag-o kanen napatay daw ta yon na mga tinaon may mga bata pa kanen an na mga mama daw mga bai. 31 Napatay Lamec ta idad na syiti sintos sitintay-syiti.
32 Na idad Noe subla en kinintos na taon, natao bata danen na Sem, Ham daw Jafet.