A jun mil abꞌil
20
Ix lajvi chiꞌ,
ix vilani,
ay jun ángel ix emta dꞌa satchaan̈.
Yedꞌnac sllaveal jun xabꞌ olan yedꞌ jun nivan cadena.
2 Ix syaman jun dragón.
A jun dragón chiꞌ,
aton jun yacꞌnacoch sbꞌa chanil dꞌa pecaꞌ,
aton jun scuch diablo,
ma Satanás.
Mil abꞌil ix tzecꞌchajcan yuj jun ángel chiꞌ.
3 Ix yumjicanbꞌat dꞌa yol jun xabꞌ chiꞌ.
Ix lajvi chiꞌ,
ix macjican stiꞌ jun xabꞌ chiꞌ yuj jun ángel chiꞌ.
Ix ochcan jun sello dꞌay,
yic max elta vin̈ Satanás chiꞌ yic vachꞌ max yal yacꞌji musansatil ebꞌ anima dꞌa junjun nación yuuj,
masanto ol tzꞌacvoc mil abꞌil chiꞌ.
Ayic ol lajvoc mil abꞌil chiꞌ,
ol jacchajqꞌueta vin̈ Satanás chiꞌ jabꞌocxo tiempoal.
4 Axo ix vilani,
ay juntzan̈ cꞌojnubꞌ.
Ataꞌ cꞌojjabꞌem juntzan̈ ebꞌ acꞌbꞌil yopisio schꞌolbꞌitan tas yaj ebꞌ anima.
Ix vilanxi spixan juntzan̈ ebꞌ tzepbꞌilel sjolom,
yujto yacꞌnac testigoal sbꞌa ebꞌ yuj Jesús,
yalannacpaxel slolonel Dios ebꞌ.
Aton ebꞌ chiꞌ maj yaqꞌuemlaj sbꞌa dꞌa jun Nocꞌ sbꞌi chiꞌ yedꞌ dꞌa jun yechel Nocꞌ chiꞌ.
Maj schaochlaj snumeroal sbꞌi Nocꞌ ebꞌ dꞌa snan̈al sat,
ma dꞌa scꞌabꞌ.
Axo ix vilani,
ix pitzvixi ebꞌ,
ix och ebꞌ yajalil yedꞌ Cristo mil abꞌil.
5 A juntzan̈ ebꞌ tic ix bꞌabꞌlaj pitzvixi.
Axo pax juntzan̈xo ebꞌ chamnac,
majto pitzvocxilaj ebꞌ masanto ix tzꞌacvi mil abꞌil chiꞌ.
6 Te vachꞌ yic ebꞌ ol bꞌabꞌlaj pitzvocxi,
yujto yicn̈ejton Dios yaj ebꞌ.
Man̈xalaj yalan yic jun schabꞌil chamel dꞌa yibꞌan̈ ebꞌ.
Ol acꞌjoc yopisio ebꞌ yoch sacerdoteal dꞌa Dios yedꞌ dꞌa Cristo.
Mil abꞌil ol yacꞌ yajalil ebꞌ yedꞌoc.
Ix acꞌji ganar vin̈ Satanás dꞌa juneln̈ej
7 Ayic ol tzꞌacvoc mil abꞌil chiꞌ,
axo sjacvixiqꞌueta vin̈ Satanás bꞌaj macancanem chiꞌ.
8 Ol acꞌjoc musansatil ebꞌ anima dꞌa masanil nación dꞌa yolyibꞌan̈qꞌuinal yuj vin̈.
Ol acꞌjoc pax musansatil jun scuch Gog yedꞌ jun scuch Magog yuj vin̈,
ol smolbꞌancot ebꞌ vin̈ yacꞌ oval.
Axo ebꞌ soldado chiꞌ,
te nivan sbꞌisul ebꞌ icha val yarenail stiꞌ aꞌ mar.
9 Ayic ol bꞌat ebꞌ yacꞌ oval chiꞌ,
ol macchajel sat lum luum yuj ebꞌ.
Ol cꞌoch oyan ebꞌ dꞌa jun slugar ebꞌ yic Dios macbꞌilxo yuuj,
aton jun chon̈abꞌ te xajan yuj Dios.
Axo dꞌa satchan̈ ol emta jun cꞌacꞌ dꞌa yibꞌan̈ ebꞌ soldado chiꞌ.
Ol tzꞌabꞌat ebꞌ smasanil.
10 Axo vin̈ diablo,
vin̈ ix acꞌan musansatil ebꞌ chiꞌ,
ol yumjoccanbꞌat vin̈ dꞌa yol jun cꞌacꞌ icha n̈ajabꞌ sqꞌue n̈iln̈on yoc calan yaj yedꞌ azufre,
aton bꞌaj yumbꞌilcanbꞌat jun Nocꞌ sbꞌi chiꞌ yedꞌ jun stzꞌac yalnacoch sbꞌa schecabꞌoc Dios.
Cꞌual dꞌacꞌval ol yabꞌ syail ebꞌ taꞌ dꞌa masanil tiempo.
Ol chꞌolbꞌitaj ebꞌ anima smasanil
11 Ix lajvi chiꞌ,
ix vilan jun nivan cꞌojnubꞌ te sac,
cꞌojanem Dios taꞌ.
Axo dꞌa yichan̈ chiꞌ,
ix satel yolyibꞌan̈qꞌuinal yedꞌ satchaan̈.
Man̈xa bꞌaj ix ilchaj jabꞌoc.
12 Ix vil ebꞌ chamnac smasanil,
lin̈jabꞌecꞌ ebꞌ dꞌa yichan̈ Dios,
ebꞌ nivac yelcꞌochi yedꞌ ebꞌ malaj yelcꞌochi.
Ix lajvi chiꞌ,
ix jacvi juntzan̈ chꞌan̈ libro.
Ay junxo chꞌan̈ ix jacvi,
aton chꞌan̈ yic qꞌuinal dꞌa juneln̈ej.
Ix chꞌolbꞌitaj tastac yaj junjun ebꞌ icha tas scꞌulej junjun,
icha yaj pax stzꞌibꞌchaj dꞌa juntzan̈ chꞌan̈ libro chiꞌ.
13 A aꞌ mar,
ix yacꞌ entregar masanil ebꞌ chamnac ayecꞌ dꞌa yol aꞌ.
Icha pax chiꞌ jun chamel yedꞌ jun bꞌaj ayecꞌ ebꞌ chamnac,
ix laj yacꞌ entregar jantacn̈ej ebꞌ chamnac ayecꞌ dꞌay.
Ix laj chꞌolbꞌitaj yaj ebꞌ smasanil,
ato syalaꞌ tastac scꞌulejnac junjun ebꞌ.
14 A jun chamel chiꞌ yedꞌ jun bꞌaj ayecꞌ ebꞌ chamnac,
ix yumjicanbꞌat dꞌa scal jun cꞌacꞌ icha n̈ajabꞌ sqꞌue n̈iln̈on yoc.
Aton jun cꞌacꞌ chiꞌ scuch schabꞌil chamel.
15 Masanil ebꞌ man̈ tzꞌibꞌabꞌiloc sbꞌi dꞌa jun chꞌan̈ libro yic qꞌuinal dꞌa juneln̈ej chiꞌ,
ix yumjicanbꞌat ebꞌ dꞌa scal cꞌacꞌ chiꞌ.