A juntzan̈ ucꞌabꞌ yic syaelal
16
Ix lajvi chiꞌ,
ix vabꞌan yoch jun av dꞌa templo chiꞌ.
Te chaan̈ ix yal dꞌa ebꞌ ángel chiꞌ.
—Ixiquec,
tze secanem yoval scꞌool Dios ayem dꞌa yol uqueꞌ ucꞌabꞌ chiꞌ dꞌa yolyibꞌan̈qꞌuinal,
xchi.
2 Yuj chiꞌ ix bꞌat jun bꞌabꞌel ángel,
ix bꞌat secanem yol yucꞌabꞌ chiꞌ dꞌa sat lum luum smasanil.
Axo masanil ebꞌ bꞌaj ayoch snumeroal jun Nocꞌ sbꞌi chiꞌ,
aton ebꞌ ix laj yaqꞌuem sbꞌa dꞌa yechel,
ix laj qꞌue juntzan̈ yabꞌil nivac mal te chuc man̈xo jantacoc syail dꞌa snivanil ebꞌ.
3 Ix lajvi chiꞌ,
axo jun schabꞌil ángel ix secanem tas ayem dꞌa yol yucꞌabꞌ dꞌa yibꞌan̈ aꞌ mar.
Axo aꞌ mar chiꞌ,
ix och aꞌ chicꞌal icha schiqꞌuil junoc anima schami.
Yuj chiꞌ ix cham masanil tas ay dꞌa yol aꞌ.
4 Ix lajvi chiꞌ,
axo jun yoxil ángel ix secanem tas ayem dꞌa yol yucꞌabꞌ dꞌa yibꞌan̈ aꞌ nivac aꞌ yedꞌ bꞌaj ay sjaj a aꞌ.
Yuj chiꞌ,
ix och aꞌ masanil chicꞌal.
5 Axo ix vabꞌan yalan jun ángel ix ixtanbꞌat a aꞌ chiꞌ:
Mamin,
ach Dios,
a achn̈ej ton vachꞌ ach.
Ay ach ecꞌ ticnaic,
ay achn̈ej taxon eqꞌui.
Vachꞌn̈ej ix utej acꞌan syaelal ebꞌ.
6 Yujto a ebꞌ anima ix laj macꞌanelta schiqꞌuil ebꞌ icxo yedꞌ ebꞌ ix alanel a lolonel,
a chicꞌ tzacꞌ yucꞌ ebꞌ ticnaic.
Smoj ton icha chiꞌ tzutej ebꞌ,
xchi.
7 Axo ix vabꞌani,
ix alchajelta jun lolonel bꞌaj ay altar,
ix yalan icha tic:
Yel Mamin,
ach Dios Cajal.
Syaln̈ej smasanil uuj.
Tojoln̈ej ix utej acꞌan syaelal ebꞌ icha val dꞌa smojal,
xchi.
8 Ix lajvi chiꞌ,
axo jun schan̈il ángel ix secanem tas ayem dꞌa yol yucꞌabꞌ dꞌa cꞌu.
Yuj chiꞌ ix acꞌji spoder cꞌu chiꞌ sn̈usantzꞌa ebꞌ anima yuj scꞌacꞌal.
9 Ix laj tzꞌa ebꞌ anima yuuj sicꞌlabꞌil,
palta an̈ejaꞌ maj snalaj sbꞌa ebꞌ.
Maj yaqꞌuemlaj sbꞌa ebꞌ dꞌa Dios.
Ton̈ej ix bꞌajvaj ebꞌ dꞌay,
yujto Aꞌ tzꞌacꞌancot juntzan̈ yaelal chiꞌ.
10 Ix lajvi chiꞌ,
axo jun yoil ángel ix secanem tas ayem dꞌa yol yucꞌabꞌ dꞌa yibꞌan̈ sdespacho jun Nocꞌ sbꞌi chiꞌ,
yuj chiꞌ ix te qꞌuicꞌbꞌiqꞌuinal dꞌa masanil yol smacbꞌen.
Axo ebꞌ anima chiꞌ,
ix ste cachꞌej yacꞌ ebꞌ yabꞌan syail.
11 Palta an̈ejaꞌ man̈ jabꞌoc ix sna sbꞌa ebꞌ.
Ton̈ej ix te qꞌuechaan̈ ebꞌ sbꞌajvaj dꞌa Dios aj satchaan̈ yuj juntzan̈ syaelal ebꞌ yedꞌ juntzan̈ yabꞌil ayqꞌue dꞌa snivanil ebꞌ.
12 Ix lajvi chiꞌ,
axo jun svaquil ángel ix secanem tas ayem dꞌa yol yucꞌabꞌ dꞌa yibꞌan̈ aꞌ nivan Éufrates.
Ix tupbꞌat a aꞌ chiꞌ,
taquin̈jon̈inac ix ajcan smelemal aꞌ yic sjacvi bꞌe bꞌaj ol ecꞌta ebꞌ yajal ol cot bꞌaj sja cꞌu.
13 Axo ix vilani,
ayecꞌ jun dragón yedꞌ jun Nocꞌ sbꞌi yedꞌ jun ix stzꞌac yacꞌoch sbꞌa yalanel slolonel Dios.
Axo dꞌa yol stiꞌ junjun ebꞌ,
ataꞌ ix elta junjun espíritu chuc.
Icha yilji nocꞌ pajtzaꞌ yilji oxvan̈ espíritu chiꞌ.
14 A juntzan̈ chiꞌ,
aton yespíritu ebꞌ enemigo,
schꞌox juntzan̈ milagro ebꞌ.
Ix bꞌat ebꞌ yacꞌ smolbꞌej sbꞌa masanil ebꞌ nivac yajal dꞌa yolyibꞌan̈qꞌuinal,
yic syacꞌ oval ebꞌ dꞌa jun cꞌual nivan yelcꞌoch yic Dios,
aton Dios Masanil syal yuuj.
15 Ix yalan Cajal Jesús icha tic:
Abꞌec nabꞌi,
icha scꞌoch junoc elcꞌum,
icha chiꞌ ol aj in cꞌoch lemnajoc.
A ex maclabꞌil eyuuj,
te vachꞌ eyicoꞌ.
Tzeyil val e bꞌa yedꞌ e pichul,
tato maay axo talaj tzꞌaji bꞌeran ex el dꞌa yichan̈ ebꞌ anima smasanil.
Ol eyacꞌan qꞌuixvelal e bꞌa,
xchi.
16 Ix laj molchaj ebꞌ nivac yajal yuj ebꞌ espíritu chuc dꞌa jun lugar scuch Armagedón dꞌa tiꞌ hebreo.
17 Ix lajvi chiꞌ,
axo jun yuquil ángel ix secanem tas ayem dꞌa yol yucꞌabꞌ dꞌa scal icꞌ.
Axo ix elta jun lolonel dꞌa sdespacho Dios dꞌa yol templo,
te chaan̈ ix yalaꞌ:
Toxo ix yicꞌ sbꞌa,
xchi.
18 Junanto rato chiꞌ,
ix ecꞌ copoljoc lebꞌlon.
Ay pax juntzan̈ tas ix laj cꞌan̈i.
Ix laj cꞌan̈ cꞌu.
Ix ecꞌ val jun nivan quixcabꞌ.
A jun quixcabꞌ ix ecꞌ chiꞌ,
yictax ix pitzvi anima dꞌa yolyibꞌan̈qꞌuinal mantalaj bꞌaj ix ecꞌ junoc icha chiꞌ.
19 Axo jun nivan chon̈abꞌ scuch Babilonia,
ox poj ix ajelcꞌochi,
axo masanil chon̈abꞌ ay dꞌa yolyibꞌan̈qꞌuinal,
ix laj lan̈chaji.
Ix najicot schucal Babilonia chiꞌ yuj Dios.
Ix yacꞌanbꞌat jun nivan yaelal dꞌa yibꞌan̈ yuj yoval scꞌool.
Ichato ix acꞌji vino te ov yucꞌ ebꞌ yuj Dios.
20 Masanil juntzan̈ lum luum oyquixtac ay dꞌa snan̈al a aꞌ yedꞌ masanil lum vitz,
ix laj satem lum smasanil.
21 Ix emta juntzan̈ sacbꞌat te nivac.
Ay am junjunoc quintal yalil junjun.
Ix laj bꞌajvajqꞌue ebꞌ anima dꞌa Dios yuj juntzan̈ sacbꞌat chiꞌ,
yujto te nivan jun yaelal chiꞌ.