A ucvan̈ ángel yedꞌ uqueꞌ yaelal
15
Ix vilan junxo yechel te nivan yelcꞌoch dꞌa satchaan̈.
Ix te sat in cꞌool vilani.
Ay ucvan̈ ángel ol icꞌancot uqueꞌ slajvubꞌ yaelal.
Yuj uqueꞌ yaelal chiꞌ ol tzꞌacvoquelcꞌoch yoval scꞌool Dios.
2 Ix vilanpax jun icha aꞌ mar yilji calan yaj yedꞌ cꞌacꞌ.
Axo dꞌa stzꞌey jun chiꞌ ay juntzan̈ lin̈jabꞌ eqꞌui,
aton ebꞌ ix stecꞌbꞌej sbꞌa dꞌa yichan̈ jun Nocꞌ sbꞌi chiꞌ,
maj yacꞌpaxemlaj sbꞌa ebꞌ dꞌa yechel.
Maj schaochlaj snumeroal sbꞌi ebꞌ dꞌay.
Van sonan ebꞌ yedꞌ juntzan̈ yarpa ix acꞌji yuj Dios.
3 Ix sbꞌitan jun bꞌit ebꞌ sbꞌitejnac vin̈aj Moisés,
aton vin̈ schecabꞌ Dios yedꞌ pax jun bꞌit yic jun Calnel sbꞌi.
Icha tic syal jun bꞌit chiꞌ:
Ach Cajal,
ach co Diosal,
masanil tas syal uuj.
Te nivan yelcꞌoch masanil tas ix a cꞌulej.
Ste sat co cꞌool quilani.
Te yel,
tojoln̈ej pax a bꞌeybꞌal,
A ach sReyal ach junjun nación.
4 ¿Tocval ay junoc mach max xiv dꞌayach Mamin?
¿Toc ay junoc mach max alan vachꞌ lolonel dꞌayach,
yujto a achn̈ej te vachꞌ ach?
Ol cot ebꞌ anima dꞌa junjun nación,
ol ul em cuman ebꞌ dꞌayach,
yujto chequelxo yaji to te tojoln̈ej tzutej a chꞌolbꞌitan yaji,
xchi ebꞌ.
5 Ix lajvi chiꞌ ix vilan sjacvi stemplo Dios dꞌa satchaan̈,
aton scajnubꞌ yic strato Dios.
6 Ataꞌ ix elta ucvan̈ ebꞌ ángel ol icꞌancot uqueꞌ yaelal,
junjun yic junjun ebꞌ.
Ayoch junjun sacsac pichul yuj ebꞌ te tziquiqui.
Ay junjun tzecꞌul nabꞌa oro ayoch dꞌa sn̈iꞌ scꞌool junjun ebꞌ.
7 Ay jun dꞌa scal ebꞌ chan̈van̈ querubín chiꞌ ix acꞌan junjun ucꞌabꞌ nabꞌa oro dꞌa junjun ebꞌ ángel chiꞌ.
A junjun ucꞌabꞌ ix acꞌji chiꞌ dꞌa ebꞌ,
bꞌudꞌan dꞌa juntzan̈ nivac yaelal yuj yoval scꞌool Dios,
aton Dios ayn̈ejecꞌ dꞌa juneln̈ej.
8 Ix te em numan tabꞌ dꞌa yol stemplo Dios chiꞌ yuj stabꞌil stziquiquial yedꞌ spoder.
Malaj junoc mach syal scomon och taꞌ,
masanto ix lajviecꞌ uqueꞌ yaelal yedꞌnac ebꞌ ángel chiꞌ yucvan̈il.