3 Dyos an gambal, “Magpawa.” Pag-ambal din, gapawa dayon. 4 Nadayaran kanen an ta nabuat din. Pabelag din pagpawa daw pagdelem. 5 Pagpawa an paumaw din na “adlaw” daw pagdelem an paumaw din na “kilem”. Galambay kilem daw adlaw. Natapos en una na adlaw.^a

6 Dyos an gambal, “Magbelag waig an aged may waig naan ta apaw ta kalibutan daw may waig man naan ta kalibutan.” 7 Pag-ambal din, natuman dayon. Iling tan na paagi pabuat ta Dyos kalangitan daw pabelag din waig aged may waig apaw ta kalibutan daw may waig man naan ta kalibutan. 8 Lugar an na naan ta tengnga ta apaw daw ebes na waig paumaw din na “kalangitan”. Galambay kilem daw adlaw. Natapos en pangarwa na adlaw.

9 Dyos an gambal, “Waig na naan dalem ta kalangitan magtingeb ta isya na lugar aged may mga lugar na mara.” Pag-ambal din, natuman dayon. 10 Mara na lugar paumaw din na “basak” daw gatingeb na waig paumaw din na “dagat.” Nadayaran kanen ta mga nabuat din. 11 Ambal din pa, “Magtubo naan ta basak lain-lain na mga tanem: mga lamunon daw tanem na may binni daw tanan na mga klasi ta kaoy na gamunga na may liso.” Pag-ambal din, natuman dayon. 12 Gatubo lain-lain na mga tanem: tanan na mga klasi ta mga lamunon daw tanem na may binni daw tanan man na mga klasi ta kaoy na gamunga na may liso. Nadayaran Dyos ta nabuat din. 13 Galambay kilem daw adlaw. Natapos en pangallo na adlaw.

14 Dyos an gambal, “Maggwa mga pawa na betang naan ta kalangitan para magbelag adlaw daw kilem daw para mlaman man kaumpisaan ta mga adlaw, bulan daw taon. 15 Yon na mga pawa na betang magpawa naan ta kalangitan aged mag-atag ta kapawa naan ta bilog na kalibutan.” Pag-ambal din, natuman dayon. 16 Pabuat din darwa na darko na betang na gapawa. Isya an na sikad pawa magpawa daw adlaw. Isya an a na dili sikad pawa magpawa daw kilem. Pabuat din man mga bituon. 17 Mga betang an na gapawa pabetang din naan ta kalangitan aged magsilak naan ta kalibutan i 18 para may magpawa ta adlaw daw kilem. Yon man pagpawa an daw pagdelem pabelag para daw adlaw pawa, piro daw kilem a delem. Nadayaran Dyos ta nabuat din. 19 Galambay kilem daw adlaw. Natapos en pang-appat na adlaw.

20 Dyos an gambal, “Maggwa tama na mga may kabui naan ta waig daw dagat. Maggwa man mga yupan na galayog naan ta kalangitan.” 21 Ta iya na pag-ambal, pabuat din sikad darko na mga ayep na naan ta dagat asta tanan na klasi ta mga may kabui na naan ta dagat daw waig. Pabuat din man tanan na mga klasi ta yupan. Nadayaran kanen ta mga nabuat din. 22 Pabindisyunan din mga may kabui na naan ta dagat daw mga yupan. Ambal din, “Mga may kabui na naan ta dagat, magtama kaw daw magpanen naan ta dagat. Mga yupan man, magtama kaw naan ta kalibutan i.” 23 Galambay kilem daw adlaw. Natapos en panglimma na adlaw.

24 Dyos an gambal, “Maggwa tanan na mga klasi ta ayep na naan ta basak: mga daram, mga derse, daw tanan na mga klasi ta ayep na naan ta blasan, kakauyan, daw kabatuan.” Pag-ambal din, natuman dayon. 25 Iling tan pagbuat ta Dyos ta tanan na mga klasi ta ayep na naan ta blasan, kakauyan, daw kabatuan daw tanan man na mga klasi ta ayep na daram daw derse. Nadayaran kanen ta mga nabuat din.

26 Dyos an gambal ta iya na kaugalingen, “Magbuat ki ta mga ittaw na danen an paryo ki kiten. Danen magdumala ta mga sidda naan ta dagat, mga yupan naan ta kalangitan, mga ayep na daram daw mga ayep na naan ta blasan, kakauyan, daw kabatuan daw duma pa na mga ayep na derse.” 27 Ta iya na pag-ambal, gabuat kanen ta ittaw^b na paryo ki kanen. Pabuat din mga ittaw na danen an mama daw bai. 28 Pabindisyunan din danen an na ambal din, “Magbata kaw daw magtama. Maglapta inyo na mga linai daw dumalaan danen bilog na kalibutan. Kyo na mga ittaw magdumala ta tanan na naan ta kalibutan na yon man mga sidda ta dagat, mga yupan ta kalangitan daw tanan na mga may kabui na naan ta basak.”

29 Ambal pa ta Dyos naan ta ittaw, “Anduni paatag ko ki kyo tanan na mga klasi ta mga lamunon daw tanem na may binni daw tanan man na mga klasi ta kaoy na gamunga na may liso para may kan-enen kaw. 30 Paatag ko mga tanem daw lamunon para may kan-enen tanan na mga ayep na naan ta blasan, kakauyan, daw kabatuan, mga yupan, mga derse na ayep daw tanan na mga may kabui na naan ta basak.” Pag-ambal din, natuman dayon. 31 Patan-aw ta Dyos tanan na mga nabuat din daw nadayaran gid kanen an. Galambay kilem daw adlaw. Natapos en pang-annem na adlaw.