19
Ix lajvi chiꞌ,
ix vabꞌani ichato ix och sjaj jun nivan n̈ilan̈ anima dꞌa satchaan̈.
Te chaan̈ ix yal ebꞌ:
Aleluya.
A co Diosal ix acꞌan ganar.
Te nivan yelcꞌochi,
te ay spoder.
2 Tojoln̈ej ix yutej spensar schꞌolbꞌitan yaj icha val dꞌa smojal.
Yujto ix yacꞌ syaelal jun ix yajal ajmulal chiꞌ,
aton ix ix juanel ebꞌ anima dꞌa yolyibꞌan̈qꞌuinal yuj yajmulal.
A Dios ix acꞌanecꞌ spac dꞌa jun ix chiꞌ,
yujto ix miljicham ebꞌ tzꞌacꞌan servil Dios chiꞌ yuj ix,
xchi ebꞌ.
3 Ix lajvi chiꞌ,
ix laj yalanxi ebꞌ:
Aleluya.
Man̈xa bꞌaqꞌuin̈ ol lajvoc sqꞌue stabꞌil jun ix ajmul ix chiꞌ stzꞌai,
xchi ebꞌ.
4 Axo ebꞌ 24 ichamtac vinac yedꞌ ebꞌ chan̈van̈ querubín,
ix em cuman ebꞌ dꞌa yichan̈ Dios.
Ix yacꞌanem sbꞌa ebꞌ dꞌay,
aton jun cꞌojanem dꞌa scꞌojnubꞌ.
Ix yalan ebꞌ:
Amén.
Aleluya,
xchi ebꞌ.
5 Ix lajvi chiꞌ ix vabꞌan yoch jun av bꞌaj ay sdespacho Dios,
ix yalani:
Masanil ex tzeyacꞌ servil co Diosal,
ex xivnac ex dꞌay,
ex malaj eyelcꞌochi yedꞌ ex nivac eyelcꞌochi,
calec vachꞌ lolonel dꞌay,
xchi ebꞌ.
A qꞌuin̈ nupnajel yic jun Calnel sbꞌi
6 Axo ix vabꞌan junxo icha val yoch sjaj tzijtumal anima.
N̈ilili scꞌan̈ sjaj ebꞌ icha scꞌan̈ sbꞌey aꞌ nivac aꞌ.
Icha scꞌan̈ cꞌu te chaan̈ scꞌan̈i,
icha chiꞌ scꞌan̈ sjaj ebꞌ.
Ix yalan ebꞌ:
Aleluya.
Yujto a Cajal co Diosal Masanil Syal Yuuj ix el yich yacꞌan Yajalil.
7 Tzon̈ qꞌuechaan̈.
Ayocabꞌ co tzalajcꞌolal.
Calec vachꞌ lolonel dꞌay.
Yujto ix cꞌoch yorail yoch jun Calnel sbꞌi chiꞌ dꞌa nupnajel.
Axo ix ol och yetbꞌeyumoc,
toxo ix yacꞌ lista sbꞌa ix.
8 Toxo ix acꞌji yacꞌoch jun pichul te vachꞌ.
Te sac,
sveei,
xchi ebꞌ.
(A jun spichul sac chiꞌ,
syalelcꞌochi,
a svachꞌil ix acꞌji dꞌa ebꞌ yicxo Dios.)
9 Ix yalanxi jun ángel chiꞌ dꞌayin:
Tza tzꞌibꞌej juntzan̈ ol val tic:
A ebꞌ avtabꞌil dꞌa jun qꞌuin̈ nupnajel yic jun Calnel sbꞌi chiꞌ,
te vachꞌ yic ebꞌ,
icha chiꞌ tzutej a tzꞌibꞌani,
xchi.
Ix yalanxi dꞌayin:
A juntzan̈ lolonel tic,
te yel toni,
yic ton Dios,
xchi dꞌayin.
10 Ix lajvin̈ej chiꞌ,
ix in em cuman dꞌa yichan̈ jun ángel chiꞌ,
yic svalan in bꞌa dꞌay.
Palta ix yalan dꞌayin:
Man̈ utoc a bꞌa icha tic,
yujto a in tic edꞌoc,
quetchecabꞌvumal co bꞌa yedꞌ pax ebꞌ yicxo Dios tecꞌan syutej sbꞌa yacꞌan testigoal sbꞌa yuj Jesús.
An̈ej val dꞌa Dios tzaqꞌuem a bꞌa.
Yujto a yabꞌixal Jesús,
a tzꞌiptzitan ebꞌ schecabꞌ Dios,
xchi.
A jun ayqꞌue dꞌa yibꞌan̈ jun sacsac chej
11 Axo ix vilani,
jacan satchaan̈.
Ix vilan jun chej sacsac.
Axo jun ayqꞌue dꞌa yibꞌan̈,
Tzꞌeln̈ej Cꞌoch Tas Syalaꞌ,
icha chiꞌ sbꞌi.
Scuchanpax Yeln̈ej.
Yujto dꞌa stojolal schꞌolbꞌitej yaj ebꞌ anima,
syacꞌanpax oval.
12 Axo yol sat,
lajan icha yoc teꞌ cꞌacꞌ.
Tzijtum corona ayqꞌue dꞌa sjolom.
Ay jun bꞌi tzꞌibꞌabꞌiloch dꞌay to an̈ej val ojtannac.
13 Axo spichul ayochi,
ix bꞌon̈chaj yuj chicꞌ.
Axo sbꞌi,
aton Slolonel Dios.
14 Tzacꞌanoch ebꞌ soldado aj satchan̈ yuuj.
Te vachꞌ spichul ebꞌ ayochi,
te sacpax yilji.
Malaj jabꞌoc miic ayoch dꞌay.
Ayqꞌue ebꞌ yibꞌan̈ junjun schejal sacsac quilani.
15 Axo dꞌa yol stiꞌ jun bꞌaj tzacꞌanoch ebꞌ chiꞌ,
ayelta jun espada te jay ye,
yic steclabꞌan dꞌa junjun nación.
A ol och yajalil dꞌa ebꞌ yedꞌ jun sqꞌuen cꞌococh.
Icha stecꞌjiel yal sat teꞌ uva,
icha chiꞌ ol aj yoch syaelal ebꞌ yuuj.
Ol acꞌjoc val syaelal ebꞌ sicꞌlabꞌil yuj yoval scꞌool Dios,
aton masanil tas syal yuuj.
16 Axo dꞌa spichul dꞌa sat xubꞌ tzꞌibꞌabꞌiloch jun sbꞌi tic:
Sreyal ebꞌ rey,
Yajalil ebꞌ yajal,
xchi.
17 Axo ix vilani,
ay jun ángel lin̈anecꞌ dꞌa yibꞌan̈ yoc cꞌu.
Te chaan̈ ix yal dꞌa nocꞌ much tzꞌecꞌ jen̈en̈oc dꞌa satchaan̈:
Cotan̈ec,
ul molbꞌejec e bꞌa yuj jun nivan vael ol yacꞌ Dios.
18 Cotan̈ec e chi schibꞌejal ebꞌ rey,
ebꞌ yajal soldado yedꞌ ebꞌ soldado jelan.
Ol e chi schibꞌejal nocꞌ chej yedꞌ schibꞌejal ebꞌ ayqꞌue dꞌa yibꞌan̈ nocꞌ.
Ol e chin̈ej schibꞌejal ebꞌ smasanil,
ebꞌ yic sbꞌa,
ma ebꞌ checabꞌ yaji,
ebꞌ malaj yelcꞌochi,
ma ebꞌ nivac yelcꞌochi,
xchi dꞌa nocꞌ.
19 Ix lajvi chiꞌ,
ix vilani,
ayecꞌ jun Nocꞌ sbꞌi chiꞌ.
Aypaxecꞌ ebꞌ rey yic yolyibꞌan̈qꞌuinal yedꞌ ebꞌ soldado ebꞌ.
Ix laj smolbꞌan sbꞌa ebꞌ smasanil yic syacꞌan oval ebꞌ yedꞌ jun ayqꞌue dꞌa yibꞌan̈ chej yedꞌ ebꞌ soldado tzacꞌanoch yuuj chiꞌ.
20 Axo jun Nocꞌ sbꞌi chiꞌ ix bꞌabꞌlaj yamchaji.
Ix yamchajpax junxo stzꞌac yaloch sbꞌa schecabꞌoc Dios.
Aton jun chꞌoxjinac juntzan̈ milagro dꞌa yichan̈ Nocꞌ.
Yuj juntzan̈ milagro chiꞌ ix acꞌji musansatil ebꞌ chajinacoch yechel jun Nocꞌ sbꞌi chiꞌ dꞌay,
ebꞌ yacꞌnaquem sbꞌa dꞌa jun yechel Nocꞌ chiꞌ.
Aton ebꞌ chavan̈ tic pitzanto ix yumjibꞌat dꞌa yol jun cꞌacꞌ icha n̈ajabꞌ sqꞌue n̈iln̈on yoc calan yaj yedꞌ azufre.
21 Axo juntzan̈xo,
masanil ebꞌ ix miljicham yedꞌ jun espada ayelta dꞌa stiꞌ jun ayqꞌue dꞌa yibꞌan̈ chej chiꞌ.
Axo nocꞌ much smasanil,
ix laj bꞌudꞌji nocꞌ yuj schibꞌejal ebꞌ chiꞌ.