2
Iling tan pagbuat ta Dyos ta kalangitan, kalibutan daw tanan na anen don. 2 Ta pangpitto na adlaw, natapos ta Dyos iya ya na mga pagbuat. Ta yon man na adlaw gapuay kanen en ta pagbuat din ta tanan tak tapos en. 3 Pabuat din pangpitto na adlaw na ispisyal na adlaw para magpuay tak naan ta pangpitto na adlaw gapuay kanen ta pagbuat din ta kalangitan, kalibutan, daw tanan na anen don.4 Yon pagsaysay parti ta pagbuat ta Dyos ta kalangitan daw kalibutan.
Pagbuat Ta Dyos Ta Mga Ittaw
Ta timpo na GINUO Dyosa gabuat ta kalangitan daw kalibutan, 5 ula pa bisan ino na lamunon, kaoy daw tanem na gatubo naan ta basak tak ula pa pauran ta GINUO Dyos daw ula pa man mga ittaw na mag-uma. 6 Piro, may waig na gagwa naan alin ta dalem ta basak na gabasa ta tanan na mga basak.
7 Pagtapos ta GINUO Dyos ta pagbuat ta kalangitan daw kalibutan, gakamang kanen ta basak daw pakurti din na ittaw. Paginawaan din ittaw an naan ta irong aged tagan ta kabui daw ittaw an gabui en.
8 GINUO Dyos gabuat ta gardin naan ta lugar na Eden naan dapit ta sennangngan daw naan din dya pabetang ittaw an na pabuat din. 9 Naan ta gardin patubo ta GINUO Dyos tanan na mga klasi ta kaoy na dayad lagen na may bunga na dayad kan-enen. Naan man dya may darwa na puon ta kaoy na patubo din. Isya na kaoy gaatag ta kabui naan ta bisan kino na magkaan ta bunga. Isya an a na kaoy gaatag ta alam parti daw ino miad daw malain naan ta bisan kino na magkaan ta bunga. 10 May suba na gilig naan ta Eden na gaatag ta waig naan ta mga tanem daw naan ta gwa ta gardin, suba an gasanga ta appat. 11 Ngaran ta una na suba Pison. Galike-like suba an na Pison naan ta bilog na lugar na Havila. Naan ta Havila may anen mga blawan 12 daw blawan an dya sikad dayad na ula laket. May anen man dya mga maalen na bato na paumaw na onise daw mga tagek ta kaoy na pabuat na paammot. 13 Ngaran ta pangarwa na suba Gihon na galike-like naan ta lugar na Cus. 14 Ngaran ta pangallo na suba Tigris na gaagi naan ta sennangngan ta lugar na Asiria. Ngaran ta pang-appat na suba Eufrates.
15 Pagbuat ta GINUO Dyos ta ittaw an, pabetang din naan ta gardin ta Eden aged magkultibar daw mag-asikaso. 16 GINUO Dyos gambal naan ta ittaw an, “Pwidi ka magkaan ta bunga ta bisan ino na kaoy naan ta yi na gardin. 17 Piro, dili ka magkaan ta bunga ta kaoy na gaatag ta alam parti daw ino miad daw malain tak ta uras na kan-enen no, sigurado na mapatay ka.”
18 Ambal pa GINUO Dyos, “Dili miad na ittaw an isya nang na mangabui. Magbuat a ta duma din na bagay ki kanen daw magtabang ki kanen.”
19 Tanan na mga ayep daw mga yupan na pabuat ta GINUO Dyos alin ta basak, padala din naan ta ittaw aged mlaman din daw ino ngaran na iatag ta ittaw ki danen. Daw ino umaw ta ittaw ki danen, yon en iran na mga ngaran. 20 Tanan na mga ayep daw mga yupan paatagan ta ittaw ta ngaran, piro ula bisan isya ki danen na maduma din na bagay ki kanen daw makatabang ki kanen.
21 Tenged ittaw an ula maduma na bagay ki kanen, patunuga ta GINUO Dyos kanen an ta sikad meek daw pakamang isya din na gusok daw nina an paayad ta Dyos. 22 Pabuat ta GINUO Dyos na bai gusok an na nakamang din naan ta lawa ta mama daw padala din naan ta mama bai an na nabuat din. 23 Pagkita ta mama ta bai an, ambal din,
“Anduni may paryo man en ki yaken.
Bekkeg din alin ta ake na bekkeg
daw sapo din alin ta ake man na sapo.
Ngaranan ko kanen na baib
tak kanen nabuat alin ta mama.”
24 Yon tenaan na mama malin ta pudir ta iya na amay daw inay tak kanen daw iya na sawa magdumaay na danen na darwa mimo na isya.
25 Ta timpo na mama an daw sawa din naan ta gardin, palaw danen an, piro ula danen nagayya.