Genesis 4

Cain daw Abel

Magsawa na Adan daw Eva gadumaay. Eva an gabagnes daw gabata kanen ta mama na pangaranan danen na Cain. Ambal Eva, “Kaangken^a a ta bata na mama paagi ta tabang ta GINUO.” 2 Namangnguran Cain an tak gabata isab Eva ya daw pangaranan danen bata ya na Abel. Na gabakod en danen an na mag-utod, Abel an gasagod ta mga karniro daw Cain an a ganguma. 3 Na abot timpo ta tag-ani, may parti na alin ta ani Cain na paalad din naan ta GINUO. 4 Abel an a, may mga una na bata ta iya na mga karniro na paiyaw din daw pinakadayad an na parti ta karni paalad din naan ta GINUO. Nalipay GINUO an ki Abel daw ta iya an na alad. 5 Piro, ula nalipay GINUO ki Cain daw ta iya an na alad. Sikad gid gilek Cain daw gangusmod gid. 6 Gambal GINUO ki Cain, “Man-o tak gagilek ka daw gangusmod? 7 Daw igo imo na mga pabuat, batunon ta kaw. Piro, daw malain mga buat no, pirdien ka nang ta sala. Sala an paryo ta manekeb na ayep na gakeeb naan ta gangaan na alisto magtekeb ki kaon. Piro, dapat na pirdien no sala an.”

8 Cain gambal ki Abel, “Mos, miling ki naan uma.” Na naan danen ta uma, nali nang pabira Cain utod din an na Abel daw papatay.

9 Isya adlaw pagtapos ta pagpatay Cain ki Abel, gainsa GINUO an ki Cain, “Indya utod no na Abel?” Sabat Cain, “Inday! Man-o, yaken manugbantay ki kanen?”

10 GINUO an gambal ki Cain, “Man-o tak gabuat ka ta sikad malain? Na nakita ko lengngessa ta utod no naan ta basak, paryo namatian ko na gasinggit kanen na males. 11 Silutan ta kaw tak papatay no utod no na gatulo lengngessa din naan ta basak. Umpisa anduni dili ka en kanguma. 12 Daw manguma ka, ula may magtubo daw sigi ka nang na salyo-salyo ta lugar daw ula ka man maistaran.”

13 Ambal Cain ta GINUO, “Dili ko masarangan agwantaen silot na ipaagem no ki yaken tak sikad bellay. 14 Ambal no na malin a ta yi na basak na magpadyo a ki kaon. Ula a lugar na maistaran daw sigi a nang magsalyo-salyo ta lugar. Bisan kino kakita ki yaken, patayen a danen.”

15 Ambal ta GINUO ki Cain, “Dili ka danen patayen tak bisan kino magpatay ki kaon, balesan ko ta pitto isleb.” Yon na pamarkaan Cain an ta GINUO para paandaman mga ittaw na kakita ki kanen na dili kanen patayen. 16 Galin Cain an naan ta tubangan ta GINUO daw gatinir kanen naan ta lugar na Nod na dapit ta sennangngan ta Eden.

Mga Linai Cain

17 Cain daw iya na sawa gadumaay. Gabagnes sawa Cain daw gabata ta mama na pangaranan danen na Enoc. Gatukod Cain ta banwa na palibutan ta padir daw pangaranan din na Enoc na yon man ngaran ta iya na bata. 18 Enoc an may bata na mama na iya na ngaran Irad. Irad amay Mehujael daw Mehujael amay Metusela daw Metusela amay Lamec. 19 Gangasawa Lamec ta darwa na bai, Ada daw Sila. 20 Ada i gabata daw iya na bata pangaranan danen na Jabal. Jabal an una ta tanan na mga ittaw na gaistar naan ta balay na turda daw gasagod ta mga ayep. 21 Utod din na mama Jubal. Jubal an una ta mga ittaw na sagad magtukar ta mga instruminto na arpa daw plawta. 22 Sila i gabata daw iya na bata pangaranan danen na Tubal-Cain. Tubal-Cain an una ta mga ittaw na gabuat ta mga gamit na brunsi daw salsalen. Ngaran ta utod Tubal-Cain na bai Naama.

23 Lamec i gambal naan ta darwa din na sawa, “Ada daw Sila, mamati kaw ki yaken. Daw may manakit ki yaken, bisan bata pa, patayen ko kanen an. Nyan na kapatay a ta mama na bata pa. 24 Gambal Dyos an kan-o na daw may magpatay ki Cain, balesan din ta pitto na isleb. Anduni, gambal a na bisan kino na manakit ki yaken, balesan ko man ta sitintay-syiti na isleb.”

Set Daw Enos

25 Magsawa na Adan daw Eva gadumaay isab. Gabagnes Eva an daw gabata ta mama na pangaranan din na Set. Ambal Eva, “Paatagan a ta Dyos ta bata na mama aged sal-i ki Abel tak kanen ya papatay Cain.” 26 Na may sawa en Set an, gabata sawa din ta mama. Pangaranan Set bata an na Enos. Ta yon man na timpo gaumpisa mga ittaw ta pagsimba ta Dyos paagi ta paggamit ta ngaran na GINUO.