2 Sabat ta bai, “Pwidi kay magkaan ta bunga ta mga kaoy naan ta gardin. 3 Piro, bunga ta kaoy na naan ta tengnga ta gardin gambal Dyos an na dili kay magkaan. Daw magkaan kay ta bunga ta yi na kaoy, bisan magtandeg nang, mapatay kay.”

4 Sabat ta bekkessan, “Dili matuod nyan. Dili kaw mapatay. 5 Iling tan ambal ta Dyos ki kyo tak nlaman din na daw magkaan kaw ta yon na bunga, maangken nyo pag-intindi na magparyo kaw ki kanen na mlaman nyo daw ino miad an daw malain.”

6 Pag-ambal ta bekkessan, patan-aw ta bai kaoy an naan ta tengnga ta gardin daw nakita din na sikad dayad lagen mga bunga an daw dayad kan-enen. Gaandem kanen an na mlaman din daw ino miad an daw malain. Gaipo kanen ta bunga daw pakaan. Paatagan din man iya na sawa daw gakaan man. 7 Tapos danen kaan, may anen danen an pag-intindi daw namasmasan danen na palaw danen an. Gakamang danen ta lapad na mga daon ta kaoy na igos daw patambi-tambi aged tageb ta iran na mga lawa.

8 Na gasemsem en, namatian danen GINUO Dyos an na gapanaw naan ta gardin. Gatago danen naan ta mga puon ta kaoy aged dili danen makita ta GINUO Dyos. 9 Paumaw ta GINUO Dyos mama an daw painsaan din, “Indi ka?” 10 Sabat ta mama, “Namatian ta kaw na gapanaw ka naan ta gardin i. Piro, gatago a tak nadlek a ki kaon tenged palaw a.” 11 Painsaan ta Dyos mama an, “Man-o tak nlaman no na palaw ka? Kino gambal ki kaon? Beet ambalen gakaan ka ta bunga ta kaoy ya na pambal ko na dili nyo kan-enen?” 12 Sabat ta mama, “Bai na paatag no na duma ki yaken, kanen gaatag ta bunga ki yaken daw gakaan a man.”

13 Ambal ta GINUO Dyos naan ta bai, “Man-o tak iling tan pabuat no?”

Sabat ta bai, “Paluko a ta bekkessan. Nyan na gakaan a.”

14 Gambal GINUO Dyos naan ta bekkessan, “Ta tanan na mga ayep na daram daw ila, kaon gid silutan ko. Bilog no na kabui, magsaguyod lawa no naan ta basak daw magkaan ka man ta yab-ok.” 15 Ambal pa ta Dyos naan ta bekkessan, “Kaon daw bai magkuntraay. Mga linai din daw imo man na mga linai magkuntraay man. Mga linai din magpakang ta ulo no daw kaon magkagat man ta iran na kitin.”

16 Gambal Dyos naan ta bai, “Dugangan ko imo na kabellay ta imo na pagbagnes daw maliseran ka gid ta imo na pagbata. Piro, mag-andem ka pa gyapon ta sawa no daw kanen an magdumala ki kaon.”

17 Gambal Dyos naan ta mama, “Tenged gapati ka ta sawa no daw gakaan ka ta bunga na pabawal ko, sumpaen ko basak bilang silot ki kaon. Bilog na kabui no, mangabellay ka para may kan-enen. 18 Magtubo daw magtama naan ta basak mga lamunon na telleken daw sampinit. Daw ino na magtubo alin ta basak yon inyo na pagkaan. 19 Manlasan ka gid ta pag-ubra aged may kan-enen ka. Iling tan imo na pag-ubra asta mapatay ka daw lawa no malunot na malik ta basak tak pabuat ko kaon yan alin ta basak.”

20 Ngaran an ta mama Adan^a daw pangaranan din iya na sawa na Eva na beet ambalen manug-atag ta kabui tak kanen inay ta tanan na mga ittaw. 21 Pabuatan ta GINUO Dyos magsawa an ta bayo alin ta langgit ta mga ayep daw paatag din ki danen.

22 GINUO Dyos gambal, “Anduni, danen Adan gaparyo en ki kiten tak nlaman danen en parti daw ino miad daw malain. Dapat na dili en danen an kaipo daw kakaan ta bunga ta kaoy na gaatag ta kabui tak daw kakaan danen an, mabui danen ta ula katapusan.”

23 Tenged dili miag Dyos an na magkaan danen an ta bunga ta kaoy ya, papaalin din danen an naan ta gardin ta Eden daw naan ta gwa ta Eden magkultibar ta basak. Basak pagamit ta Dyos ta pagbuat ki Adan daw basak man papakultibar din ki Adan para may pagkaan danen an na magsawa. 24 Na papaalin danen an ta Dyos, pabetang ta Dyos naan ta sennangngan ta Eden mga manugbantay na paumaw na kerubin. Pabetang din man dya isya na ispada na gadaba-daba na galiso-liso aged bisan kino dili kaprani ta kaoy an na gaatag ta kabui.