Jun acꞌ satchaan̈ yedꞌ jun acꞌ yolyibꞌan̈qꞌuinal
21
Ix lajvi chiꞌ,
ix vilan jun acꞌ satchaan̈ yedꞌ jun acꞌ yolyibꞌan̈qꞌuinal.
Yujto a jun bꞌabꞌel satchaan̈ yedꞌ jun bꞌabꞌel yolyibꞌan̈qꞌuinal,
toxo ix sateli.
Yedꞌ aꞌ mar,
man̈xalaj aꞌ.
2 A in Juan in tic,
ix vil jun schon̈abꞌ Dios yicn̈ej yaji,
aton jun acꞌ Jerusalén.
Ix el dꞌa yichan̈ Dios dꞌa satchaan̈,
ix emuli.
Vachꞌxo yaj icha junoc ix ix vachꞌxo spichul ayochi,
yujto vanxo sbꞌat dꞌa yetbꞌeyum.
3 Axo ix vabꞌan yoch jun av dꞌa satchaan̈,
te chaan̈ ix yalaꞌ:
Inai,
a Dios ayecꞌ yedꞌ ebꞌ anima ticnaic.
Aꞌ ol cann̈ej yedꞌ ebꞌ.
Aton ebꞌ chiꞌ schon̈abꞌ yaji.
A val lacꞌan Dios chiꞌ ol cajnaj dꞌa scal ebꞌ,
aton val jun sDiosal ebꞌ.
4 Axo ol sucanel yal sat ebꞌ.
Ataꞌ man̈xalaj chamel,
ma oqꞌuel,
man̈xalaj cuscꞌolal,
man̈xa paxlaj yaelal.
Yujto a masanil tas ay dꞌa yalan̈,
toxo ix ecꞌbꞌati,
xchi.
5 A jun cꞌojanem dꞌa scꞌojnubꞌ ix alan icha tic:
Inai,
tzin bꞌo masanil tas acꞌto,
xchi.
Ix yalanpax dꞌayin:
Tzꞌibꞌejcan juntzan̈ van abꞌan tic,
yujto a juntzan̈ lolonel tic,
te yel.
Smojton val acꞌanoch yipoc a cꞌool,
xchi.
6 Ix lajvi chiꞌ ix yalanpax dꞌayin:
Toxo ix yicꞌ sbꞌa.
A in tic,
bꞌabꞌel vaj dꞌa smasanil,
slajvubꞌ in paxi.
Icha chabꞌ letra A yedꞌ Zeta,
icha chiꞌ vaji.
A ebꞌ stacji stiꞌ,
ol vacꞌ jun a aꞌ tzꞌelta dꞌa sjaj tzꞌacꞌan qꞌuinal dꞌa juneln̈ej yuqꞌuej ebꞌ.
Nabꞌan̈ej ol vacꞌ aꞌ dꞌa ebꞌ.
7 A ebꞌ tzꞌacꞌan techajoc,
ol scha masanil juntzan̈ tic ebꞌ dꞌayin.
Yujto a in tic,
sDiosal in ebꞌ.
Axo ebꞌ,
vuninal yaj ebꞌ.
8 Palta ay ebꞌ scomon xivi yedꞌ ebꞌ max yacꞌoch scꞌool dꞌayin,
ebꞌ chuc scꞌulej,
ebꞌ milumcham anima,
ebꞌ tzꞌem dꞌa ajmulal,
ebꞌ ajbꞌaal yedꞌ ebꞌ ajchum,
ebꞌ tzꞌem cuman dꞌa juntzan̈ comon dios yedꞌ masanil ebꞌ tzꞌesani,
a dꞌa yol jun cꞌacꞌ icha n̈ajabꞌ sqꞌue n̈iln̈on yoc calan yaj yedꞌ azufre ol scha spac ebꞌ,
aton jun schabꞌil chamel,
xchi Dios.
Jun acꞌ Jerusalén
9 A junoc ebꞌ ucvan̈ ángel edꞌjinacqꞌue uqueꞌ ucꞌabꞌ bꞌudꞌan yuj juntzan̈ slajvubꞌ yaelal ix alan dꞌayin icha tic:
—Con̈ vedꞌoc.
Ol in chꞌox jun ix ix dꞌayach,
aton jun ix ol nupnaj yedꞌ jun Calnel sbꞌi,
xchi.
10 Ix lajvi chiꞌ ix schꞌoxan junxo tas Yespíritu Dios dꞌayin,
ichato ix in yicꞌbꞌat jun ángel chiꞌ dꞌa jun jolom vitz te chaan̈.
Ataꞌ ix schꞌox jun nivan chon̈abꞌ Jerusalén dꞌayin,
aton jun yic Dios,
van yemta dꞌa satchaan̈ dꞌa yichan̈ Dios.
11 Toxon̈ej sveei jun chon̈abꞌ chiꞌ yuj stziquiquial Dios.
Toxon̈ej scopopi icha junoc qꞌuen qꞌueen caro stojol,
icha qꞌuen jaspe.
Lajan yilji icha qꞌuen nen,
scꞌaxpajecꞌ co sat dꞌa spatic.
12 Axo dꞌa stitac jun chon̈abꞌ chiꞌ oyanoch smuroal te chaan̈ yajqꞌuei,
lajchaveꞌ spuertail.
Junjun ángel ayecꞌ dꞌa junjun spuertail chiꞌ,
tzꞌibꞌabꞌilpaxoch sbꞌi lajchaveꞌ macan̈ ebꞌ yin̈tilal Israel dꞌa junjun puerta chiꞌ.
13 Ay oxeꞌ puerta bꞌaj sjavi cꞌu,
ay oxeꞌ dꞌa svachꞌ,
ay oxeꞌ dꞌa sqꞌuexan̈,
ay pax oxeꞌ bꞌaj tzꞌem cꞌu.
14 A smuroal chiꞌ,
aycanem lajchaveꞌ nivac qꞌueen yipumaloc.
Axo dꞌa sat junjun qꞌuen qꞌueen chiꞌ,
tzꞌibꞌabꞌiloch sbꞌi lajchavan̈ schecabꞌ jun Calnel sbꞌi chiꞌ.
15 A jun ángel van slolon vedꞌoc chiꞌ yedꞌnacqꞌue jun ehlabꞌ nabꞌa oro yic syechtej jun chon̈abꞌ chiꞌ yedꞌ spuertail yedꞌ pax smuroal.
16 A jun chon̈abꞌ chiꞌ,
lajann̈ej spacꞌul schan̈il.
Ix yechtan jun ángel chiꞌ yedꞌ jun yechlabꞌ chiꞌ.
Lajchaveꞌ mil estadio ix elcꞌoch junjun spacꞌul.
Ichapax chiꞌ sbꞌisul schaan̈il steel.
17 Ix lajvi chiꞌ,
ix yechtan jun smuroal chiꞌ.
144 codos ix elcꞌochi.
A jun yechlabꞌ jun ángel chiꞌ,
lajan yedꞌ yechlabꞌ anima scꞌanaꞌ.
18 A smuroal chiꞌ,
nabꞌa jaspe.
A jun chon̈abꞌ chiꞌ,
nabꞌa oro,
lajan yilji yedꞌ qꞌuen nen scꞌaxpajecꞌ co sat dꞌa spatic.
19 Axo juntzan̈ nivac qꞌueen aycanem yipumaloc yich chiꞌ,
tzijtum juntzan̈ qꞌuen qꞌueen caro stojol ayoch yelavoc.
A jun qꞌuen bꞌabꞌel,
nabꞌa jaspe qꞌueen.
Axo qꞌuen schabꞌil,
nabꞌa zafiro qꞌueen.
Axo qꞌuen yoxil,
nabꞌa ágata qꞌueen.
Axo qꞌuen schan̈il,
nabꞌa esmeralda qꞌueen.
20 Axo qꞌuen yoil,
nabꞌa ónice qꞌueen.
Axo qꞌuen svaquil,
nabꞌa cornalina qꞌueen.
Axo qꞌuen yuquil,
nabꞌa crisólito qꞌueen.
Axo qꞌuen svajxaquil,
nabꞌa berilo qꞌueen.
Axo qꞌuen sbꞌalun̈il,
nabꞌa topacio qꞌueen.
Axo qꞌuen slajun̈il,
nabꞌa crisoprasa qꞌueen.
Axo qꞌuen yuxluchil,
nabꞌa jacinto qꞌueen.
Axo qꞌuen slajchavil,
nabꞌa amatista qꞌueen.
21 Axo spuertail,
perlan̈ej slajchavil.
Junjun puerta junn̈ej perlail yaji.
A scalleal jun chon̈abꞌ chiꞌ,
nabꞌa oro,
icha yilji junoc nen scꞌaxpajecꞌ co sat dꞌa spatic.
22 Maj vil-laj junoc stemplo Dios dꞌa jun chon̈abꞌ chiꞌ,
yujto a Dios Cajal Syal yuj Smasanil yedꞌ jun Calnel sbꞌi chiꞌ ayn̈ejecꞌ dꞌa jun chon̈abꞌ chiꞌ.
23 A dꞌa jun chon̈abꞌ chiꞌ,
malaj tzꞌoch yoc cꞌu,
malaj pax tzꞌoch yoc qꞌuen uj,
yujto a Dios yedꞌ jun Calnel sbꞌi tzꞌacꞌan saquilqꞌuinal dꞌay.
24 Axo ebꞌ anima dꞌa junjun nación,
ol bꞌeyecꞌ ebꞌ dꞌa saquilqꞌuinal jun chon̈abꞌ chiꞌ.
Ol laj ja ebꞌ nivac yajal taꞌ,
ol laj yicꞌcot sbꞌeyumal ebꞌ yofrendaoc.
25 Axo spuertail jun chon̈abꞌ chiꞌ,
man̈xalaj bꞌaqꞌuin̈ ol macchajoc,
yujto cꞌualiln̈ej dꞌa masanil tiempo.
Man̈xalaj dꞌacꞌvalil.
26 A ebꞌ ol cot dꞌa junjun nación,
ol laj yicꞌcot sbꞌeyumal ebꞌ taꞌ.
27 Malaj junoc chucal ol cꞌoch dꞌa jun chon̈abꞌ chiꞌ.
Malaj junoc ebꞌ scꞌulan juntzan̈ tas qꞌuixvubꞌtac ol cꞌoch taꞌ.
Yedꞌ ebꞌ tzꞌesani,
toton malaj junoc ebꞌ ol cꞌoch taꞌ.
An̈ej ebꞌ tzꞌibꞌabꞌil sbꞌi dꞌa jun libro yic qꞌuinal dꞌa juneln̈ej,
an̈ej ebꞌ ol cꞌochoc.
A jun libro chiꞌ,
a jun Calnel sbꞌi ay yicoꞌ.