3 Ix lajvi chiꞌ ix schꞌoxan junxo tas Yespíritu Dios dꞌayin,

ichato ix in yicꞌbꞌat jun ángel chiꞌ dꞌa tzꞌinan luum.

Axo taꞌ ix vil jun ix ix,

ayqꞌue dꞌa yibꞌan̈ jun Nocꞌ sbꞌi chacchac quilani.

Axo dꞌa snivanil jun Nocꞌ sbꞌi chiꞌ,

tzijtum sbꞌi tzꞌibꞌabꞌilochi.

A juntzan̈ bꞌi chiꞌ sbꞌuchvaj dꞌa Dios.

Uqueꞌ sjolom Nocꞌ.

Lajun̈eꞌ schꞌaac Nocꞌ.

4 Axo spichul jun ix ix chiꞌ,

qꞌuicꞌmutzꞌinac yedꞌ chacchac.

Tzijtum juntzan̈ qꞌuen qꞌueen tziquiqui ayoch dꞌay.

Ay qꞌuen oro,

qꞌuen perla yedꞌ juntzan̈xo qꞌuen te caro stojol ayoch dꞌay.

Yedꞌnacqꞌue jun vaso oro ix.

Bꞌudꞌan jun vaso chiꞌ yuj juntzan̈ tas yajbꞌentac dꞌa Dios yedꞌ pax schucal yajmulal ix.

5 Axo dꞌa snan̈al sat ix,

ataꞌ ayoch jun sbꞌi ix cꞌubꞌeltac yelcꞌochi,

aton jun tzꞌalan icha tic:

Aton jun nivan Babilonia,

snun ebꞌ ix ajmul ix smasanil.

Snun pax masanil chucal dꞌa yolyibꞌan̈qꞌuinal,

xchi.

6 Axo ix vilani,

ucꞌuman̈ ix yuj schiqꞌuil ebꞌ yicxo Dios,

aton ebꞌ milbꞌilcham yuj ix,

yujn̈ej to ix yacꞌ testigoal sbꞌa ebꞌ yuj Jesús.

Ix te sat in cꞌool vilan ix.

7 Yuj chiꞌ ix yal jun ángel chiꞌ dꞌayin icha tic:

¿Tas yuj sat a cꞌool ilan jun ix ix tic?

Ol val dꞌayach tas syalelcꞌoch ix yedꞌ jun scuch Nocꞌ uqueꞌ sjolom,

lajun̈eꞌ pax schꞌaac bꞌaj ayqꞌue ix dꞌa yibꞌan̈ chiꞌ.

8 A jun Nocꞌ sbꞌi ix il tic,

pecatax ayeqꞌui,

palta man̈xo ayoquecꞌlaj ticnaic.

Palta ol qꞌuexul junelxo dꞌa yol jun xabꞌ ayic manto bꞌat bꞌaj ol satel dꞌa juneln̈ej.

Axo ebꞌ anima,

aton ebꞌ man̈ tzꞌibꞌabꞌiloccan sbꞌi dꞌa jun libro yic qꞌuinal ayic manto bꞌo yolyibꞌan̈qꞌuinal,

ol sat val scꞌool ebꞌ yilan jun Nocꞌ sbꞌi chiꞌ,

yujto vachꞌchom aytax ecꞌ dꞌa pecatax chiꞌ,

axo ticnaic man̈xo ayoquecꞌlaj,

palta val yel ol jax junelxo.

9 A mach jelan,

ol nachajel juntzan̈xo tic yuuj.

A uqueꞌ sjolom jun Nocꞌ sbꞌi chiꞌ,

a uqueꞌ tzalan bꞌaj cꞌojanem ix ajmul ix chiꞌ syalelcꞌochi.

10 An̈ejtonaꞌ uqueꞌ sjolom chiꞌ,

a ucvan̈ nivac yajal syalpaxelcꞌochi.

Ovan̈ ebꞌ yajal chiꞌ toxo ix ecꞌbꞌati.

Ay jun aytooch yajalil ticnaic.

Ayto pax junxo toto ol javoc.

Ayic ol ja junxo chiꞌ,

man̈xo nivanoc tiempo ol yacꞌ yajalil.

11 Axo jun Nocꞌ sbꞌi aytax ecꞌ dꞌa pecatax chiꞌ,

palta man̈xo ayoquecꞌlaj ticnaic,

aton svajxaquil yajal,

palta aton junoc ebꞌ ucvan̈ chiꞌ.

Ol lajvoc chiꞌ,

axo yaj sbꞌatcan bꞌaj ol satel dꞌa juneln̈ej.

12 Axo lajun̈eꞌ schꞌaac jun Nocꞌ sbꞌi chiꞌ,

syalelcꞌochi,

a lajun̈van̈ anima toto ol och yajalil.

Palta quenn̈ej tiempo ol yacꞌ yajalil ebꞌ yedꞌ jun Nocꞌ sbꞌi chiꞌ.

13 A ebꞌ lajun̈van̈ chiꞌ,

ol scha sbꞌa spensar ebꞌ,

ol yacꞌanbꞌat yopisio ebꞌ dꞌa jun Nocꞌ sbꞌi chiꞌ.

14 Ol yacꞌlej ebꞌ yacꞌan oval yedꞌ jun Calnel sbꞌi,

palta ol acꞌjoc ganar ebꞌ yuuj.

Yujto Aꞌ Yajal yaj dꞌa ebꞌ yajal,

Rey pax yaj dꞌa ebꞌ rey.

Axo ebꞌ tzacꞌanoch yuuj,

avtabꞌil ebꞌ yuj Dios,

sicꞌbꞌilel ebꞌ yuuj,

aton ebꞌ scꞌanabꞌajani,

xchi jun ángel chiꞌ dꞌayin.

15 Ix lajvi chiꞌ,

ix yalanpax dꞌayin:

—A juntzan̈ a aꞌ bꞌaj cꞌojanem ix ajmul ix ix il chiꞌ,

syalelcꞌochi aton juntzan̈ chon̈abꞌ,

juntzan̈ nación yedꞌ ebꞌ anima dꞌa junjun chꞌocchꞌoc tiꞌal.

16 Axo lajun̈eꞌ schꞌaac jun Nocꞌ sbꞌi ix il chiꞌ,

ol meltzajoch ebꞌ ajcꞌolal dꞌa jun ix ajmul ix chiꞌ.

Ol yiqꞌuecꞌ ebꞌ masanil tas ay dꞌa ix.

Ol elcan bꞌeran ix.

Ol chijocbꞌat schibꞌejal ix yuj ebꞌ.

Ol sn̈usantzꞌa ebꞌ.

17 Yujto a Dios ix acꞌan scꞌulej ebꞌ dꞌa tas sgana.

Yuj chiꞌ junxon̈ej ix aj schaan sbꞌa spensar ebꞌ yacꞌanbꞌat yopisio dꞌa jun Nocꞌ sbꞌi chiꞌ masanto ol elcꞌoch tas albꞌilcan yuj Dios.

18 A jun ix ix,

ix il chiꞌ,

aton jun nivan chon̈abꞌ tzꞌacꞌan mandar ebꞌ yajal dꞌa yolyibꞌan̈qꞌuinal,

xchi jun ángel chiꞌ dꞌayin.