Satnaquel chon̈abꞌ Babilonia
18
Ix lajvi chiꞌ,
ix vilan junxo ángel ix cot dꞌa satchaan̈ ix em dꞌa yolyibꞌan̈qꞌuinal.
Te ay yopisio.
Ix sacbꞌi yolyibꞌan̈qꞌuinal yuj stziquiquial.
2 Te chaan̈ ix yalaꞌ:
Ix satel chon̈abꞌ Babilonia.
Malaj junocxo icha chiꞌ,
palta ix lajvieli.
Ix ochcan schon̈abꞌoc ebꞌ enemigo.
Toxo ix ochcan scajnubꞌoc ebꞌ espíritu chuc.
Ix ochcan soꞌoc nocꞌ much yajbꞌentac.
3 Yujto masanil nación ix och ucꞌuman̈il yuj svinoal te ov,
aton yajmulal.
Axo ebꞌ nivac yajal dꞌa yolyibꞌan̈qꞌuinal,
ix em ebꞌ dꞌa ajmulal yedꞌoc.
Axo masanil ebꞌ chon̈vajum,
ix och ebꞌ ricoal yuuj,
yujto man̈xo jantacoc tas ix sman ebꞌ aj chon̈abꞌ chiꞌ yic syacꞌan sgana ebꞌ,
xchi jun ángel chiꞌ.
4 Ix lajvi chiꞌ,
ix vabꞌan yoch junxo av dꞌa satchaan̈.
Ix yalani:
A exxo ex in chon̈abꞌ,
elan̈ec taꞌ,
yic vachꞌ man̈ ol ex och locan dꞌa masanil tas man̈ vachꞌoc tzꞌel scꞌulani,
yic man̈ ol ex tzꞌabꞌat eyabꞌan syail yedꞌoc.
5 Yujto a juntzan̈ smul chiꞌ,
ix te molchaji,
masanto ix qꞌueul dꞌa satchaan̈,
yuj chiꞌ ix najicot schucal chiꞌ yuj Dios.
6 Icha ix yutej sbꞌa dꞌa juntzan̈xo,
icha chiꞌ tzeyutej eyacꞌan spac dꞌay.
Tzꞌacan tzeyutej eyacꞌan spac dꞌay.
A jun yucꞌabꞌ ix yacꞌlabꞌej yacꞌan dꞌa juntzan̈xo chon̈abꞌ,
ecꞌalocabꞌto tzeyutej eyacꞌanxi dꞌay.
7 Yujto ix yicꞌchaan̈ sbꞌa sicꞌlabꞌil,
an̈ej dꞌa bꞌeyumal ix yacꞌoch spensar,
yuj chiꞌ icha chiꞌ tzeyutej eyacꞌanoch syaelal yedꞌ scuscꞌolal.
Ina to ix snaꞌ icha tic:
A in tic,
reina in.
Cꞌojan in em dꞌa in cꞌojnubꞌ.
Man̈ in lajanoc icha junoc ix ix chamnac yetbꞌeyum.
Malaj bꞌaqꞌuin̈ ol vil jabꞌoc syaelal,
xchi.
8 Yuj chiꞌ,
junn̈ej cꞌual ol aj sja yaelal dꞌa yibꞌan̈,
chamel,
oqꞌuel yedꞌ vejel.
Ol n̈usjoctzꞌa dꞌa scal cꞌacꞌ,
axo slajviel chiꞌ.
Icha chiꞌ ol aj sja dꞌa yibꞌan̈,
yujto ol chꞌolbꞌitaj yuj jun te nivan spoder,
aton Dios Cajal,
xchi jun av chiꞌ.
9 A ebꞌ nivac yajal dꞌa yolyibꞌan̈qꞌuinal,
ix em ebꞌ ajmulal yedꞌ jun ix ix chiꞌ.
Locan ebꞌ dꞌa sbꞌeyumal.
Axo ol yilan ebꞌ sqꞌue stabꞌil stzꞌai,
ol laj ocꞌ ebꞌ.
Ol laj siqꞌuicꞌoc ebꞌ yocꞌ yuj ix.
10 Najatto ol cotcan lin̈jabꞌ ebꞌ yuj xivelal yuj jun yaelal chiꞌ.
Ol yalan ebꞌ icha tic:
Ay...,
obꞌiltac jun nivan chon̈abꞌ Babilonia tic.
Te ay yip,
te nivan yelcꞌochi,
palta dꞌa val jun rato ix ja syaelal,
xchamxon̈ej ebꞌ.
11 Ol cus masanil ebꞌ chon̈vajum yuuj,
ol ocꞌ ebꞌ yujto man̈xalaj mach ol manan schon̈ ebꞌ chiꞌ.
12 A tastac ix schon̈ ebꞌ dꞌay:
Aton qꞌuen oro,
qꞌuen plata,
juntzan̈ qꞌuen caro stojol,
qꞌuen perla,
juntzan̈ cꞌapac lino te vachꞌ yedꞌ cꞌapac sera,
juntzan̈ cꞌapac qꞌuicꞌmutzꞌinac,
masanil te teꞌ sucꞌuqꞌui sjabꞌ,
masanil juntzan̈ tas sbꞌo yedꞌ marfil,
te teꞌ te ay stojol,
qꞌuen bronce,
qꞌuen hierro yedꞌ qꞌuen mármol.
13 Ay pax canela yedꞌ juntzan̈xo sumumi svaji,
ma yucꞌji yedꞌ pax juntzan̈ sucꞌuqꞌui sjabꞌ sn̈usji,
mirra yedꞌ yal sucꞌuqꞌui sjabꞌ.
Ay pax vino,
yaceiteal teꞌ olivo yedꞌ juntzan̈ harina te vachꞌ yedꞌ ixim trigo.
Ay nocꞌ cuchum icatz,
ay pax nocꞌ calnel yedꞌ nocꞌ chej.
Ay carreta.
Ay pax ebꞌ checabꞌ yaji.
Vachꞌchom anima ebꞌ,
palta schon̈jiel ebꞌ.
14 Ol yal ebꞌ chon̈vajum chiꞌ yuj jun chon̈abꞌ chiꞌ icha tic:
A val masanil tas te nibꞌabꞌil yuuj ix sateli.
Masanil sbꞌeyumal yedꞌ juntzan̈xo tas vachꞌ ix laj satpaxel smasanil dꞌa juneln̈ej,
xchi ebꞌ.
15 A ebꞌ ix chon̈an juntzan̈ chiꞌ,
aton ebꞌ ix laj och bꞌeyumal dꞌa spatic jun chon̈abꞌ chiꞌ,
najatto ol cotcan ebꞌ yuj xivelal yuj jun syaelal chiꞌ.
Ol laj ocꞌ ebꞌ.
Ol laj siqꞌuicꞌoc ebꞌ yoqꞌui.
16 Ol laj yal ebꞌ icha tic:
Ay...,
obꞌiltac val jun nivan chon̈abꞌ tic.
Lajan icha junoc ix ix a lino pichul ayoch yuuj.
Ay qꞌuicꞌmutzꞌinac.
Ay chacchac.
Nabꞌa oro,
qꞌuen qꞌueen sveei ayoch dꞌay.
Aypaxoch juntzan̈xo qꞌuen qꞌueen caro stojol yedꞌ juntzan̈ perla.
17 Palta junn̈ej rato ix lajviel masanil sbꞌeyumal jun chon̈abꞌ chiꞌ,
xcham ebꞌ.
Masanil ebꞌ yajal teꞌ barco yedꞌ ebꞌ ayoch dꞌa yol teꞌ yedꞌ ebꞌ smunlaj yedꞌ syamcꞌabꞌil teꞌ,
aton masanil ebꞌ smunlaj dꞌa aꞌ mar,
najatto ol cotcan ebꞌ smasanil.
18 Ayic ol yilan ebꞌ sqꞌue stabꞌil jun chon̈abꞌ chiꞌ stzꞌai,
ol avaj chaan̈ ebꞌ:
Malaj bꞌaj ay junoc chon̈abꞌ stzacꞌvan icha jun nivan chon̈abꞌ tic,
xcham ebꞌ.
19 Ol laj slan̈anqꞌue pococ ebꞌ dꞌa sjolom yuj scuscꞌolal.
Ol laj te ocꞌ ebꞌ.
Ol laj siqꞌuicꞌoc ebꞌ yoqꞌui.
Ol avaj chaan̈ ebꞌ:
Ay...,
obꞌiltac val jun nivan chon̈abꞌ tic.
Masanil ebꞌ ay sbarco dꞌa aꞌ mar,
ix laj och ebꞌ bꞌeyumal yuj masanil tastac ay dꞌay,
palta junn̈ej rato ix lajvieli,
xcham ebꞌ.
20 Ix vabꞌan yalchaji:
Ex aj satchaan̈,
tzalajan̈ec yuj tas ix utaj jun chon̈abꞌ tic,
yedꞌ ex schecabꞌ Jesucristo yedꞌ ex yalumalel slolonel Dios yedꞌ ex yic exxo Dios e masanil,
tzalajan̈ec.
Yujto icha ix ex yutej,
icha chiꞌ ix yutej Dios yacꞌan spac dꞌay,
xchi.
21 Ix lajvi chiꞌ,
ay jun ángel te ay spoder.
Ix yicꞌanchaan̈ jun nivan qꞌueen,
icha yaj suyan junoc qꞌuen smolinoal trigo.
Ix syumanbꞌat jun qꞌuen chiꞌ dꞌa yol aꞌ mar.
Ix yalani:
An̈ejtonaꞌ,
ichaton tic ol aj syumchajel jun nivan chon̈abꞌ Babilonia.
Man̈xa bꞌaqꞌuin̈ ol ilchaj junelxo.
22 Man̈xa bꞌaqꞌuin̈ ol abꞌchaj ebꞌ acꞌum son,
man̈xo ol abꞌchaj yoch junoc arpa,
ma yocꞌ junoc teꞌ amay,
ma qꞌuen trompeta.
Man̈xalaj junoc mach ol munlaj taꞌ.
Man̈xa bꞌaj ol abꞌchaj scꞌan̈ junoc qꞌuen molino.
23 Man̈xalaj bꞌaj ol checlaj yoc junoc lámpara,
man̈xa bꞌaqꞌuin̈ ol abꞌchaj yoch junoc qꞌuin̈ yic nupnajel.
Icha chiꞌ ol utaj jun chon̈abꞌ chiꞌ.
A ebꞌ chon̈vajum dꞌa yalan̈taxo,
te nivan yelcꞌoch ebꞌ dꞌa yolyibꞌan̈qꞌuinal.
Ix acꞌji musansatil junjun nación yuj yajchumal jun chon̈abꞌ chiꞌ.
24 A dꞌa jun chon̈abꞌ chiꞌ,
ataꞌ ix ilchaj schiqꞌuil ebꞌ ix alanel slolonel Dios yedꞌ schiqꞌuil juntzan̈xo ebꞌ yicxo Dios chiꞌ,
yedꞌ schiqꞌuil masanil ebꞌ milbꞌilcham dꞌa yolyibꞌan̈qꞌuinal.
Ol ochcan schiqꞌuil ebꞌ smasanil dꞌa yibꞌan̈ jun chon̈abꞌ chiꞌ,
xchi jun ángel chiꞌ.